O se taimi muamua lenei ua ofaga potopoto ai ni tamaitai o laei i le malu faapea ni sogaimiti e silia ma le fasefulu i se nofoaga e tasi i Sini nei ma o le vaaiga lea sa iai le Aso Gafua 9 o Iuni i faafiafiaga o le Sisigafu‘a.
E ui o le tele o ausiva ma tagata pepese ae peitai na faapei o se vaaiga fou le foleni a alii ma tamaitai o laeiina tatau a le atunuu a o maimoaina e le aofia.
I se faamatalaga a le tamaitai ia Maureen Papalii Afoa ma le susuga Pejay Clarke na tuufaatasia lenei faamoemoe, “O le agaga lava o le faaaogāina o lenei aso e faalauiloa ai measina a le atunuu ma silasila foi le tupulaga laiti i le tāua ma le mitamitaga o loo iai pe a tauaveina nei meatotino a si o tatou atunuu.”
E lē tele se taimi na valaau atu ai i soo se sogaimiti ma ni faimalu e fia tuufaatasia auā lenei aso a o le tali mai a i latou na maofa ai le aufaatonu. Faaalia e le Afioga Aiolupotea LeValasi Aoatua Tuisila Lee, “E na o le faalua lava tuufaatasiga ae ausia le sini o le faamoemoe e pei ona maimoaina e le atunuu i le Sisigafu‘a.”
Sa mataina le polokalame amata e i latou nei ma savavali faatasi mai ai i tulimanu e fā o le nofoaga i Whitlam ma feiloaia ai i le ogatotonu mo la latou faafiafiaga.
E lē taumate o nisi foi o mātua na molimauina ma fanau lenei faafiafiaga o le a faatupuina se manatu e fia laei foi a lē o le malu, o le tatau mo alii i le lumanai e faatāua ai lo latou faasinomaga.
O nisi o ausiva na auai e iai le Matavai Cultural Arts, Evana, Embrace, SOTI ma ausiva a aulotu. Sa matagofie lava le polokalame na faafoeina e sui o le Fono Aoao faapea Lau Samoa afioga ia Alaalatoa Emani, Papalii Steve Toomalatai ma Feagai Kirisome.
O i latou na fesoasoani e aofia ai Koko Devine ma Tia Kirifi.
