O se vaaiga matagofie tele ma le felanulanuai na maimoaina e le toatele na faatasi atu i le malae i Ray Blank Park, mo le faalauiloaina o le tele o mea taulima eseese, o le maketiina o ituaiga pisinisi atoa ma faleoloa o mea taumafa a lea atunuu ma lea atunuu sa faatau ai, aemaise o le matalasi o faafiafiaga a atunuu na auai ma a latou foi togiga.
O lenei faamoemoe e faia lava i tausaga uma, ae i se saunoaga a le alii faipule faaitumalo o le Labour, Hon Burns na ia taua ai le alu alu pea i luma o lenei fuafuaga, ma e tele pisinisi o loo latou lagolagoina atoa ai ma le faatupulaia o le fuainumera o pisinisi aemaise communities e auai i tausaga uma.
O nisi o autu taua o le taumafai lea e opogi faatasi atunuu ma gagana eseese e faafaigofie ai le femalamalamaai i tu ma aga, aemaise lava ua maua lea avanoa mo aiga ma fanau e tafafao ai e aunoa ma se tele o se tupe e faaaluina.
Toatele foi le au faipisinisi e lololo ia i latou lenei aso felanulanuai aua e tele ai foi sina fasi tupe e maua mai a latou oloa.
Talu ai la o aso faapenei e tatau lava ona matua malosi ma ola le musika aemaise lona faagaioiga i le faalauiloaina o lea pisinisi ma lea pisinisi, e le gata i lea o le faagasologa o polokalame eseese aemaise siva a soo se atunuu na auai.
O le auaunaga la a le community access radio i le faamalu o le Plains FM 96.9 i Canterbury, lea o loo faataunuuina ai le tele o polokalame a atumotu aemaise Samoa, o i latou ia na faafoeina lea aso manaia e pei ona iai le tamaitai pule Niki Reece faapea le aufaigaluega, aemaise foi o se lagolagosua a le Siufofoga o le Penina o Samoa mo le faamama avega foi i le ofisa faasalalau ma le pulega i lea aso. E le toatele nai o tatou atumotu Pasefika sa auai i lea faamoemoe ae na tumu i le au Asia, Europa, Saina, Iapani, Eleni ma Initia.
Na fesiligia e le tusitala poo le a le mafuaaga o le faaitiitia o ni siva ma faleoloa faa-Pasefika i lea aso, ae sa le maoti se tali na aumai ae o le tau masalo lava o le faagalogalo ma le faatamala, ia poo le lei mautinoa lelei o lenei foi taualumaga.
O le tasi foi o itu taua o lenei faamoemoe, ua maua tele ai le avanoa e taulogologo ai ma faamalamalama i tagata le auaunaga a lenei foi fale uaealesi o loo tele polokalame Samoa o loo faaleoina ai, aemaise isi atumotu e fia o loo alaala i Kalaiesetete.
Atonu o lea aso na matua suipi ai le aufaafiafia mai Iapani ma Fiti, ae sekiseki paleni ai Niki ma lana aufaigaluega i le tu’iina o le musika.
