O le tamaitai o Leilani Unasa e mai le afioaga o Matafaa i Lefaga.
Ua atoa nei le 32 o ona tausaga ae o ia o se tasi o tamaitai talavou talenia tele i le tusiga o tala ma ata faatino, poo play atoa ai ma lona faatinoina.
O le tamaitai o Leilani na ia faaalia lona agaga fiafia ma le faafetai i le Atua ina ua mafai foi ona laasia se isi laasaga o le ola finau ma le tauivi i taleni eseese ua ia maua.
O le Metro Theater i Magele i le tuatusi o le 362 Massey Street Magele i Sasa‘e o le a mafai ona maimoa ai le mamalu o le atunuu i le play poo le koneseti ua tuufaatasia e le tamaitai o Leilani, e tauala mai i ana suesuega sa faia e faatatau i se talavou Samoa e alala i Niu Sila nei, ma o aafiaga o lona olaga i le taumafaina o le ava malosi ma isi aafiaga mai ana uo aemaise o si ona toalua papalagi ma si a la tama.
O le igoa o le play a le tamaitai o Leilani, o le His Mother’s Son ma e manatu Leilani o lenei galuega ua atagia ai le tulaga moni o loo tulai mai i Niu Sila nei i le tele o tama ma teine talavou o le atunuu o loo gasolo mai iinei ma aumau ai.
Fai mai le tamaitai tusitala, o le play lea e maua ai le ‘ata ae maua foi ma sina maligi o loimata ona o le ituaiga olaga na iu i ai le tamaitai o loo ta‘ua ae poo ai foi ia tagata.
O le fuafuaga i le Aso Tofi (15 Iulai) o le vaiaso nei o le a amataina i le ‘afa o le ono i le afiafi ma o se avanoa ua valaau ai i soo se tasi e fia auai ina ia afea lea nofoaga i le afiafi o lea lava Aso Tofi o le vaiaso nei lava.
E leai se totogi ae pule le tagata i lana foai mo lea faamoemoe.
O le tamaitai o Leilani o lona tuaa o Unasa Joseph Unasa mai Lefaga, ae o si ona tina o Irene o le papalagi, ma o le taimi nei o loo faigaluega Leilani i se kamupani i Papakura e faaopoopo atu ai i lana galuega tele ma le taleni e pei ona o le a maimoaina e i latou uma e auai ai i le Aso Tofi.
O loo galulue faatasi Leilani ma isi o le au pueata tifaga i Niu Sila nei mo le tuufaatasia o lenei faamoemoe, ma o le itu aupito i sili e pei ona faailoa o le galulue faatasi foi o le tamaitai ma nisi o tamafanau a Samoa ma le Pasefika i le tuufaatasia ai o lenei ata faataitai.
O le faamoemoe o Leilani o le a faaauau pea le agai i luma i lenei fuafuaga aemaise o le atina‘e atili ina ia mafai ona agai i luma e faafiafia ai le mamalu o le atunuu.
