Faaali lou agaga moni faa-Pasefika!

Silasila ane i ata nei o nisi o alo ma tamafanau a le Pasefika, sa tauina le taua o mafaufauga lea foi o loo tauina e nisi o alo ma fanau, e lē gata ia Samoa, ae faapea foi ona uso tuaoi o Tonga ma Fiti.

O le afioga i Le Papaliitele Pita Fatialofa, o ia o se tasi na tauaveina le tagavai o Samoa a o avea ai foi ma Kapeteni o le Manu Samoa i nisi o tausinioga o le Ipu o le lalolagi.

Saunoa Papalii, “Ou te lagolagoina uma o tatou uso Pasefika, auā o le mea tonu ma o le mea e tatau ona tatou faia o ni tagata Pasefika, ia tatou taufai lagolagosua ma faamalosiau le tasi i le isi.

O lo‘u tina matua (grandmother) o le Tonga ma e momoli ai foi a‘u faamanuiaga i le ‘au a Tonga, le Ikale Tahi mo iai uma a latou taaloga o loo totoe.

E faapena tutusa foi lo‘u lagolagoina ma a‘u faamanuiaga mo le ‘au a lo‘u atunuu o Samoa, “Go Manu Samoa”.
O le susuga ia Emosi Koloto, o ia foi o se sui muamua o le ‘au a Tonga, le Ikale Tahi, ma o se alii foi sa taalo mo le ‘aulakapi liki a le Kiwi.

O Emosi o loo avea nei ma Sui Taitaifono o le Komiti o Galuega mo le faamaopoopoina o tapenaga a le ‘au a Tonga i le Ipu o le Lalolagi o le 2011 (Vice Chairman of the Tongan World Cup Working Komiti 2011).
Na saunoa Emosi, “E lē gata ina ou tapuai mo le Ikale Tahi, ae ou te tapuai foi mo le Manu Samoa auā o lo‘u tamā matua (grandfather) o le Samoa.

E tatou te taufai felagolagomai ma tapuai faatasi. O le uiga tonu lena e tatau ona iai ia i tatou o tagata uma o le Pasefika, ina ia tatou taufai lagolago ma tapuaia faatasi a tatou ‘au mai le Pasefika.” Se‘i o tatou faaalia le agaga moni faa-Pasefika, ia tatou tapuaia faatasi taaloga uma a nai o tatou alo ma tamafanau o le Pasefika!