E eseese lava auala e faaali ai e tagata la latou lagolago i aulakapi a o latou atunuu e pei ona tausinio ai i le Ipu a le Lalolagi o loo talimalo ai Niu Sila i lenei tausaga, 2011.
E toatele tagata o loo feoai solo ma tagavai poo fu‘a, a lē o le faalealea solo ia latou taavale, po ua sii sa‘o i luma o o latou fale, e faaali ai le lagolago. O nisi ua oofu i ofu a aulakapi o loo lagolago i ai, o pulou, sikafu, pe tau lava foi ina ofu i le lanu e tutusa ma le lanu o loo ofu ai lana aulakapi.
Peitai o le alii laitiiti o Dean Lilomaiava Tupua Bond, e ese foi le faatinoga o lana lagolago. E lua ‘au o loo lagolago e le alii o Dean; o le All Blacks ma le Manu Samoa.
O le Aso Faraile, aso 16 Setema, na agai ai le alii o Dean i le fale teuulu a le Groom Barber shop i Stokes Valley, ma sikaili ai le otiina o lona ulu e pei ona vaaia i le ata. O le isi itu sa ‘oti ai le ata o le laupaina (silver fern) a Niu Sila, ae o le isi itu sa ‘oti ai mamanu o le tatau a Samoa ma le fetu o le fu‘a o Samoa.
Na mataina mamanu o le ulu o Dean i totonu o lana aoga, Koraunui School, lea na ia maua ai le faailoga o le Excellence Award, mo se sikaili ua sili ona mataina (awesome hair cut)!
Sa matuā lagolago uma i ai nai ona mātua, o Serela ma Gareth, aemaise si ona tuafafine laititi o Tarita Tupua Bond. Seki lava oe Dean, manaia le faiga o lau lagolago i le All Blacks ma le Manu Samoa!
