Na matuā sioa ma pulaloa le toatele o aoga, ma le mamalu o le au maimoa a o sasaa faausi faafiafiaaga a le kolisi a Lepa ma Lotofaga i luga o le fata faafiafia a Samoa i le afiafi o le Aso Faralie na tea nei.
Na matuā faaaogā lelei lava e le kolisi mai Samoa, lea avanoa sa faamatuu ane e le komiti mo a latou faafiafiaga, i le aso faapitoa mo tauvaga a aoga maualuluga i Aukilani poo le ASB Polyfest 2011.
O ni faafiafiaga sa manatu le toatele, sa suia ai lagona ma manaoga a o maitauina, ma maimoaina siva ma faafiafiaga o lenei foi tausaga.
Masalo e atoa lelei lava le 30 minute sa faagasolo ai faiga a tama ma teine mai Samoa, e leai ma se mālōlō.
O pese sa faaaogāina, atoa ai ma gaioiga, sa leai se motusia, leai foi se mālōlō, ae sa sosoo lelei, pese atoa ai foi ma le faatinoina o taga ma gaioiga.
O se fafagu tele, ma o se faamanatu tāua tele mo aoga i Niu Sila, le tatau ona toe silasila toto‘a i le uiga moni, ma le aano o siva ma faafiafiaga faa-Samoa moni. E iai lava eseesega pe a maitauina le tulaga ua agai i ai siva a aoga i Niu Sila.
O le tele lava o aoga i tausaga taitasi, ua matele i le faapa‘ō o le fata, ma soona faataitaiō leo ma le pa‘ō o musika, ae ua misi atoa ai le uiga moni ma le sini autū o loo tatai i ai le uiga o Siva Samoa moni.
O se tulaga ua lē mautonu ai foi manatu, poo le ituaiga siva moni lea, o loo taulai i ai ma tulituliloa i tausaga taitasi i le Polyfest.
O gaioiga ma le faatinoina o pese ma taga, o siva faa-Samoa moni, sa toe vaaia i le taimi na faafiafia ai le kolisi a Lepa ma Lotofaga. E oo lava foi i le togiga, sa atagia ai foi mamanu faa-Samoa, ma le ata o le pua Samoa.
O isi ia itu tāua sa toe fafagu mai e le kolisi mai Samoa, e tatau lava ona o faatasi pese e faaaogāina, ma laei e laeiina, atoa ai foi ma taga e faatinoina.
O le atoatoa lea ma le maua tonu ai o le uiga faa-Samoa e pei ona manaomia e alo ma fanau o loo tutupu a‘e, ma soifua i totonu o Niu Sila.
O le auai o le kolisi mai Samoa i lea aso sa faapitoa mo tauvaga a aoga maualuluga i Aukilani, ona o se mafutaga faaleuo sa valaaulia ai e le aoga a James Cook i Manurewa i Aukilani i Saute.
O le Aso Sa ananafi, aso 20 o Mati, sa see ane ai le kolisi mai Samoa, e faatasi ane i le ekalesia EFKS i Kuiniselani i Aukilani Tutotonu.
O le susuga i le faafeagaiga ia Rev Maligi Evile ma le faletua, sa lagolago malosi i le malaga mai o tama ma teine o le kolisi ma faiaoga e pei ona saunoa i ai le tamaitai pule o le aoga.
O le feiloaiga lava lea, sa toe faamaonia mai ai e le afioga i le tamaitai pule e faapea, o le vaiaso fou o le a agai ai i le isi valaaulia mai le itu i Sisifo o Aukilani lava. A mae‘a lea valaaulia, ona maua ai lea o le avanoa e tatala ai i tua tama ma teine o le aoga i o latou aiga, a o lei toe taliu i Samoa.
