Faaafe e tama fanau afioaga o Solosolo alii pese – Vaniah Toloa

E lele lava le toloa ae maau i le vaivai, e fesuisuiai le taimi i le uati atoa ma le agi o le matagi ae lē mafai ona suia ma faagaloina le mafutaga i aiga, nuu, atunuu ma le ekalesia pe a fuifui faatasi lupe sa vaoeseese.

Ua faapena se lagona e pei ona a‘e ai se manatu, ae o se tasi moemoe i tama fanau a le afioaga o Solosolo o loo alala i le aai o Kalaiesetete ina ia faia se latou faaafe ae o se feiloaiga fiafia mo le uso ae o se tuagane foi i le alii pese o Vaniah Toloa a o iai i laufanua o le aai o fugalaau matala.

Peitai la ina ua taliu mai Vaniah mai lana malaga i Oamaru ma Timaru e asia nisi o aiga lea sa valaaulia faapitoa ai e alo ma fanau o Solosolo mo se latou fiafia i le afiafi o le Aso Tofi, 3-02-2011 na se‘i mavae atu nei.

Pei foi ona lipotia atu i le lomiga ua mavae tuaa o Vaniah, o si ona tina Lemusu Logo Tepa Fesola‘i e sau mai le alalafaga lenei o le itumalo o Anoamaa.

Sa faapea ona faataunuuina lenei mafutaga fiafia i le maota o le susuga Pio Ami Liaina, le sa faamaopoopoina le faamoemoe, o le alii faasalalau i luga o le Siufofoga Penina o Samoa i Kalaiesetete, ma sa faapea ona faatasia ai lea afiafi matagofie alo ma fanau tupulaga.

Maitauina e le tusitala o i latou ia sa faapitoa i ai le fia feiloai ia Vaniah mo le asamoina mai o lana taleni musika, aemaise o se luitau a o tuputupu a‘e i totonu o lenei atunuu.

Sa auai i lea faatasiga le susuga Tulima Fualau mai le afioaga o Moataa, o le ta‘ita‘i o le komiti faafoe, o ia foi sa faamautu i ai Vaniah i Kalaiesetete ma ua faapena ona lauiula ai lea po fiafia.

Na muamua lava momoli laau i Fogaa i se alalafaga faaleagaga  masani ai tauafiafi na saunia e le tiakono Toonai Tafea ia ma faagasolo ai loa se polokalama puupuu ma le suamalie.

Na faaalia le agaga fiafia o Vaniah ma faafetaia ai le Atua ona o avanoa ua maua ua mafai ai ona feiloai i uso ma tuafafine mai Solosolo, aemaise ai lona mafuta i alo ma fanau tupulaga.

O lea lava afiafi sa faapitoa lava i tama fanau a lenei afioaga, nisi foi sa malaga mai Melepone e pei o le alii pese o Steve Tafea ma Perth i Ausetalia.

O nisi na mafai ona auai o Seiuli Tauamiti, Nisani & Makerita Isaako, Tupu & Ioana Tupa‘u  Ah Hao, Fofoa Asi Lesatele, Dorothy Peleti Vailuu, Leticia Milo-Feausi.

O nisi o le mafutaga sa lē mafai ona auai ae sa faapea ona faaleo mai latou faamanuiaga ma le lagolago fiafia i lenei tama fanau a le nuu.

Na alo i le taumafataga tele e pei ona saunia lava e tama fanau, momoli foi le faafetai i le susuga i le komiti Tulima Fualau mo le talimalo lelei i le alii pese a o iai i Kalaiesetete, o le fetalaiga Faletua‘i Nisani sa fai ma sui o le mafutaga e molimoli se meaalofa faatauvaa ua saunia e lē gata mo Vaniah ae faapena ona faasafua atu mo le alii komiti.

O upu taumavae o le po, “Ua na o le Atua e malie ai le galala o le tagata, ‘aua ne‘i galo se meaalofa o ana meaalofa”.

O le afiafi o le Aso Faraile na sosoo ai, i luga o le polokalama a le Siufofoga o le Penina o Samoa Plains FM 96.9  sa faapea ona toe maua le avanoa o Vaniah e momoli ai lana faafetai i le mamalu o le atunuu mo le lagolagoina aemaise o le opogi i ana koneseti e lua ua mae‘a.

Ua tuuvaa atu nei o ia mo Aukilani mo le pueina o lana lipine numera fa, faatasi ma alofaaga ina ia momoga le tofa ma ia lalaoa pea le liu o le vaa.