O se tasi o tamalii tuai sa tautua muamua i le au a le atunuu le Manu Samoa, le tofa Fainuulelei Matamua Filipo Saena, na taulamua i le faafeiloaiga o le au Taitoafitu a le atunuu ina ua toai taunuu atu i Adelaide Ausetalia i le vaiaso na tea nei, a o lumanai ai le Taamilosaga lea na tatou Siamupini ai.
E le gata o le feiloaiga ina ua taunuu atu le au, ae o le sauniga e faailoa ai le agaga faagaeetia o le atunuu o loo alaala i lea foi itu o le Vasa Tasimane, i le manumalo ai o le Manu Samoa i le vae o le Taamilosaga i Las Vegas.
O le suavai (umu) luau ma teuteuga eseese e masani ai Samoa i ana taliga malo lea na faafeiloai ai le susuga i le alii faiaoga ia Steven Betham ma lana au, faatasi ai ma laufofoga fiafia o le atunuu sa vaaia i lea taimi. Na faafetaia e le alii faiaoga o le au faapea foi le taitai malaga, Tauasa Faamaoni Lalomilo, le agaga talisapaia na faaalia e le mamalu o Samoa i lea vaega o Ausetalia.
O le tofa Fainuulelei Matamua Filipo Saena, o se tasi o sui o le au Taitoafitu a Samoa lea na uluai siia le Ipu o le Taamilosaga i Hong Kong ma Canberra i Ausetalia i le tausaga e 1993. I se pepa o faamatalaga na tuuina mai o loo iai se vaega o le saunoaga a le tofa Fainuulelei na ia taua ai, o le manumalo o le Manu i Las Vegas na toe fafagu uma mai ai i lona mafaufau lona ia foi vaitaimi, i le faigata o toleniga, ae lē taulia ai lagona lē mautonu, ma le tele lava o isi faigata, peitai na galo na tiga uma ina ua tofo i le suamalie o le manumalo, ma o ni lagona e le mafai ona galo i taimi tāua faapenei i le talafaasolopito o le Lakapi a Samoa.
O le tausaga e 2009 na filifilia ai le susuga Filipo Saena ma maua lana faailoga taualoa mai le Samoa Sportstar.com i Ausetalia, i lana auaunaga i taaloga a Samoa lea na avea ai ma uluai tama taalo a le Manu Samoa na maua se taui mai ni manu‘aga o taaloga i le vaitau a o lei faia faapolofesa le taaloga.
O faailoga taualoa foi na sa faamanuiaina ai nisi foi alo o Samoa, e pei o Sonny Bill Williams, Digby Ioane, Aaron Edwards ma Tim Carhill ma isi.
O lea faalapotopotoga o taaloga na faavaeina e se tasi foi o tamalii Samoa ua loa lana tautua i faasalalauga i le atunuu le Afioga Leilua Jerry Uesele.
Saunoa Leilua, e na o le pau lea o le ituaiga faafeiloaiga e fiafia tele i ai tama o le Manu, o le taro ma le palusami, ma ua na o sina faatinoga itiiti e faailoa ai le lagolago ma le faafetaia o alo o le atunuu, ona o le lotonuu ma le finau malosi.
O le aso 3 o Aperila lea o le a faataunuuina ai se tasi o Taamilosaga taitoafitu e faaigoaina o le Melbourne Easter Sevens 2010, lea foi e faatautaia ma taiulu ai le tofa Fainuulelei Matamua Filipo Saena, lea o le a faia i le Moorabbin Rugby Club i Victoria i Melepone.
