“O se isi lena tulaga ua tatau ona silasila i ai sailiiliga i le Mataupu Silisili”
Ua folafola e le afioga i le Palemia i sona finagalo ua lipotia i auala o fesootaiga, e lē taitai ona talia i Samoa faiga ua ioeina e nisi o Malo Temokarasi o le aloaia faaletulafono o le fenofoai o ni itupa tutusa o tagata e ala i le sakalameta o le faaipoipoga, poo le toe nonofo faaletulafono i le faaipoipoga o se alii ma se isi tama tane, faapea se tamaitai ma se isi tama fafine lea e ta‘ua i le gagana peretania o le same sex marriage.
Ua talia e Niu Sila lea tulaga e pei ona iai se tulafono ua pasia e le Palemene o lea atunuu i le vaiaso ua mavae, peitai ua faaalia e le Palemia, Susuga Tuilaepa Lupesoliai Sailele Malielegaoi, o lona taimi o avea ai nei ma taitai o le Malo tutoatasi o Samoa e faavae i tu ma aganuu ma a‘oa‘oga faakerisiano, e lē tupu ai sea tulaga. I se finagalo o le Palemia i se talanoaga i luga o le televise kerisiano i Samoa o le Kingdom TV, sa fesiligia ai o ia i lona avea ai ma Peresetene o le asosi o Faafafine i Samoa. Peitai na faaalia e Tuilaepa e fā ituaiga o tagata o loo soifua ma ola i le lalolagi.
“O tagata e atoatoa ma i latou e tino i tamaitai poo se alii ae o lona mafaufau i le faatinoga o ana galuega ma tiute uma e fai e ese”. Faaalia e Tuilaepa o se alii o lona mafaufau o se tamaitai, e faapea foi i se tamaitai o lona mafaufau ua na o amioga faatama tane na te faia. Na faaalia ai foi e le Palemia o se tasi lea o itu ua tatau ona toe silasila i ai ekalesia i le a‘oa‘oga faamataupu silisili ina ia vaavaai i suesuega faasaienisi, i le tulaga ua eseese ai le fausaga o tagata.
Na viia e le Palemia le asosi o Faafafine i Samoa i lo latou sao o loo fesoasoani ai i faalapotopotoga tuma‘oti o loo manaomia se fesoasoani, e pei ona latou faia ni suegatupe ma foai atu mo ia faalapotopotoga.
“E sili atu le sao o faafafine nai lo le vaega lea e feofeoai solo ae leai ni mea o faia”.
O loo aloaia e le Malo le tāua o le sao o i latou i soo se galuega ma tautua i le malo, peitai o loo tamau pea le Malo i talitonuga faalelotu o loo laulauvivilu ma faavae ai le malo tutoatasi, i le teena o se tasi o fautuaga a le komisi mo le toe fuataina o tulafono mo le soloia o le solitulafono o le faasotoma mai tusi tulafono.
Ua saunoa manino le taitai o le Malo i le mafuaaga o le teena o lea fautuaga ona o a‘oa‘oga faakerisiano o loo talitonu i ai le atunuu atoa. O se tasi lea o mau maumaututu e faavae ai le finagalo o le Malo e lē talia lava i Samoa ni faiga faasotoma ma komoro.
