Ua finagalo le Kapeneta e tuuina atu se faaseā a le Malo o Samoa i le Faalapotopotoga Faasalalau a Niu Sila e faasaga i le Ofisa Faasalalau o le TVNZ One News, e faatatau i se polokalame na faasalalauina i luga o tala fou a lea Ofisa faasalalau e faaulutalaina o, “Kegi ma Fualaau Faasaina i totonu o Samoa”. O lenei Polokalame o loo tuuaia ai e le Ofisa Faasalalau a le TVNZ i sana ripoti i tala fou le faatauina o fualaau faasaina e ni ‘Kegi’ ma le auina mai o laau malosi faananā i totonu o Samoa. E tusa ai o ni su’esu’ega na faia e le Ofisa o Leoleo, ua matauina ai le taufaasesē o nei faamatalaga, ma ua faaleaga ma tauleagaina ai le igoa o le atunuu aemaise i le atina’e o tagata tafafao mai fafo. Ua faaaogaina nei le Ofisa Loia a Chapman Tripp e tula’i mo le itu a le Malo ma ia saunia ma failaina e le Chapman Tripp le faaseā e tusa ai o tuuaiga le talafeagai ua faia.
O se tala lata mai i suesuega a leoleo ile mataupu ua fa’ailoa lautele ai fa’amatalaga tusitusia a ni alii se to’afa na faatalanoa e le tamaitai tusitala o Barbra Dreaver, i lana lipoti ma ua tutumau ai lo latou te’ena o le fa’amatalaga ua faia e le faletelevise. O lona uiga e aliali mai i le mataupu e leai se itu o solomuli ma tautino a mea poo ai ua iai lona lape, ae ua faataututu uma i le tau fai sa’o o le tagata lava ia. O le talosaga faasea a le Malo o le a tuuina atu lea i le tino o faasalalauga a Niu Sila poo le New Zealand Broadcasting standard nate suesu’eina le mataupu atoa ona maua ai lea o se tali o le tulaga ua aliali mai.
Ua ma’ea nei ona faia le fa’amatalaga tauto i le faamasinoga poo le affidavit a le tamaitai tusitala o le televise a Niu Sila o Barbara Dreaver, ua saga faamautu ai le moni atoatoa o lana lipoti i le iai o fuala’au faasaina ma a’upega poo la’au malosi o loo aumai fa’anana i Samoa. O le faamatalaga tauto a le tama’itai tusitala ua fa’asalalauina ile upega tafa’ilagi o le Talamuaonline, lea o loo tautino ai e lei fafauina ata na pu’e, e lei aveina foi ni avamalosi iai latou na faatinoina gaioiga o le uu o agaese, ma to’i. Ta’ua foi e le tusitala o sikaleti maruana moni lava na ula e alii talavou na talanoa iai ma sa faailoa foi iai o la’ua ma lana pu’eata ma se tasi o faufautua na latou galulue o sui o le televise a Niu Sila. Fai mai le tusitala a le TVNZ na ofo atu e se tasi ia te ia pe fia ula ile maruana, ae na ia te’ena. O alii talavou ia na matua tete’i ma le ofo tele ina ua sau o latou ata ile lipoti, ae o le latou mau na faapea atu le au fai lipoti a le televise o se isi polokalame i luga o le TV e faaaoga iai. Ua tautino foi ia taulele’a i leoleo e leai se isi o latou e aafia ini kegi, o se vaega e le’o ta’ua ile tautinoga tauto a Barbara Dreaver na faia ile vaiaso nei i le faamasinoga maualuga i Niu Sila, sa molimau ai ise loia. E anoanoai nisi o faitioga i finagalo na faaalia e le mamalu o le atunuu o aumau e le gata I Niu Sila ae faapea foi I soo se atunuu na mafai ona maua lea faamatalaga mae agai sao ia faasea I le tulaga tauleagaina o le igoa o Samoa I lipoti e pei ona tuufaatasia e le tamaitai. Sa saunoa foi nisi o tamalii na faatalanoa e le Samoa Times i le vaiaso nei e faatatau i le mataupu lenei ma taua ai e faapea o le tulaga ua iai nei e foliga mai ua ave atu ai ma le tala le lelei o Samoa ona o lenei lipoti ae o le itu pito sili ona popole iai pe afai e moni lenei faamatalaga ona o lona uiga e tele ina leiloa e le toatele aemaise lava leoleo le tulaga lamatia ma le le lelei o le a iai nei si o tatou atunuu ona o nei uiga ma faiga. Pau le itu ua mautinoa e le o toe umi se taimi ona maua lea o le tonu o lenei mataupu aua e sao ai lava foi nisi upu a le atunuu “ e tuai lava ae fai mai”.
