Ua tuuina atu nei se fautuaga a le fofoga fetalai i lana loia tumaoti le afioga Maiava Visekota Peteru, ina ia silasila i le gaioiga a sui o le Tautua Samoa mo le faia oni moliaga o le le usita’ia o le fa’ai’uga a le Palemene le contempt of parliament. Ua mafua lea fautuaga a le fofoga fetalai i lana loia ona o le ulufale fa’amalosi o sui o le Tautua Samoa ile maota fono i le aso Gafua, ae ua uma ona faia lana faai’uga ua soloia ai o latou tofi faipule, aemaise o le faatonuga tusitusia na ave i tagata faigaluega e logo ai sui o lea pati e le tatau ona latou toe ulufale ile palemene. Na numinumi e le sui faipule o Gaga’emauga numera 2 le afioga Levaopolo Talatonu se tasi o pepa na ave iai e se alii ofisa, ma fa’aauau ona ia laasia le faitoto’a i tua o le maota fono e ulufale ai ile itu o loo alala ai le itu agai.
Na molimauina foi le uu e le tasi o faipule o lea pati o le faitoto’a ma taofi ae ulufale nisi oo latou sui, ao tutu alii ofisa e to’alua o le fono ma silasila iai, ua le mafai ona la taofia. Ua tetena e le alii palemia le lafoga a le taitaifono o le Tautua Samoa ua sa’i ai ile taitai o le Malo pe aisea na le fesoasoani ai i le latou mataupu e tusa o le faaiuga a le fofoga fetalai. Peitai na faaalia e le Palemia e leai se isi o lea pati na oo atu e talosagaina sana fesoasoani. O lana pitola’au foi ile taitaiga o le Malo e le mafai ona ia aiaina le tuto’atasi o le fofoga fetalai ma ona tiute tauave.
