O se finagalo lea ua faalauiloa o le Tautua Samoa i lana fonotaga faa le vaiaso ma Tusitala o le Atunuu.
O le alii Taitaifono le Tumau o le Vaega Faaupufai o Lealailepule Rimoni Aiafi lea na laga le mataupu e pei ona faaalia ai ua moomia e le Palemene o Samoa se Itu Agai malosi e fesagai ma le Itu a le Malo le Vaega Faaupufai e Puipuia Aia Tatau a Tagata, le HRPP ua tele tausaga o taitaia le atunuu i upufai o Malo.
Na taua e Lealailepule Rimoni ua maea ona fesootai ma le Vaega faaupufai o le Samoa Party lea e faauluulu iai le Afioga Sua Rimoni Ah Chong. O se vaega faaupufai e le o iai ni ona sui i totonu o le Palemene i le taimi nei ae ua faamautu aua sauniuniga o le Faigapalota tele o loo loma nei i le lua tausaga o lumanai. E le gata i lea o le Vaega Faaupufai a Tagata poo le People’s Party lea o loo faauluulu iai le Afioga Maposua Solomona Toailoa lea foi e le o iai ni ona sui ile Palemene i le taimi nei ae ua faaolioli atu mo le faigafilifiliga o le 2011.
Na faaalia e le Alii Palemia, o se tulaga lelei lea. “E leai lava ma se popole o le Malo i lea tulaga, aua o se mea talafeagai le iai o se Itu Agai malosi,” o se saunoaga lea a le Alii Palemia. Na faaauau lana faamatalaga ma faapea mai, e ao ina manatua o tofi nei e le mai i se tasi ae e mai i le Atua ma o lona talitonuga foi lea i tofiga o le HRPP.
E na o le Tautua Samoa lea o loo iai sui faipule e toa iva o le Palemene ia na faatulai ese e le Fofoga Fetalai ae o lea ua toe faatonu e le Faamasinoga le foi i le Palemene. O le vaiaso lenei o le a toe faaauau ai le Fono a le Palemene i Mulinuu ma e iloa a taeao le toe talia e le Fofoga Fetalai o le faaiuga lea ua faalauiloa a le Faamasinoga Maualuga pe o lea i le toe talia ai o i latou nei i totonu o le Maota.
I se faatalatalanoaga ua maea ma le Fofoga o le Maota, le Afioga Tolofuaivalelei Falemoe Leiataua na ia taua ai o loo agai pea lana faaiuga i Tulafono Tumau o le Maota.
O le aso la a taeao, Aso Gafua taimi Samoa o le a iloa ai poo le a le tulaga o le a oo iai sui a faipule nei. Na taua foi e le Alii Palemia ina ua maea le faaiuga a le Faamasinoga Maualuga e soloia ai poloaiga a le Fofoga Fetalai. O le a agai sao lava i le amataga o le fono o lenei vaiaso le Malo ina ia vaavaai loa i teuteuga o le Tulafono e taofi ai le faiga ua mafai ai ona “feoai solo sui a faipule faitogafiti”.
O i latou ia ua taua e le Alii Palemia e ofi atu i filifiliga a itumalo ina ia fai ma o latou sui i vaega faaupufai ua mautu i le Palemene poo sui tutoatasi foi, ae maea ane ua see i isi vaega faaupufai. E iloa foi i le aso a taeao poo le a tonu le faaiuga a le Fofoga Fetalai i lana folasaga na faalauiloa muamua e ono ave sui o le Tautua Samoa ia na le usitaia le poloaiga e tapu ai le toe ulufale atu i totonu o le Maota Fono ina ua maea ona faia iai poloaiga e lua ia ua faaleaogaina e le Faamasinoga.
Sa molimauina le faasa e sui o le Ofisa o le Fono o sui a faipule o le Tautua Samoa ao taumafai e ulufale i le fono. O se isi o faipule o lea vaega, Levaopolo na ia numinumi le pepa na lomia ai le faatonuga lea ua faasa ai le toe ulufale atu o sui a faipule ma tiai i ona tua ane. O ni faiga na taua e le Fofoga Fetalai ua solitulafono ma ua le usitaia ai poloaiga o le Maota. E manino uma i lenei vaiaso, pe e faataunuu ia folasaga, pe o le a usitaia foi e le Fofoga o le Maota faaiuga a le Faamasinoga Maualuga.
E lei faalauiloa mai foi e Lealailepule Rimoni poo le a se finagalo o isi vaega faaupufai nei ua taua mo se tuufaatasiga o se Itu Agai. Ona pau lana faamatalaga ua faalauiloa, o loo faagasolo feutanaiga e pei ona ia taua.
