Ua ave nei le lagolago a alii ma faipule o le afioaga o Satapuala i le puipuia o meatotino a se vaega o le fitafita a le Malo o Niu Sila o loo tolauapi i se vaega o le Malae Vaalele i Faleolo, ina ua gaoia ma toesea nisi o meatotino taua ma aoga a le fitafita.
E le o faailoaina mai e leoleo poo a ia meatotino ua gaoia sei vagana ai le faailoa mai ua iai nei se tiute faapitoa a leoleo ua vaaia le nofoaga o iai le togalauapi poo le camp site.
E lima vaiaso o loo faia ai faataitaiga a le fitafita e toa luaselau a Niu Sila i lo tatou atunuu mo le faia o faataitaiga o galuega laveai i taimi o faalavelave faafuasei ma mala faalenatura.
E toatolu ni alii talavou o Satapuala ua molia e leoleo i le aveesea o meatotino, ma o le vaiaso nei e tutulai ai i le faamasinoga e tali i moliaga.
E 4 vaalele helikopa a le fitafita o le laueleele ma taavale a le army o loo faaaoga ai i le faataitaiga, lea sa malaga mai ai le vaa lauoloa a le fitafita o le sami le HMNZS Canterbury e aumai i Samoa ia masini.
O le faataitaiga foi lea o loo auai ai ma se vaega o alii ma tamaitai leoleo o le tatou atunuu.
