E mautinoa, na faatoa atoatoa ona ausia sini o atinae a le Pasefika o loo uunaia ma solaupuleina ina ua talanoaina ai le mataupu o le “Sauaina o Tamaitai o le Pasefika.”
O le manatu lea sa faaalia e le faalapotopotoga a le Amnesty International.
Ua faaalia e lea faalapotopotoga ua agai tele le fonotaga a taitai o le Pasefika i le talanoaina o le atinae o le tamaoaiga, atoa ai ma isi mataupu fai soo, ae le silasila totoa i le afaina tele o aia tatau a tamaitai, e ala lea i sauaga.
O le ala lea o lo latou manatu, a le muamua ona tagai i le mataupu lenei o le sauaina o fafine ma tamaitai, e le mafai ona taunuu fuafuaga mo atinae o atunuu o le Pasefika.
O auala o loo sauaina ai fafine ma tamaitai, ua faapea foi ona faailoa e lea lava faalapotopotoga, ua faamaonia o le isi lea auala o loo matua fesoasoani tele mo le faasalalauina o le faamai o le AIDS poo le siama o le HIV, i le Pasefika atoa.
O le taitai o le vaega a le Amnesty International Pacific, Apolosi Bose sa ia faalauiloaina lea mataupu.
Ua faailoa foi e Apolosi, o nisi o atunuu o le Pasefika e le mafai ona puipuia aia tatau a fafine e aunoa ma se tulafono, ma ua mafai foi ona latou fausia se tulafono e puipuia ai tina mai le sauaina, peitai e le o lava le malosi o lea tulafono.
O atunuu e pei o Vanuatu, Papua Niu Kini (PNG), Solomona, Kilipati ma Fiti, lea e faatatau i ai le saunoaga a lea tamaitai.
Sa ia matua faamalosia i lana saunoaga le tatau i taitai o le Pasefika ona silasila totoa ma ave le faamuamua i le mataupu i tina, ma ua tatau lava ona gaoioi e faatino ma faamamalu auala e puipuia ai, a o lei oo ina matua malosi tele mai faiga saua ma oo atu ai i se tulaga ua faigata ona taofia.
O le taofia o sauaga ma faiga mataga i tamaitai ma tina, a ave i ai le faaaloalogia ma le faatauaina, o le tasi lea faiga ma se auala e mafai ai ona tafiesea ni mafatiaga ma ni faafitauli o loo tauavea e lea itupa.
E le gata foi i lea ae tatau ona silafia le tulai mai o ni tina e avea ma sui o le palemene i le tele o faiga malo i totonu lava o le Pasefika ma le lalolagi atoa. O le isi lea auala e mautinoa ai ma faamaonia le mau, ua matua alagatatu lava ona fai se fuafuaga a taitai o malo mo lea mataupu, ina ia aveesea ai le agaga faifai ma le tau mamaina o le itupa o tina.
Ua faamatuu ane foi e le tamaitai o Apolosi se fuainumera tusitsuia e ala i se suesuega sa fai e le Family Health & Safety ua faamaonia ai i le atunuu o Solomona lava ia, e tusa ma le toalua tina mai le toatolu, i le va o le 15 tausaga e oo atu i le 49 tausga le matutua, o loo aofia i ni sauaga mai o latou taitoalua poo le itupa o tama.
E le gata i sauaga o le fasi poo le faaoolima, ae faapea foi le faaoolima mataga e ala i feusuaiga fai faamalosi.
I totonu o Papua Niu Kini e tusa ma le 55% tina ua aafia i faiga aiga faamalosi.
O lea suesuega sa faatautaia lea e se tasi o aoga o le Institute of Medical mai le tausaga e 1994.
E tusa ma le 67 o tina sa faaoolima i ai i le tulaga o le fasi e o latou taitoalua.
O ia faamaumauga sa tuuina ane foi e le Law Reform Commission i le 1992.
O le toatele o tina na sauaina, sa faataunuuina e nisi e auai i totonu o kegi (gang rape). I Samoa, e tusa ai ma se lipoti mai le 2005 a le World Health Organization-Multi-Country Study, e tusa ma le 65% o tamaitai e amata mai le 15 tausaga faasolo i luga na sauaina, sa lipotia e isi tagata e ese mai i o latou taitoalua.
E 85% tina o lo mafatia pea i ni sauaga, ae le mafai ona tautino e i latou, ma agai atu e saili fesoasoani.
O nei fuainumera uma ma faamaumauga sa mafai ona faamauina i suesuega na faia mo atunuu uma o le Pasefika.
