Sa ou fesiligia le Minisita o le Matagaluega o le Soifua Maloloina pe aisea ua le talia ai fautuaga a le aufaigaluega a le matagaluega o le soifua maloloina i Manukau. Fai mai le aufaigaluega i Manukau afai ae tipi e le Malo tupe mo polokalame e fai ai siaki mo tagata mai suka, o le a faateleina tagata i Manukau o le a afaina i lea gasegase, ma le maua ise taimi vave ni togafitiga mo lea gasegase.
Na alo le Minisita mai le taliina o lea fesili.
Na sosoo isi au fesili na aliali ai lona sainia muamua o le faatonuga e tipi le $4.875 miliona mai tupe fuafua e faatupe ai le siaki o le gasegase suka i Manukau ona alu lea pue lona ata ma le aufaigaluega i Manukau ma ataata ai e pei e leai se mea o tupu aua o loo fiafia uma le matagaluega a le soifua maloloina e le o iloa fuafuaga a le alii minisita ua sauni e faatino . Na musu le alii minisita e tali le fesili aua ua aliali ai lona faagutugutulua i lona faafoliga o loo lagolago i le aufaigaluega i le tapue faatasi o lana ata ma le aufaigaluega, ao ia nana ana fuafuaga e tipi lenei vaega tupe tele mai i polokalame a le matagaluega o le soifua maloloina i Manukau.
Sa matua musu lava e tali ia fesili ma faamatala mafuaaga ua tipi ai le $4.875 miliona mai le pakeki a le matagaluega o le soifua maloloina i Manukau.
Ona sosoo lea ma le faalauiloaina e le Malo o lana polokalame fou mo le unaia o tamaiti aooga e auai i taloga. Sa tapue faatasi mai ata o le Palemia ma tamaiti aoga mai le aoga Bairds Mainfreight i Otara.
Faimai le Palemia e $82 miliona ua fuafua e tufa i aoga ma faalapotopotoga o taaloga ina ia galulue ai e unaia tamaiti ina ia auai i taaloga.
Ao lea ua manino, ua maua lea $82 miliona ona ua tipi foi e le Malo tupe sa masani ona maua e aoga mai pitonuu e vaivai le tamaoaiga e pei o aoga i Manukau mo le faatinoga o a latou polokalame taaloga.
Faimai le pule aoga o le Kolisi o Papatoetoe e $8000 ua aveese mai i le latou pakeki sa masani ona maua mai i le Malo mo polokalame o taaloga a tamaiti aoga.
O le kolisi o Tagaroa o Otara ua tipi e le malo le $7500, ao le Kolisi i Otahuhu ua tipi e le Malo le $6000.
Faimai le pule aoga o le Kolisi o Papatoetoe o le suiga ua iai nei tupe maua a aoga i Manukau, “ua gaoi mai e le Malo tupe mai aoga matitiva, ae foai mo aoga mauoa.”
E le gata i lea ao lenei ua aliali foi i isi vaega tupe ua faaitiitia e le Malo ina ia maua lava le $82 miliona mo le polokalame fou lea o taaloga ua latou fuafuaina. Ua aliali mai ua faaitiitia foi e le Malo tupe sa fuafua mo le matagaluega o le soifua maloloina e fesoasoani ai mo i latou e lapopoa ma ona maua i le gasegase suka, gasegase e mafua mai i le tapaa, ma le gasegase o le fatu.
E foliga mai ua aveeseina e le faigamalo a le National le tele o polokalame sa fesoasoani malosi i tagata lautele o loo afifio i pitonuu e vaivai le tamaoaiga, ae faaalu lenei tupe e faatino ai fuafuaga mo le lelei atili o i latou e mauoa ma malosi le tamaoaiga.
O gasegase e mafua ona o le lapoa, e pei o le gasegase o le suka, gasegase o le fatu, faapea gasegase e mafua ona o le tapaa, e toatele nisi o o tatou tagata o loo afaina ai.
A faaitiitia tupe mo ia polokalame, o lona uiga ua tuulafoai loa i latou ua afaina i nei gasegase ua le toe maua siaki o nei gasegase sa masani ai, ma e ono lamatia ai o latou soifua.
Ou te talitonu o le a tele le afaina o o tatou tagata talu ai polokiki leaga a le faigamalo lea ua amata ona aliae i ana fuafuaga ua agai nei iai.
Ia e taua le tatou galulue ina ia tausi le soifua maloloina lelei. Ia lelei mea taumafa ia tele fualaau aina e malosi ai le tino ma ia taumafai ia faaavanoa se taimi e fai ai faamalosi tino.
O le mafuaaga lea o lou faatauaina o polokalame faamalosi tino e pei o polokalame o loo faatinoina i le Maota o le Ekalesia AOG i Robertson Road i taeao o aso Toonai faapea afiafi o aso Gafua i Magele.
Ua tatau ona tatou tinou e auai i ni polokalame faapenei aua o lea ua manino mai i fuafuaga a le Malo, o le a tele se suiga i polokalame sa masani ona tatou maua e fesoasoani i le tausia o le soifua maloloina lelei.
