E eseese igoa o tapuaiga, eseese foi tupuaga o tamā ae o le tasi o le loto e tutusa ai tagata uma pe a faatino tiute ma faiva o le galuega a le Matai.
O le faatinoina o polokalame o le aso ua patino mo ulu o aiga poo tamā, e tele lava ekalesia na ave uma le faamuamua ia i latou i lo latou aso faapitoa.
O nisi sa feagai ma lauga, pese, faaevagelia aemaise molimau i uiga faaalia o tamā i totonu o ekalesia aemaise lava totonu o aiga. O se itu mata’ina i uiga mālie ma le faato’againa o le faatinoina o nei vaega uma i lenei aso, ua miliona i le tagataga’i a le aofia ma le aumaimoa.
E iai nisi o le itupa malosi poo tamā e seāseā ona miomiō i mea faapenei, e mate’ia gatā uiga lilo, peitai o aso faapitoa nei e fofola ai fala ma faaali taleni a Tamā e ta’u atu ai i le itupa vaivai, ioe e au foi le pitolaau a tamā. E tele ni tamā sa faasoa mai e pei ona fesiligia i tulaga o lenei Aso Sa, i le matagofie ma le onomea, agavaa, agamalie ma le faimea mafai o le itupa malosi, ua pine auro ai lava i latou i lenei aso faapitoa, lenei masina, lenei tausaga e olaola pea ma manatua i loto ma agaga.
A toe vili i tua le ata ma toe tomanatu i Samoa i nai o tatou tuaa, sa tuu uma le mamafa o feau i tina i tiute masani peitai o aso faapenei, e molimau ai lava le pateriaka ia, i lona fia soosoo tau’au e fesoasoani e faia foi galuega faatina, ae tainane la pe afai o se tamā e nofofale e lagona foi le fia fesoasoani e amo faatasi le avega ma tina. E iai le manatu, na mae’a atu le aso faapitoa mo tamā ae faamalieina uma tina i tiute ma tapenaga auā e moni o lo latou aso faapitoa, peitai na faaiila ai lava taleni pese, siva ma lauga a soo se Pateriaka.
Na maua se avanoa e fesootai atu ai foi i nisi o ta’ita’i o ekalesia ma sagisagi fiafia mai e ala i le viia o le Atua auā o ataata o taulelei ma manuia i totonu o soo se faalapotopotoga ona e felagolagoma’i le tina ma le tamā i le fatuaiga tausi, o se ata vaaia foi lea i le tutupu a’e o tamai olive ma avea o se faataitaiga i o latou foi aiga, pe a oo ina matutua ma aga atu i le olaga faatamā.
E iai foi le talitonuga e lē o iai se tamā o sauaina i totonu o se aiga, ae ia avea aso uma o le olaga e faatāua ai tamā, ae lē na’o le aso e patino mo latou. O soo se tamā foi, o ia lava o le ulu o se aiga.
Talitonu na manuia sauniga uma o le aso faapitoa o tamā i lenei tausaga, felanulanua’i taumafa i luga o la’o’ai, tele meaalofa o le Aso Faapitoa o Tamā i nisi ekalesia i Kuiniselani, ae maualuga le viiga o le Atua mo Tamā uma o Samoa ona o outou tiute faifai pea i aso uma.
