E ui o lea ua pasia e le Palemene le tulafono ua aloaia ai nei le avea o le gagana Samoa ma gagana aloaia a le atunuu ma ua faatūina ai foi ma le Komisi o le gagana Samoa, ae e eseese lagona faaalia o tagata i le mau e faamuamua le gagana a le atunuu i galuega fai a le Malo ma le aoaoina o fanau.
E manatu nisi e ao lava ona faamuamua pea le gagana Peretania i aoaoga mo fanau i aoga maualuluga ma iunivesite ona a oo ina sue se faailoga maualuga poo se isi lava faailoga ma tusipasi, e faamuamua lava le gagana Peretania.
Ua faaalia e se tasi o Tootoo o le aoaoina o le tatou gagana ma aganuu i le Iunivesite aoao a Samoa, ua faamalosia nei i soo se mataupu e aoaoina le sue o le pepa o le gagana Samoa ma le aganuu.
O lona uiga o se isi lea o laasaga e faailoa atu ai i le atunuu ma le lalolagi, o lea o loo tapue afifi lelei le gagana ma aganuu a Samoa e le Iunivesite aoao i ana aoaoga.
O atugaluga lava ona ua tele suiga ua aliali mai i le gagana Samoa i le tele o upu fou ma le tele o upu nono mai le gagana Peretania ua faaaogā e le toatele, ae o loo iai lava upu o le gagana Samoa e faaaogā.
O le gagana Samoa na faaliliu ai le Tusi Paia o loo lima taitaiina ai le Iunivesite aoao i le aoaoina o le tatou gagana.
