O le mae‘a o le fono a le Iuni Lakapi a Samoa i le faaiuga o le vaiaso na faalauiloa ai loa e le Taitaifono, le Alii Palemia foi lea suiga o le a iai le pulega o le Manu Samoa taitoafitu mo lenei taimi.
O le alii faiaoga o le Manu Samoa 7, Faamaoni Lalomilo lea ua foi mai i le atunuu ma le ‘au a le atunuu na tausinio i le taamilosaga Taitoafitu o le Lakapi a le Pulega o le Lakapi le IRB, ma ua tulaga fa (4) Samoa i le aotelega o lea taamilosaga.
O lea la ua sauni le Iuni Lakapi a Samoa e filifili lana ‘au mo le Ipu o le Lalolagi i lea lava taamilosaga o le lakapi i Moscow ma ua manao le Iuni e faatamoe loa se polokalame e ala i le vave fili o le ‘au ma le avane o se faiaoga fou o le ‘au.
O le alii o Stephen Betham lea ua faiaoga i le Manu Samoa tele le ‘au taitoa 15 a le atunuu ae o lea ua toe tofia na te faatautaia sauniuniga a le ‘au taitoa 7 “i lenei taimi ae se‘i tau saili se faiaoga mo le tausaga fou”.
E mae‘a lelei lava le faatalatalanoaga a le Alii Palemia i luga o le TV One, e leai ma se ta‘ua o le suafa o le susuga Lalomilo le faiaoga lea na faatoa foi mai ma le ‘au taitoa 7 ma o se faailo lava lea o le faaiuga ua faia e le Iuni Lakapi – ua lē toe aofia lea faiaoga i sauniuniga a le Taitoafitu.
“Manatua foi o Betham e na o Betham lava lea na aumaia le siamupini o le taitoafitu a le Lalolagi i Samoa,” o se saunoaga lea a le Taitaifono. O lea e i le tulaga fa (4) Samoa i le taamilosaga lea a le IRB ma o ‘au e pei o Kenya ma Sikotilani e fetaui muamua lava ma le ‘au a Samoa, o le finagalo la o le Taitaifono ma le Iuni, e tatau ona lava le sauniuniga ma e tatau lava ona taumafai Samoa e foi mai ma le Ipu o lea taamilosaga i le masina o Iuni.
Ta‘ua e le Taitaifono e lē umi se taimi o lenei sauniuniga ma ua mafua ai lava le manatu e tatau loa ona faatopetope le filifiliga ae na ia faaalia foi e lava lava le taimi o Betham e faatino ai sauniga a le ‘au a le atunuu i le taitoa 7 ona toe foi lea e unai sauniuniga o le ‘au taitoa 15 a o lei oo i le latou taamilosaga o Aferika i Saute lea ua amata ona faatamoe.
