Eli se lua i totonu o le sela e sosola ese ai ma le falepuipui

O vaaiga i nisi o ata tifaga i le olaga o pagota i atunuu tetele e pei o Amelika, ua sosolo ma pisia ai mafaufau o nisi o alii pagota i le atunuu o loo tuli faasalaga, e pei ona ioe ni alii pagota talavou se toalua i lo la eliina o se lua i totonu o le sela numera lua i le toese i Tafaigata ma le faamoemoe e sosola ese ai ma le nofoaga o loo tuli ai faasalaga.

O Filiki Iki, ma Faigame Toelau faapea le alii o Ta‘ai Togia ua silia i le sefulu tausaga o nofo sala ona o le mau solitulafono e fesootai ma le talepe fale ma le gaoi. Faaalia e leoleo o le aso fitu o le masina nei o Aperila na maua ai e leoleo se lua i totonu o le sela, lea na mafai ona eli ina ia vavane e ia alii pagota se piliki ma saofia ai le eliina o le lua.

E le o faamatalaina e leoleo pe fia le loloto ae fia lona lautele. Peitai ua faaalia e leoleo o se lua e ofi lelei ai se tagata. Faaalia e leoleo sa fai ma nana e nei alii pagota le vaipanoa o le sela sa fai ai le latou galuega, ae na maua taitaia lea ua molia ai. E na o le toalua pagota na tutulai i le vaiaso nei o Filiki ma Faigame ma ua la ioeina le solitulafono.

E lei oo atu le isi pagota le alii o Ta‘ai, ona e faapea e lei vaaia i le potu faamasino i le taimi na valaau ai le mataupu, ma o Iuni i le aso 25 o le a lau ai se iuga o alii pagota e toalua ua tautino i lo la faia o lea gaioiga.

 

Faia suesuega ile pepesi o le five taifoi ile falepuipui Tafaigata

O loo faia galuega e faamamā ai le falepuipui i Tafaigata ina ua faamaonia e toasefulu ni alii pagota ua aafia i siama o le fiva taifoi e mafua mai i le lē mama o vaega e saunia ai taumafa, o faleese ma fale taele faapea ma siama e feaveai e se isi tagata o aafia i lea gasegase o le fiva taifoi.

Ua faaalia e le alii fomai o Leausa Toleafoa Dr Naseri, i se lipoti anapo i se tasi o televise i le atunuu TV1, ua faia nei se suesuega i le sailia poo fea tonu na auala atu ai siama o le gasegase i le falepuipui i Tafaigata.

O le vaega muamua ua mautinoa le faaletonu o le suavai taumafa mama o loo faaaogaina e pagota, lea ua fautuaina ai le Komesina ma le Minisita o le matagaluega o leoleo ma falepuipui ina ia vave fai se togafiti e ala i le logoina o le pulega o le suavai le Samoa Water Authority.

O loo silasila foi le suesuega i le vaega o loo gasese ai taumafa a pagota faapea totonu o potu o loo nonofo ai, i le tulaga i faleui ma fale taele ona o isi vaega e mafai ona mafua ai le gasegase.

O le tumutumu o potu i le oo i le tai 10 ma le 20 pagota e nonofo ai, ua faaalia e le alii fomai ua faia foi se latou fautuaga i le minisita ma le komesina o leoleo, ma ua logo atu o le a toe fausia nisi potu faaopoopo e tatala i ai ona o le isi foi lea mafuaaga o le fiva taifoi o le vave pipisi pe a toatele naunau tagata e faamautu i se potu e tasi.

E le o aafia se pagota tamaitai i le fiva taifoi ma o le itu lea o loo faafiafiaina ai le suesuega ona o le fia puipui i nisi o faanau iti o loo nonofo ma o latou tina i le falepuipui ona o faasalaga o loo tuli.