‘Faataua le sao mafutaga a Tina & Talavou o le ekalesia’
Ua oo foi i taimi o le tausaga e vaaia ai le tele o faatasitasiga e faia. O faauuga ma laugatogi a fanau mai aoaoga.
O faatasiga poo pati e faaiu aloaia ai galuega o le 2009, ae o se faafetai faapitoa foi mai pulega o kamupani ma matagaluega, i se auaunaga sa faatino e le aufaigaluega i lenei tausaga atoa.
E foliga o le agaga foi lea o loo iai i nisi o ekalesia, o le fia faaali o se faafetai ma se faamalo i vaega eseese o le tino o le ekalesia, e pei ona iai le mafutaga a tinā, o le vaega foi o tamā, aemaise le galuega mamafa e masani ona faatino e le autalavou i le tausaga atoa.
O taimi e avatu ai se faafetai, ae e pei ona iai le faamoemoe o le Ekalesia a le Samoa Minisitry of Christ i Magele i le afiafi o le Aso Faraile na mavae atu nei, o se toe faaolaolaina atili o le soifua tapuai o le ekalesia, ina ia tupu pea ma mumū le lamepa o le ola tapuai faapaoni ma ia tapuai saoloto i le Atua.
Sa lagonaina le fiafia ma le mafuta faatasi o tina o le ekalesia i lea afiafi, e le gata i le fiafia i le itu i le tino, a o le faaleagaga e pei ona ave i ai le faamamafa.
E lua aso sa faagasolo ai lea faamoemoe o le ekalesia, e pei ona tamua i le mafutaga a tina i le afiafi o le Aso Faraile, ae o le vaega a talavou i le Aso Toonai. I se faamatalaga na tuuina mai e le susuga i le faafeagaiga o loo taitaia le ekalesia, Rev Pe‘a Poe, na ia otooto mai ai nisi o vaega iloga o lenei ekalesia fou.
O le uluai Aso Sa lava o le masina o Fepuari i le tausaga e 2008, na muai faatino ai le uluai sauniga lotu ma amatalia aloaia ai loa le Ekalesia Samoa Minisitry of Christ.
O le susuga lava foi ia Pe‘a ma le faletua ia Sieni Poe, o i laua lava na amataina lenei ekalesia.
E na o le tolu matafale na amata mai ai, ae o se fiafiaga lea e pei ona saunoa i ai le susuga a le faafeagaiga, o le taimi nei, ua toa 15 matafale o le ekalesia. Lona uiga o loo tupu ma olaola le galuega.
Saunoa Rev Poe, o lana ekalesia e ave le faataua i le ola saoloto ma le ola fiafia o le tagata e fai lana tapuaiga, e aunoa ma le tele o mea e lavelave ma avea ma avega mamafa, ua faafaigata ai ona tapuai fiafia le tagata i le Atua. Na o le lua lava vaega e faataua e lenei ekalesia, o le sefuluai ma le taulaga e fai mai le lotomalie e ave mo le Atua. Na saunoa Poe, ua talitonu i le moni o le faatinoga o na foai e aunoa ma se faatauanau ma se fosi, aua e lei atoa lelei le lua tausaga o le galuega, ae ua iai le van a le aulotu, ma o loo lava ma totoe le seleni mo mea totogi aua le faatinoga o le galuega e pei ona iai le totogi o le hall o loo fai ai a latou sauniga.
Latou te valaaulia foi soo se tasi e fia auai ma faalogologo ia latou sauniga lotu, o loo tatala i ai le avanoa e asiasi atu i soo se taimi.
Faamatalaga na tuuina mai
