Taoto ia ou paia Samoa o oe o le ao mamala. Ae avea lenei avanoa e faafeiloai atu ai i le agaga faaaloalo e ala i le suafa o Keriso lo tatou Faaola.
E iai le agaga maualuga o loo e manuia i le agalelei mai pea o le Atua i aso taitasi.
Tatou te faafetaia o ia ma viia pea o ia i mea uma.
Ua amata lenei tausaga fou ma ua laasia lona lua o masina ma ua iai foi le manatu ina ia mafai ona faasoa atu ni nai motugaafa faaleagaga e fesoasoani i lo tatou ola tapuai i le Atua aemaise ai o le ola taumafai mo ia i aso uma.
Ina ua amataina le polokalame i luga o le Radio Samoa e ta‘ua o le “E afua mai mauga le manuia o le nuu”, sa faapea ona toatele i latou sa mafai ona talanoa mai ma faasoa mai foi nisi o vaega o loo aafia ai faapotopotoga ma ekalesia e fia maua i ai se fesoasoani.
E faafetaia le Atua ona o se avanoa e faasoa atu ai aemaise o le tufa mai foi, o auauna a le Atua ma taitai o ekalesia.
O le agaga moni, e lē o inei se atoatoa ae o ni nai vaivaiga e manatu lo‘u nei tagata o le a avea o se fesoasoani faalēlava ina ia faamalosia ai le galuega faataitai ma ia malosi ekalesia Kerisiano o tatou galulue ma tapuai ai.
O le faamoemoe la ma le auga o lenei tusitusiga o le agai i vaega tāua e ao ona mataituina e taitai o ekalesia ina ia malosi ma lelei le taitaiga o le lafu mamoe a le Atua.
E lē faapito i susuga i faafegaiga, tulou o outou paia. E lē iai se agaga e faatonu.
E lē a‘oa‘ia foi e laupua tamafaiga. Afai e iai se lelei, taofi, a leai, ia lafoai.
Atonu e iai foi se taimi e feteenai ai ni lagona, i lou finagalo ma so‘u taofi, ae iai le agaga maualalo o le a lē afaina lea. Ae aogā foi lou faailoa mai ma tufa mai auā e pei lava ona tatou talitonu, “O le uta a le poto e fetalai”.
Samoa, o le lagona lena e fia tufa atu ae fesoasoani mai le Atua ina ia faaaogāina mataitusi, o uiga o upu ma faamatalaga, o taiala ma fuafuaga ma faaupuga aemaise o le Upu a le Atua e taitaiina ai manatu ma lagona o le tusitala.
O mataupu o le a talanoaina i lenei tusitusiga o ni vaega e masani ona fesiligia ai a‘u e nisi o taitai poo susuga foi i faafeagaiga.
O nisi o fesili ma mataupu e masani ona talanoaina i totonu o mafutaga a faifeau e masani ona ou auai.
O nisi foi o mataupu o ni vaega ua a‘oa‘oina ai lo‘u nei tagata e ala i ni mea na tutupu poo lesona a‘oa‘oina a o taumafai e taitaia le galuega a le Atua.
O nisi nei o mataupu o le a agai i ai le talanoaga i lenei tusitusiga i vaiaso o i luma, ma le faalagolago atu foi i le aufaitau e fesoasoani mai ma faasoa mai i nisi o mataupu e silafia e aogā mo i tatou uma.
Mataupu:
1. Filifilia o Taitai ma Tofi
E faapefea ona filifili taitai i totonu o le ekalesia? E tatau ona faia se palota pe tofi mai e le faifeau? Ua toatele ni ekalesia e misa ma faaisaisa ona o le lē fiafia i le faaiuga o le palota, ma ua avea lea ma auala ua lē maua ai se lagona lelei i tagata lotu ma avea foi ma ala ua faamavae ai nisi mai le ekalesia.
2. Tupulaga Talavou ua lē toe Omai i le Lotu
O se tasi nei o mataupu e tele ina fesili ai le toatele o faifeau ma mātua, ona e tea loa le tausaga o le ola aoga Aso Sa o le tamaitiiti ma oo atu i univesite pe faigaluega foi, amata loa ona lē toe vaaia i totonu o le falesa. O le fesili tele e tulai mai, Aisea ua lē fiafia ai le tupulaga talavou i le lotu? O le ā se mea e ao ona faia e le faifeau ma le ekalesia ina ia faatumauina ai le fiafia o le tupulaga i le lotu.
3. Saoga Tupe ma Sailiga Tupe
O fea e tusi ai le laina o le ola foai i le Atua ma le tele o sailiga tupe i totonu o le lotu? E toatele nisi o tagata lolotu ua oi ma fiu i le tele o meafai i totonu o le lotu. Ua faamalosia i nisi ekalesia e faapea e iloa le moni o le faatuatua i le toaga e lafo tupe ma fai meafai. A lē foai foi ona o le lē tagolima, ua faitio foi nisi faapea o le lē faamaoni ma lē faiekalesia. O se tasi lea o mataupu e fai foi sina ogaoga i totonu o le ekalesia. E lē o po se lilo ua tele foi ekalesia ua malepe lava ona o le tupe.
4. O le Faifeau
O nisi o tagata lotu e matuā mapo faifeau pe tausi faifeau. E tele le faaeaea i le auauna a le Atua. E lē gata i faamatalaga a o faaaloaloga i taumafa, tupe, taavale, fale ma isi tulaga faapena. E ui o loo lagi e Samoa le aufaigaluega a le Atua o “Ao Faalupega”, ae o le fesili, o fea o iai le tuaoi o le faaeaea, o le ola lelei o le faifeau pe a faatusa i le oi ma le lē tagolima o le ekalesia? Ae o le isi itu, o nisi o faifeau ua taunuu ai lava le muāgagana a Samoa, o loo “faafaletuluia ma fale le malu”. O nisi o ekalesia ua faaleano ma lē amanaia tele le tautiga o le faifeau, i le mativa ma le lē tagolima e mafua ai foi ona toe alu le faifeau e faigaluega e tausi ai lona aiga. O le ā se fesoasoani i lenei tulaga?
5. Ua fia Minoi i Luma le Ekalesia ae Faigata lava le Au Matutua
O le lagona taatele lea i nisi o tagata lotu i le va o le 30-40 tausaga le matutua aemaise i latou na soifua i lenei atunuu pe ua lē lelei tele foi le faasamoa. Ua fia vaai i ni suiga fou, peitai e tautu lava le au matutua i le mea na sau ai le lotu ma faavae mai ai i tausaga ua mavae. O se tasi lea o vaega faigata tele i le ta‘ita‘i poo le faifeau, o le taumafai e faamalie itu uma. O le ā se mea e tatau ona fai?
O nisi nei o nai vaega o le a agai i ai le tatou talatalanoaga ma lenei tusitusiga i vaiaso taitasi.
E iai le talitonuga o le a faapea ona tatou talatalanoa i luga o lenei nusipepa, ma ia fesoasoani mai le Atua e avea ni vaivaiga o lenei itulau e faatupu manatu, ae sili ai o le maua o se fesoasoani ina ia manuia tatou ekalesia, malosi tatou ta‘ita‘i faaleagaga, fiafia uma le ekalesia ma tele ai agaga e manumaloina mo le Atua ma lona malo.
Ia faamanuia le Atua ia te oe.
Soifua ona o Keriso
