Ua lomia (publish) i le NZ Medical Journal se Pepa faapitoa e faasino i le vave aafia o alii fusu Pasefika i le faama’i o le Dementia. O le faama’i lea e galo ai i le tagata lona olaga ma mea na tutupu (memory loss).
O lenei Pepa ua faasino faapitoa i le sootaga o le taaloga o Fusuaga (Boxing) ma lenei faama’i matuia. O le auga o le ripoti, o alii Pasefika e taaalo i le taaloga e vave maua i latou i le faama’i e amata atu i le 46 tausaga le matua i le 71 tausaga.
O lenei lipoti na faavae mai lea i le faaiuga o nei suesuega na faia i ni alii fusu se to’avalu na togafitia i le maota gasegase o Middlemore.
O le Pepa na tusia e Drs Vahid Payman ma Susan Yates o foma’i e galulue i Middlemore. Na amata la sailiiliga ina ua asia e alii fusu ia e to’avalu le falemai e saili togafiti i ai, ina ua galogalo mea, ua o latou lē manatua igoa o uo ma aiga, o fuainumera ma aso, aemaise mea na latou faia i aso e lei mamao atu.
O le to’avalu lenei na saili togafiti i le taimi e tasi i le va o le 45-masina. E ono alii Samoa ae to’alua alii Tonga. Na maua e fomai e tutusa aafiaga o nei alii, ma e tutusa foi le taaloga na taalo ai a’o talavaou, o le taaloga o le faipelega poo le fusu. Na vaai toto’a ai loa fomai i le sootaga o le loto galo ma alii Pasefika e taalo i le taaloga o le faipele.
E lē na’o le taaloga ma tagatānuu le sootaga o alii nei. E to’afitu e inu ‘ava. O le toatele foi o nei alii e sauā tele i o latou aiga o nisi e fasi avā. E to’aono e nonofo i Otara ma Mangere i Aukilani i Saute.
Na ripotia i le Pepa o tagata Pasefika e fiafia i le taaloga Fusu e masani ona omai mai aiga faato’a taunuu i Niu Sila (NZ).
E pei o le taaloga lea e fiafia i ai i latou faato’a taunuu i se atunuu fou. E lē na’o NZ e patino i ai lenei amio e faapea foi i Amerika ma Peretania. Ua avea le faipele o se aga e vave ai ona mafana ma lelei le nofoia i nuu ma aai fou.
O le auga o le ripoti ina ia malamalama tagata i le faamatalaga o le ma’i i tagata Pasefika na taaalo faipele ma metotia e togafitia ai lenei gasegase.
O le Dementia e lē patino na’o tagata Pasefika. E taatele le faama’i ae amata ona aafia ai tagata pe a oo atu i le 70 tausaga agai luga le matutua.
Peitai, o alii uma nei e to’avalu e amata maua i latou i le gasegase e lei atoa le ta’i 60 tausaga. O lona uiga e iai le sootaga o le vave maua i le Dementia poo le galogalo o mea, ma le taaloga Fusu.
O le aafiaga e patino i le taaloga Fusu e iai ma le sootaga ma i latou e afaina ulu (head) i le tulaga ua ta’ua o le Chronic Traumatic Encephalopathy.
O le faaletonu lea e tutusa ma le tu’ioti, e matuā matapogia ai le tagata ua afaina, ma pa’u ai i lalo.
O le aafia soo o le ulu (head) i ia faaletonu na aafia ai le alii fusu o Mohammed Ali i auga o le Dementia e iai le Alzeimers ma le faama’i o le Parkinson’s na maliu ai Ali.
Ae e lē na’o le Fusuaga e patino i ai lenei faaletonu ae ua afaina ai ma alii e taalo i le Lakapi Amerika (American Football), Lakapi Iuni ma le Lakapi Liki.
