Faletua ia Juliana Taoai ma lana fanau faaleagaga i le pese na momoli ai a latou alofaaga

Iosua 1:9 – Ou te lei fai atu ea ia te oe? Ia e faamalosi, ma loto tele, aua e te fefe, aua e te matau aua o Ieova lou Atua o loo ia te oe i mea uma e te alu iai.

I totonu o le 42 tausaga na avea ai le susuga i le faafeagaiga ia Rev Seleni Taumailona Namulauulu Taoai ma faifeau o le galuega a le Atua i totonu o le ekalesia Otara Samoan Assembly of God, o le lu’itau lea ma le faamalosiau mai le Atua sa fai ma taiala i lana auaunaga i le Atua a’o iai i le tausiaina o le lafu mamoe a le Atua i Otara. E lei tuulafoaiina e le Atua lana auauna mai i le tausaga e 1977 na uluai faavaeina ai le ekalesia ma resitalaina aloaia le galuega seia oo mai i le taimi nei na valaauina ai loa e le Atua le soifua galue o lana auauna ae faatasi atu ma lona Matai i lona malo.

Na ia tau le taua lelei ma ua iu foi ia te ia le tausinioga, ua ou taofi i le upu o le faatuatua. O lenei ua ou teuina mo a’u le pale o le amiotonu, ma valaau mai lona Matai, Le auauna lelei ma le faamaoni ina ulufale mai ia i le fiafia o lou Alii. O lē ua manumalo ou te avatua ia te ia ma te nonofo faatasi ma a’u i lo’u nofoalii, e pei foi o a’u na ou manumalo ua ma nonofo faatasi ma lo’u Tamā i lona nofoalii.

O le taeao o le Aso Faraile 8 o Mati na faamanavaina ai e le Atua galuega a lana auauna ia Rev Seleni Taumailona Namulauulu Taoai ina ua mae’a le mafutaga tatalo a lana ekalesia i Otara Samoan Assembly of God i le taeao lava lea. O le mae’a o le fonotatalo i lea taeao, na tuua ai loa e le faifeau ma lona faletua ia Juliana Taoai le mafutaga ae agai atu e fai togafitiga masani a le tamā faifeau e pei ona masani ai.

Peitai o le iai i luga o le ala na faalogoina ai e le faifeau se lagona ese i lona tino ma ia fai ane loa i lona faletua ua vevela lona tino, ona fai atu lea i ai o Juliana e tatala lona ofu e faaalu se savili i lona tino. Na maua le avanoa e faatafa ai le tavale i tua, ma taumafai loa le faletua ia Juliana e tatala lona ofu, ma e pa’i atu le faletua i lona fatafata ua leva ona afu malulu le tino o le susuga i le faafeagaiga. Na pau le tala na ia fai ane ia te ia, sorry ona ia taoto lea i tua o le nofoa ma moeiini filemu atu ai ona mata.

Na taumafai le faletua i togafitiga fesoasoani mo le tamā ma taumafai e vili le ambulance mo se fesoasoani faanatinati. Peitai e lei tuai le taunuu atu o le tavale (ambulance) mo se galuega fesoasoani, ae pagā lea e oo atu le fesoasoani ua amia lava e le Atua lana auauna. Pei ona saunoa le faletua ia Juliana Taoai, o le faamalosi mulimuli a le toeaina i lana fanau faaleagaga i le po o le Aso Tofi na fai ai a latou sauniga, na ia talanoa ai e faapea ia faaeteete outou ia e o i luga o le facebook i mea tou te tuuina i luga o le facebook, leaga e lē lelei le mea lea e o ai outou ae iloa uma e isi tagata mea tou te talanoa ai, o lana faamalosi mulimuli lea i lana fanau ma le lilo i manatu ma lagona o le a ia tuua le mafutaga ma lana ekalesia.

O le po o le Aso Sa 17 o Mati na amata ai sauniga o le susuga i le faafeagaiga ia Rev Seleni Taumailona Namulauulu Taoai i lona malumalu i Otara, ae sa faapitoa lea sauniga i le po muamua mo lana fanau faaleagaga poo lana ekalesia i Otara faatasi ai ma nisi o tamafanau a le ekalesia ua mafai ona galulue i isi tovine o lea ua faapitoa i ai le po lea mo i latou e fai a latou molimau e tusa ai ma le mafutaga ma le tamā faaleagaga.

O le po o le Aso Gafua na faapitoa lea mo le aufaigaluega uma a le Atua (faifeau) ma o latou faletua i totonu o le matagaluega a le Samoan Assembly of God i Niu Sila atoa e tusa ai ma le latou mafutaga faafaifeau i totonu o le galuega a le Atua. O le po o le Aso Lua na faia ai loa le sauniga faaleaiga faalauaitele mo le mamalu o le atunuu aemaise i aiga uma o le faifeau, ma o lea sauniga na taitai ai le susuga i le faafeagaiga ia Peter Finau, ae o le susuga ia Pastor Terry Saipani sa faafeiloaia le mamalu o le auvalaaulia. O molimau o lea afiafi na faapitoa lea i fanau a le susuga i le faafeagaiga, o fanau o fanau a le faifeau faapea ma o laua aiga, ona taualuga lea i le mānavaina o le upu a le Atua e le susuga i le faafeagaiga ia Pastor Kiki Taulapapa.

O le taeao o le Aso Lulu na faataunuuina ai loa lona toe sauniga mulimuli i lona malumalu i Otara, ma sa vaaia ai le toe faatumulia o le malumalu i susuga i faafeagaiga ma o latou faletua o uo ma ē masani ae faapea foi i aiganalua na agai atu ma molimauina galuega lelei a lenei auauna a’o lei malaga e faatasi atu ma lona Matai.

O molimau maumaututu o le aso na fofogaina lea e le faletua ia Juliana Taoai na ia faamatalaina ai le tele ma le tāua o le laua mafutaga ma lenei tamā. O le tamā e toaga e tatalo, e talanoa ma faasoa ma fautua lelei i mea e lelei ai le galuega a le Atua, aemaise o la laua mafutaga. 

O le auauna e tautala sa’o ma talanoa sa’o i le tagata ona o lona naunautaiga ina ia aua ne’i faaletonu le olaga o le tagata i luma o le Atua, ma faaiu ai loa le molimau a le faletua i le pese a le fanau faaleagaga a le faifeau. O nisi o molimau na fofogaina lea e le susuga i le taitai aoao o le ekalesia Samoan Assembly of God i Niu Sila ia Rev Tafunai Muaiava ma le susuga i le faafeagaiga ia Rev Motu Matia, ma faaiu ai polokalame o le aso i le laugaina o le upu a le Atua e le susuga i le faafeagaiga mai Smaoa ia Tavita Pagaialii o le taitai foi lea o le Samoan Assembly of God i Samoa ma molimoli atu ai loa lona sa i le fanuatanu i Manukau.

Soifua galue o le susuga ia Rev Seleni Taoai i le galuega a le Atua i Niu Sila

O le molimau a le susuga i le faafeagaiga ia Motu Matia o le tausaga 1965 na malaga mai ai i Niu Sila nei ma feiloai ai ma le susuga ia Seleni Taoai a’o lotu Seleni i le ekalesia PIPC. I le laua feiloaiga lea na fesili ai ia Seleni poo iai se latou lotu iinei, ae tali Seleni e leai se lotu na’o le pau lea o le ekalesia o loo agai mai tagata ma lolotu ai.

Ona ia talanoa lea ia Seleni ua tatau ona o e faatu se lotu e lolotu ai ma galulue ai ona o lona vaai mamao mo nisi tagata Samoa e agai mai i le lumanai. Ma sa faapea ona ioe iai Seleni i lea tonu. I le tau amataina o se lotu i lea vaitaimi na amata i le fai o tala’iga i aso Toonai uma ma fai anapogi, alu a’i alu a’i ua amata ona tupu ma ola le mafutaga ma ua iai foi pitonuu o Aukilani ua manaomia ai ona faatu ni ekalesia, ma o lea sa amata ai loa ona galulue i nei galuega.

O le ekalesia Samoan Assembly of God i Otara o le ekalesia lona tolu lea sa faatuina talu ona faavaeina mai ekalesia, ae sa amata i mafutaga tatalo ma tala’iga, ae o le susuga lava ia Seleni Taoai sa ia faavaeina lea galuega faatasi ai ma nai aiga e toalima i le toaono.

O le 1977, na aloaia ai loa le tatalaina o le lotu ina ua mae’a ona resitalaina faaletulafono le ekalesia ae o le taimi foi lea ua silia i le sefulu aiga lotu ua iai. Tausaga 2017 na faamanatuina ai le 40 tausaga talu ona faavaeina mai le ekalesia, ma e oo mai i le tausaga nei ua atoa iai le 42 tausaga o le lotu ae valaauina loa e le Atua lana auauna ia Rev Seleni Taoai, ina ua 75 tausaga le matua o lona soifua. O se auauna e malosi i le tatalo, auā o lana ia lea molimau e tupu ma malosi le galuega a le Atua ma aiga o le tatalo. I totonu o le aiga, o taimi uma lava e tatalo ai le tamā e lē ma’umauina se taimi ae lē tatalo, e oo foi i totonu o le ekalesia e faamalosia lava e le toeaina le olaga tatalo o tagata lolotu.

O nisi o taimi ua pei lava e lē o se faifeau, e savali ma siaki uma mea i totonu o le falesa poo lelei, e amata mai i le umukuka, faasolo ane i falelēta’ua (tulou) o fafo i le mea e paka ai taavale e siaki taavale poo lelei pepa ona sau lea ma talanoa i lana aulotu e toe siaki vaega ia poo lelei aemaise lava i taavale a aiga.

O lona lagona alofa i lana fanau faaleagaga ina ia aua ne’i faaletonu mea e nonofo ma galulue ai le fanau a le Atua. O le auauna e faamuamua le Atua, sosoo ma le ekalesia ae mulimuli lona aiga. E tutusa uma ia te ia tagata lolotu ma tagata o isi ekalesia pe a oo ina tauaofia le matagaluega atoa.

O le toatele o tamafanau o le ekalesia e faafailele e le tama o latou olaga faaleagaga, e lē manao le tamā e taofiofi i le ekalesia, ae o lona manao ia fai ae o e galulue i nisi galuega ua manao le Atua e galulue ai. Ua iai ekalesia ua faatuina i nisi o nofoaga i Aukilani sa fofoa ma fanau atu i le galuega lenei i Otara i lalo o le taitaiga a le susuga i le faafeagaiga ia Rev Seleni Taoai ma lona faletua ia Juliana Taoai, ua iai foi nisi ua malaga i Ausetalia ua galulue ai ae o loo susue lava le faamalama ma vaavaai mai i le tupuaga ma le faasinomaga na faafailele ai le olaga faaleagaga.

Ma o nei galuega lelei uma a le tamā, ua tautala mai i le taimi nei ina ua valaau lona Matai a’o lea ua mautu le nofoaga le malu e tuu ai le atolaau a le Atua. Ma o le taimi foi o ona sauniga mulimuli na vaaia ai le toatele o nei tamafanau sa malaga mai ma molimauina ona toe sauniga. 

E tuumalo le susuga i le faafeagaiga o loo avea nei ma toeaina o le matagaluega a le ekalesia Samoan Assembly of God i Niu Sila, e toavalu o laua alo ae o loo galulue uma i le galuega a le Atua.

E momoli atu ai foi faamafanafana ma faamaisega a le pulega o le Samoa Times i le faletua ia Juliana Taoai ma le nofoaalo faapea le ekalesia i Otara Samoan Assembly of God e pele i le loto o le faafeagaiga, ona o le valaau paia a le Atua i lana auauna. Amuia ē faanoanoa auā e faamafanafanaina i latou.