E Uma Lakapi ae Tumau pea le Tausiga o o Tatou Aiga

O le taunuu mai o le aulakapi a le Manu Samoa i le po o le Aso Tofi o le vaiaso ua tea na mautinoa ai ia te au e lē toe sao se mataupu tau polokiki i le tatou Atunuu. E matautia le tumu o le mamalu o le tatou Atunuu sa faatalia le Manu Samoa. Ua faamaonia i faamaumauga a le Ofisa o Leoleo faapea foi tala a le autusitala ma le aufaasalalau tala, na silia ma le 2000 le aofai o tagata sa auai i le faataliga o le Manu Samoa i lea po. E maofa le toatele o papalagi i le maitauina e lē gata i tupulaga, a o tamaiti laiti, o latou mātua, o fafine, o tamaloloa, o tagata matutua, e oo lava i le aufaigaluega paia a le Atua, sa auai uma i le faataliga o le ‘au a le Manu Samoa.

E pei lava ua manumalo le Manu Samoa i le Ipu o le lalolagi i le lakapi talu ai le tumutumu o tagata sa auai i lea po. E fai o teuga a tagata ua teu ai le toatele i ofu lakapi o le Manu Samoa, ae o le tele o taavale ua teuteu i le tagavai a le tatou Atunuu. Ou te manatu e maeu lava lenei aulakapi o le Manu Samoa, e ese mai lava i lo se isi lava aulakapi o le lalolagi, seia vaganā ai foi Toga ma Fiti. Poo fea lava le atunuu o le lalolagi e malaga i ai le Manu Samoa mo se taaloga, afai lava o loo tumutumu ai ma afifio ai le tatou Atunuu, e lē mafai lava ona tuu lafoai lenei ‘au.

Poo le ā lava le faigata, poo timuga, le mālūlū poo le mamao foi, e lē mafai lava ona tatou taofia le agaga o le fia faatasi atu i ai, tapuai, lagolago, ma momoli foi talosaga faapitoa lava mo lenei ‘au.

Aisea lava? Ou te talitonu ona o le agaga alofa i tama o le tatou ‘au. Ona o loo latou tauaveina le igoa o Samoa o se Atunuu na fananau mai ai, pe na fananau mai ai foi tatou mātua ma tuaa. Ou te talitonu foi, ona o le agaga faapea a tuu lava i le loloto o le aganuu, o Samoa o se aiga lava e tasi, ma e tau uma i ai i tama taaalo. Ia o le pine, e ta‘u loa se igoa o se tama taalo, o le fesili muamua lava o ai ni ona mātua? O fea le alaalafaga o lona aiga? E tala tala lava le gafa, tau ane i ai i le fesootaiga, maua le iuga, se o tama o si o‘u kei!

O le mea lea e momoli atu ai la‘u faafetai faapitoa i le tatou Atunuu o loo afifio i Niu Sila nei. Faafetai i lo outou alolofa ma le lagolago malosi i taumafaiga o loo taumafai ai nei le aulakapi a le Manu Samoa. E ui lava ua fia tausaga o tatou aumau i Niu Sila nei, ma ua avea lava Niu Sila ma o tatou Atunuu moni, ae e lē o mafai lava ona faagalo le Atunuu na tatou tupuga mai ai.

Ou te faafetai foi i le tatou Atunuu mo le aao foai i le vaiaso ua tea ma le lagolagoina o le Radiothon, poo le sailiga tupe lea sa faia i luga o le Letio Samoa 1593. Ou te faafetai foi i si o‘u itumalo o Magele. Sa ou lagona lava le agaga fiafia ona ua maua tala e sili le foai a Magele, lea na maua le aofai o le latou tupe foai e silia ma le $10,300.

Ou te manatu e ui lava i le faigata o le tau o le soifuaga ma le faaletonu foi o le tamaoaiga o loo iai Niu Sila, ae e lē o mafai lava ona tuulafoai e le Atunuu le Manu Samoa.

O le mea lea ou te valuvalusia ai a‘a o le fau ma tuualalo atu se talosaga vaivai ia i latou o loo faafoeina ma faamaopoopoina sailigatupe mo le Manu Samoa, ia tautuanā ma outou le alolofa o le tatou Atunuu. Pe mulimuli ane o le ā lava le taunuuga e oo i ai se taumafai a le Manu Samoa, pe malolo foi, ae o le tulaga sili atu i se matou faalogologo ma le faafofoga a le Atunuu, o loo lelei ma saogalemu, ma faaaogā tatau uma le foai ma le aao alofa a le tatou Atunuu, malamalama ma manino uma mea uma i le silafaga toto‘a a la outou lava komiti, ma e faapena ona maua ai foi e le tatou Atunuu le agaga fiafia mo le agai i luma.

E lē faapea ua a‘oa‘oina e Su‘a le mamalu o le tatou Atunuu, ae ona o le naunau alofa lava i le galuega fita o loo feagai ma le tatou komiti o loo faafoea tapenaga ma faamaoopoopoina le alofa ma le foai a le tatou Atunuu. E lē gata i lea ae e momomo lo‘u alofa atu i le tatou Atunuu, e tiga lava le faigata o le tulaga o le tamaoaiga, ae e lē o taofia lava le alofa foai ona o le Manu Samoa ma le lotonuu.

Tatou talosia ia i taumafaiga a le Manu Samoa. Afai lava e manumalo, ia aua le mimitavale ae sii le viiga ma le faafetai i le tatou Tapaau Silisiliese.

Afai foi e malolo, ia malolo faatamalii, ina ia mae‘a mai taaloga o le Ipu o le Lalolagi, ae ua maitauina e Atunuu uma o le lalolagi, e ese mai lava le ‘au a le Manu Samoa, ese mai foi le tapuaiga a tagatānuu o Samoa.

O le isi vaega tāua mo le silafia a le tatou Atunuu o lea ua ioe le Komiti a le RWC2011 o le a maua e le itumalo o Magele le avanoa e matamata fua ai e aunoa ma se totogi i taaloga faapitoa o le Ipu a le Lalolagi i totonu lava o le Town Centre o Magele.

O taaloga faapitoa o le a faaali i Magele e iai le Quarter Finals i le Aso Toonai, aso 8 o Oketopa, ma le Quarter Finals o le Aso Sa, aso 9 o Oketopa; faapea foi taaloga o le Semi Finals i le Aso Toonai, aso 15 o Oketopa ma le Aso Sa, aso 16 o Oketopa, ma le taaloga mulimuli o le sailiga o le siamupini a le lalolagi lea e fuafua mo le Aso Sa, le aso 23 o Oketopa.

O le a faaali uma ia taaloga faapitoa i Magele lava i totonu o le taulaga e aunoa ma se totogi, ma e lua ‘screens’ tetele o le a faaaogā i totonu o le kapaka i Magele lava ina ia mafai ona maimoa ai le Atunuu i nei taaloga faapitoa. E pau lava le talosaga ua matou ioe i ai, e Sā le taumafaina o le ‘ava malosi i taimi e matamata ai ia taaloga i le taulaga o Magele.

Ona faauma atu ai lea o se matou faasoa Samoa, ia aua le avea lakapi ma mafuaaga e tia‘i ai fua galuega, mulimuli ane ua tuli ma le galuega.