E silia i le toaonosefulu sui faatutū o le vaega faaupufai o le HRPP na auai i le lesitalaina o sui faatutū o le vaega faaupufai e puipuia aiā tatau a tagata i le Aso Gafua na tea, aso 13 o Setema 2010.
O se fuainumera ua faafiafiaina ai le ta‘ita‘i o le HRPP le afioga i le Palemia, Susuga Tuilaepa L Sailele Malielegaoi, ona o se ata manino lea o le naunau o sui faatutū o loo foufou i le faigapalota ma fia avea ma sui faipule o o latou itumalo i le Palemene, e lagolago i le HRPP.
Ua silia i le 20 tausaga o tu mai le vaega faaupufai e puipuia aiā tatau a tagata i le foe o le faatautaiga o le Malo o Samoa.
O ni tausaga e tele pe a fua i le atiina a‘e o le atunuu ma galuega ua tino mai, ma ua fua foi i ai le faamasinoga a le atunuu ma le latou faiga filifiliga e lē gata o palota tetele ua mavae, ae o le faigapalota o le tausaga fou 2011.
Ua saunoa le taitai o le HRPP i le lesitalaina o sui faatutū o le latou pati faaupufai, e mafanafana ma malosi lona talitonuga o le a toe foi mai le HRPP i le faatautaiga o le Malo o le atunuu.
Ua ia faailoa foi o se lagona i nisi o sui faipule o le Palemene, e lē o i totonu o le HRPP i le taimi nei, e fia tauva i le vaega faaupufai. Peitai o loo faatalitali uma i le fonotaga a le Komiti faafoe a le vaega faaupufai i le masina fou o Oketopa, lea o le a iloilo ai agavaa o sui faatutū uma o le a fia taufetuli i lalo o le fu‘a a le HRPP.
Ua mautinoa o le a iloilo ai ma se finagalo ua a‘e i se tasi o afioaga o le Itumalo o Lefaga ma Faleaseela, ina ia tauva lo latou sui a faipule le afioga Le Mamea Ropati i le vaega faaupufai e puipuia aiā tatau a tagata.
O le itu mautinoa e lē o faatamala foi tapenaga a isi vaega faaupufai e pei o le Tautua Samoa, Samoa Party, People’s Party, ma isi pati laiti i le fia suia o se faigamalo e tauaveina le Sa o Samoa mo le isi lima tausaga o lumanai.
O loo faia foi a latou sauniuniga ma saili a latou sui faatutū, ma o se aso o le a faafofoga le atunuu i ni a latou foi tapenaga.
Ua maua ni molimau ua ta‘ua ai, e lē o faatamala foi ia vaega faaupufai i le sailia o ni sui faatutū malolosi ma lagolagoina e o latou itumalo.
O le a faato‘ā iloa le auro moni i le afi e pei o ia upu, pe a oo atu ina tau lalata i le faigapalota, aemaise o le taimi o le a faapa ai le fana ma to le tuuga.
