E lē faigofie mo le tapuaiga a Samoa le tala aveatu, ua malolo lana Manu Samoa taitoafitu i le taamilosaga o le Ipu a Hong Kong, lea sa manumalo ai i le tausaga talu ai. Peitai, o le natura lava lea mo soo se taaloga, o le ‘au lava e faatamala i nai toe sekone poo minute o le taaloga, o le ‘au foi lena o le a seleseleina le faanoanoa pe a lē tau lau o le faamoemoe.
O se tala fiafia sa agiga i le afiafi o le Aso Sa, taimi Niu Sila, o loo manumalo mai le Manu Samoa i lana pulu sa tauva mai ai ma isi foi au malolosi. Lona uiga, sa amata ona faaāta i mafaufau o le aumaimoa a le atunuu, ua toe agai foi le Manu e afisi lana ipu e pei ona iai i le tausaga talu ai.
Pagā lea, ua lē ogatusa le manao ma le faatinoga o le taaloga a nai alo o le atunuu, ma toe mamulu faafuasei atu ai lo latou faamoemoega, ina ua faatoilalo i le Semi-Final e le ‘au malosi a Egelani, lea na see ai i luga Egelani e fetaui ma Niu Sila i le Final, ma manumalo ai Niu Sila i le ipu a le Hong Kong Sevens i lenei foi tausaga.
Ae o le muagagana a le atunuu, ‘E toe oso foi le lā.’
Atonu o Niu Sila le asō, ae o le Manu Samoa taeao ma le la foi tausaga pe a aulia atu.
Ae mo le pulega, nai alii faiaoga faapea tama o loo tauina le taua mamafa, faamalo le taalo faatausala!
Mo se tala fiafia e ui i le malolo o le ‘au ae o loo maualuga pea nisi o suafa o tama o le Manu Samoa i le faatulagaga o matatia poo highlights o taamilosaga nei a le IRB i le lalolagi atoa.
E pei ona iai le alii o Uale Mai, o loo lona tolu i le faasologa o le tama taalo e sili ona tele ‘ai i lenei lava taaloga o le taitoafitu, lea na te maua ai le 1224 ‘ai, e sosoo atu ia Waisale Serevi o Fiti e 1310 ona ‘ai, ae tulaga muamua le alii taalo o Egelani, o Ben Gollings, e 2569 ona ‘ai.
I le faatulagaina o sikoa silia, e tulaga muamua le alii Atenitina e 230 ana sikoa, lona lua le tama Egelani e 214 sikoa, lona tolu le alii Rusia e 179 sikoa, tulaga fā le isi alo o Samoa o Mikaele Pesamino, e 158 ana sikoa, toe tulaga lima atu Uale Mai, e 136 sikoa.
