Filifilia le mataupu atoa mo le Luitau. Mataupu e valu, o loo tau fetogi ai e le motu o tagata Iesu ona o vavega sa fai, ma lana saunoaga, e sili ia iā Aperaamo. Mataupu e iva, toe fai e Iesu se vavega e faamaonia ai, e sili ia ia Aperaamo, sili i talatuu ma aoaoga faafoliga a le aufaresaio. Silasila i le tauaso faaleagaga o tagata ia Iesu ma lana faaolataga, o lea foi e taatele i le taimi nei.
Tauaso le ausoo
Fesili le ausoo, poo ai e agasala, poo le tauaso poo mātua, e atagia ai lo latou lē malamalama. Talitonuga o Iutaia, o le ma‘i e faapogai mai le agasala, lona uiga, soo se gasegase e mafua i le agasala. E sa‘o le fesili a le ausoo, o le talitonuga lena i lea vaitaimi. Afai o le agasala e faapogai ai, lona uiga o tagata maloloina, e lē agasala. O manatu ia o Iutaia ua faasausili ai, ola faatusatusa, e sili latou i tagata mama‘i. O lea foi ua faatauasoina le ausoo i le loloto o le poto o le Atua, ae silafia e Iesu, o avanoa e faaalia ai le mamana o le Atua. E faigofie ona tatou faamasinoina isi, e tusa ma o tatou lava talitonuga, e aunoa ma le vailiiliina o le finagalo o le Atua. Tatou te faamasino tapuaiga, agavaa, tulaga tofi, ma isi lava mea ua faatauasoina ai le toatele. O le aoaoga a Iesu, ‘aua tou te faamasino atu, ne‘i faamasinoina outou’ (Mataio 7:1).
Tauaso tuaoi. Tauaso motu o tagata
Ina ua uma ona faapupulaina e Iesu le tauaso, e lei talitonu lava tuaoi ma le toatele o ia lea sa tauaso. Ua fesili pe faapefea ona tupu lea mea. Ua masalosalo ma manatu nisi, ailoga sa tauaso lenei alii, leiloa pe sa faatagā tauaso ia maua ai ana tupe. Tatou te maua i le lē talitonu, ma fesiligia agavaa o tagata. Ou te manatua le faaipoipoga sa ou iai, sa taitai e le faifeau mai le isi ekalesia. Saunoa le faifeau, e tolu ekalesia fautuaina e taga na faiaiga i ai lana fanau. Manatu le faifeau, na o lana ekalesia e alofa i ai Iesu. E manuia foi tagata i lau ekalesia, ae lē uma lava le manatu faasausili ma le faamasinosino, o tapuaiga fou. E lē suia e se lotu se tagata, e suia e le mana o le Talalelei. Le talalelei lea e finagalo Iesu e tala‘i.
O Paulo, sa sauā i le ekalesia. Sa manatu e poto, agavaa ma sili lona iloa o mataupu tau Iutaia nai lo Kerisiano fou ua liliu ia Iesu. Sa matau‘a ma pulunaunau e taofi le talitonuga fou, ma iu lava ina taamilo e fasioti tagata Kerisiano. Ae ina ua liua e le talalelei, faapea loa ma lana upu, ua lē aogā mea uma ina ua maua Keriso. Lē aogā lona poto, lē aogā tulagatofi. Ua lē aogā lona filigā faavalevalea. Fai mai le aposetolo, afai ou te mitamita, tau lava o le satauro o Keriso. Sa tauaso, ae ua pupula ona mata faaleagaga.
Tauaso le aufaresaio
Ina ua fesiligia le tauaso pe faapefea ona pupula, sa faamatala mea uma na faia e Iesu. Silasila i manatu o le aufaresaio, ‘e lē mai le Atua lenei tagata, auā ua lē tausi e ia le sapati.’ Ua matuā faatauasoina mata o le aufailotu i vavega a le Atua. Ua faasilisili a latou tulafono ma faavae, ae faatuatuanai le mamana o le Atua ma le faaalia o lona alofa i le tagata mai. Ua taua‘imisa faigalotu ma sisi lava le itulagi o le ekalesia ia ma faapea, o le ekalesia moni latou, a o lea lava e fai faiga a le tiapolo i le soifua o tagata. O lea e la‘u i falepuipui tagata lolotu, a o lea e finau poo ai e sa‘o. Faapea tonu lava le vaaiga lea ua feagai ma le tagata tauaso, ua faasaoloto e Iesu, a o lea ua fetuu e le au failotu. Fai mai le aufaresaio, e mafai ea e se tagata agasala na fai o faailoga faapena? (v16).
E leai lava nisi sa fia tagolima ia Iesu, o le aufaresaio lava ma le au tusiupu. Sa fia fasioti ona o ana aoaoga ma le talalelei fou, e faasagatau ia latou uputuu ma faavae sa o mai ai. Ua faatauasoina o latou mata i le mana faaola o le Atua. Aisea? Sa faamuamua a latou faigalotu, ae lē o Iesu.
Tauaso mātua
Sa fesiligia foi ma mātua, ae e lei mananao e faamaonia le vavega ua tulai mai. Sa tau saili e le aufaresaio se mea e faaleaogaina ai le mana o Iesu. O le tali a mātua, fesili latou i le tama, ua matua. E lei mananao e aafia laua i le vevesi, ua fefefe. Ua lē mananao e tautino le agalelei o le Atua ona e mumusu e faalumaina ma tauvalea i manatu o tagata. Fefefe nei faasā ona toe ulufale i le sunako. Fefefe nei itagia laua e latou aiga. Fefefe nei teena laua e a la uo. Fefefe nei vavae ese laua mai le mafutaga. Ua tauaso mata i mafatiaga o le la tama sa iai talu na fanau mai. Sa tatau na olioli ma vivii i le Atua ona o lenei mea ofoofogia ua fai, ae talofa, ua faatauasoina e le fefe.
Faapefea tatou?
Poo tatou iloaina ea le mamana o le Talalelei a Iesu Keriso? Tautino le aposetolo, e lē ma i le talalelei. E lē o faatauasoina ea oe e se tagata? O tauaso ea ona o le fefe poo se tapuaiga? Poo tauaso ona o le lalolagi matagofie ma ona tuinanau? Mata e te lē o tauaso ona o lou loto fefete? Tala a le Tusi Paia, na o ē loto mama latou te iloa atu le Atua. E te silafia moni ea le Atua? E lē o le iloa i le mafaufau, auā e iloa foi e le tiapolo le Atua. Iloa i se mafutaga vavalalata, a leai, o loo e tauaso. Soifua.
