Tusia: PLP
O le tauosoosoga o le alofa e ioe le taofi o se mai e leai se vaifofo. O upu masani ma tala o le gagana e le lava lea e faamatalaina ai le loto ua avea pe gaoia foi ona o le faamaoni o le alofa. I lenei lava upu ua na o le lima ona mataitusi, ae o lona atoaga ma ona aafiaga e ogaoga ma e na te aumaia lagona o le fiafia i nisi o taimi, ae faapea foi lagona o faanoanoaga. O nisi ua puupuu ma saasaa ai le vaai atu i le lumanai ma le manuia ua uma ona faataoto mai e le Atua mo lona olaga. O isi foi ua fano ai le soifua aua a oo ina luluti le alofa, ona pogisa lea o manatu lelei, sei vagana ai lagona o faaosoosoga. O isi foi ua vaivai ma le lelei ai a latou faiga filifiliga, aemaise pe a oo ina malase le alofa e faavae i lagona, ae ua mamao mai le loto ma le agaga. E pele lenei upu i laugutu pe a oo ina faatoa afuafua se faigauo, e suamalie i le faaleo aua o le auga lea e tosina ma gagauina le maemae o le loto faigata. E sufi i manatu toe faapoi i mafaufauga, ae sili ai ona paepae lago e le atamai i lona faalataina. Leitioa le Tusi Paia a toilalo le tupu o Solomona. Ae le faitio foi se isi, aua e maaleale le upu pe a oo ina saili lona ala i le faatinoga. E tauau ina mate moto ai se faamoemoe pe a le mausali le faamaoni, aua o le alofa moni e tauaso, e le fefe seia oo i le oti. “E TAUASO LE ALOFA”.
O le tuai ona oo mai o le pogisa, na fai lea ma ala o le le mautonu o le mafaufau o le alii o Mativa, ae ua toe o ni nai itula ona ia tuua lea o Samoa mo Niu Sila. Ua toe tomanatu le alii ia la tuugatala ma le tamaitai o Maumea, ona faalii lea i lona loto aua ua ia iloaina, e taufao le au ma le le tau o le inailau o loo faamomoo i ai lona loto a o lei folau ese i toe itula mulimuli o le mafutaga. O Mativa e le o se tagata e gaoia, ae e faailoa mai e ona uiga le tauagafau ma le agamalu o lana amio. E leitioa foi Maumea a ofoina atu lona tagata atoa ma ioeina ai se mafutaga faaauau pea ma le taulealea, aua o le moli lava e malama ai ala o tamaitai. O Maumea foi latou ia, e le o se fuaimamao. O le teine lava o le va. A tuu ane i le fesagaiga ma tagata, e iloa tautala, savali ma teu lana nofo e faaaloalogia ai o ia. A tuu ifo foi i lona lalelei, o le taimane lava e valea ai le mafaufau, aua e faatusaina le matagofie o ona foliga i le feilafi mai o le penina.
A o tu pea Mativa ma faasolosolo ona mafaufauga, sa faaluafesasi ia te ia pe o le a fou lona vaa e solomuli, aua ua toe ono itula ona ta lea o le taimi o lona vaa, ae o lenei lava ua savali i le fitu i le afiafi e lei pogisa lava.
O tua tonu o le faleaoga tulagalua o le nuu o Felila Samasama, o ina sa tuutala Mativa ma Maumea e la te feiloai ai pe a oo ina tau pogisa. E lei tuutala i se taimi, ae sa fai le pogisa ma faailo i le taimi e la te feiloai ai, ona faamavae lea ma faatofa. Na pei o se logo e taalililili i le faalogo o Mativa le faapea ane o se siuleo ia te ia, “Sole, o a au mea o faiga i inei o lea ua ta le afiafi”?
O le fia iloa e Mativa o le tagata lea e fai atu ia te ia na liai faafuasei mai ai i tua lona ulu ma ia iloa ai, se o le fafine faitala o Seipua lea e tope atu lona gutu. O Seipua, o le nifo tulimanu lea o le toatele o tagata o le nuu, aua e uma tala ona alu ma feaveai solo, e pei o le iole sagolegole. E tiga e le o se tala sa’o, ae a faaupu e Seipua e pei lava o le mea moni. “Oi malo Pua” o le tali ane lea a Mativa. “Ia o lenei lava e tau tu tu laititi atu i inei ona agai atu lea i le fale”. “Oi ae na ou faalogo foi o nanei e te malaga ai i Niu Sila, ae se sei vaai pe se tu tu lelei foi lau tu tu”. O le toe tatao atu lea a Seipua ma savali ese atu ai lava.
O Mativa ua tauau ina sau lona fiu e faatali, aua o lea lava ua lafoia ave o le pogisa, ae e foliga mai e leai ma se faailo ose manu sau o Maumea. E fai o le fiu o Mativa e faatali, ae o le taimi tonu foi lea o lae o le a oti le tamaitai i le fia motu maia ma le taula i le nofoaga e pei ona sa o la tuutala ai ma le taulealea. O le mea ua tupu, ua talafeauga lava le sauni ane o Maumea o le a sola atu i le faleaoga, ae valaau ane loa ma lona tama ina ia o atu i le fale o lea ua toeititi ona fai lea o le faigalotu o le afiafi. E fai la o le misi alofa o le teine ia Mativa, ae e faigata ia te ia le faatonuga a lona tama, aua o se tagata saua tele, ma e tautala tasi foi.
Ua saofai ane nei le teine i le sofa o loo i le pito i tua o le latou faasee ona aapa ane lea i lona pito ofu ma solo ai lona afu, aua faatoa uma lava ona salu le vao sa moa e lona tuagane, ma susunu le otaota o ana feau ia sa faatatope ma lona manatu e uma loa ona sola loa lea sei faamavae ma si ana paaga. Ua iso le mafaufau o Maumea e tau faatulaga se pepelo i lona tama i se auala e tau a ina alu ese ai i le fale peitai ua leai lava. O lona loto atoa o Mativa, ae ona o le teine o se tagata e usitai tele i ona matua, ua faigata ai ona fai se isi ana fuafuaga vave. A sisio e alu e fai se faatau, e le taitai lava ona ioe lona tama aua o loo iai ona tuagane laiti e mafai lava ona taufetuli e fai mai.
O le le mautonu tele o le mafaufau o Maumea na faafuasei ai ona maligi ona loimata, aua ua ia iloa lelei o le a o la le feiloai ma faatino a la upu e pei o a la tuugatala. Ua tafe ifo lona isu, ona ia aapa lea i le pito o lona ie lavalava o loo sulu ua fogi ai. Ua toe faasolo ona mafaufauga i le tele o taimi o le la mafutaga ma le anoanoai o mea lelei sa fai e Mativa mo ia e ui ina e na o le faatoa iva masina o le la feoaiga. Ua pei o se ata tifaga le toe faasolo mai o taimi o a la evaga. I le suamili o le fusi tasi ma le sogi i le alafau. Le loloto o faaosoosoga ona o le malase o le tuinanau. Ae ui lava i ia lagona, ua na o ni luitau sa tofotofoina ai le ola tamau faateinemuli, ae sa lei mafai ai ona sopoia le fale tulutulu i tao lea sa leoina ai le vai o le tausala e pei ona toilalo ai le poto o Solomona.
O le maligi tele o loimata o Maumea na iu ai ina faagalegale moe ae o le taimi lea o loo iai uma le latou aiga i luma i le latou fale papalagi. Na tei ai lava ua taoto ane le teine i le sofa ma moeiini loa ona mata. E lei atoa se lima minute talu ona moeiini atu Maumea, ae fai loa lana miti fai mai o loo moe i se fale tuufua, ma i lena fale tuufua e leoleoina e ni manu feai. O ona lumafale o le moana ma e le mafai e se tasi ona sopoina, ona e tumu i malie, o tanifa ma i‘a o loo fai ma fili i le moana. O ona tua mai, e na o laau tetele o loo tu tu ai, ae o lalo o nei laau o loo ola ai se vao tuitui e le mafai e se tasi ona ia savali ai, sei vagana ai tulimanu o le fale tuufua o loo iai ni manuvaefa lapopoa o loo leoina o ia a o ia moe i le fale tuufua. I lana miti lava na faafuasei ai ona ia iloa e pei o se tagata o loo faamalumalu mai i ona luga ma ua ia fiu e tafiti ae pei ua tatao ia e le tagata. O lona ita tele na ia lafo ai ni upu masoa i le tagata lea, ae tei loa i le tau o le po i lona alafau ma se leo o faapea atu, “Suga, se nofo maia i luga”.
