Vaega 8
E fiafia lava e avea foi lenei taimi e toe faatalofa atu ai i le mamalu tele o le aufaitau o le tatou nusipepa. Talosia i le alofa ma le agalelei o le Atua ae o manuia mai lo outou paia ma lo outou mamalu i lenei foi vaiaso, ae alo maia o lenei o le a toe sosoo atu ia le tatou fagogo, ma o lona vaega valu lenei.
Na pau mai le tatou tala i le vaiaso na tuanai atu nei ina ua tilotilo atu le alii o Mativa ua tea laititi lava le lua i le vaveao, ona ia tu loa lea i luga ma savali lemu atu agai ile potu o Rosalia. O le manatu o le tama ua momoe uma le aiga.
E leai foi sona talitonuga o toe iai se isi o ala, ae na faateia le alii a o savali faapusi atu i lona lagona atu o se siuleo mai le potu o le faifeau o faapea, “Se soso atu ua e mamafa mai”. Na lava a le siuleo lea e tau atu ai i le tama o loo feala le faifeau ma lona toalua ona toe solomuli lea ma toe oso i totonu o lona potu.
Ua saofai ifo i lona moega ma toe tomanatu i lana taga lea sa fai ona ita lea o lona loto. Ua toe tu mai i ona luma foliga lalelei o si ana manamea o Maumea o loo i Samoa, ua ia toe manatuaina ana upu sa fai i le teine, ona melo tagi lea e pei o se tasi ua tae lona fatu.
Ua ia faafetai i le Atua ona o le tino o le tuinanau na semanu e tauvalea ai ia ona o le malase ma le momosi o le agasala, o manaoga leaga o le tino le faamalieina.
Ua taoto le tama ona ia aapa lea i le ieafu ua faaafu uma ai ona tino, ona ia mafaufau lea pe o le a le isi laasaga o le a agai i ai lona olaga aua ua ia mautinoa nei, o luitau a ia o le a feagai ai pea ma ia i le taimi lea o le a nofo ai i Niu Sila. O le mea moni, na tonu lava i le mafaufau o le tama o le a ia agai atu i le potu o Rosalia ma taumafai ina ia faatino faaosoosoga a le fili sa pogisa ai ona manatu.
E le o iai ni ona lagona alofa i le teine, ae ua seetia i le malu o le tai taeao aua ua gaoia e le lalelei o le tamaitai ona lagona faatama. Na faatoa tei Mativa ina ua taufagu atu Sinatala ia te ia e nofo i luga e agai ane e inu le latou ti o lea ua maea tapena. Na pei e oso le tama i se niu ina ua ia vaai atu i fafo i le faamalama ua maualuga le oso o le la. E lei lelei ni feau a Mativa i le aso atoa ona sa mafaufau i lana gaioga lea na tau fai i le po ua sola ma lona aafiaga tele pe ana se mea e taunuu.
E le gata i lea, ae ua alu le aso o faauliulito i lona mafaufau foliga ma uiga o Maumea, ma lona loto ua pei ua atili ai ona pipii atu i le fatu o le tamaitai e ui lava ina o loo va i vasa e afe ma atunuu e tele. O le afiafi o le aso lea na toe fai ai aoga pese ma na matua tumu le aufaipese i lea po. O i latou na tele aso e lei toe o atu i pese ua lolofi uma atu ona o lea ua folafola e le faifeau e fia manao ina ia iai tagata uma i faaaoaoga ia e fai aua le pese o le Me. Ae o le isi foi toatele o le malosi lava o le fia vaai i le faipese fou lea ua aave atu le maoae o lana ta piano.
Na uma le tatalo puupuu ona sosoo ai lea ma le faafetai a le faifeau ona lafo lea o le avanoa i le taitai pese e fai ai lana saunoaga puupuu. E lei umi se tala a le toeaina o Ioasa ae ua na ona ia faafetai i le Atua ina ua toe potopoto le aufaipese ma lona agaga faafetai i le alii o Mativa ona o lona taimi ua faaavanoa aua le aveina o le pese a le aufaipese. Na uma ona tuu lea o le avanoa ia Mativa ma e lei tuumamaina e le tama le avanoa ua ia maua.
E leai sana tala sa faia, ae na ia ave sao lava le aufaipese i upu ma nota o le pese lea e ao, ona vaevae lea i vaega ma taumafai e ao taitasi. O le vaega a le usu na pa ai le ata a le tama aua ni loomatutua foi a faamananaia o loomatutua o le aufaipese. O le manatu o Mativa, poo ai lava a toe faamananaia i ai nei loomatutua amoso. Na uma vaega e tolu ona sao taitoatasi ona faatulai lea i fafo mo sina latou malologa ae faasaga ane le tama ua ao le oloto.
Na ofo le tama ona o le toatele o le oloto a le aulotu aua e maua lava le tolusefulu o teine ma tamaitai.
O se mitamitaga foi lea i le loto o Mativa aua o le toatele o le lelei foi lea ma faigofie ai lana galuega o loo fai. E a le tama lava o loo ao le oloto, ae a isi foi au tamaitai i le feeueuai ma talanoa i le ta piano.
O le mea foi e malie ai, ona e fai lava a latou tala ae a tilotilo atu le tama ua punonou i lalo.
O le isi foi itu, e pei e fai a latou tala ae palaaai. Na tei si teine o Rosalia ina ua eu e le isi tamaitai ula o Rasela ma faapea atu ia te ia, “E fiu ai a le vaega lea e fai tala o le faipese ae o lena e te uuina le ki aua o lena e lua te nonofo faatasi i le fale o le faifeau a Lia”.
Ua faasaga ane le teine ma musumusu ane i lona leo le lagona, “Suga ia o ai na fai mai ai. Ailoga lava e fia faia se manatu o Mativa i se isi o tatou aua o le tama e tele.
O le isi foi itu, o ai na iloa o loo iai se faala‘ila‘i a Mativa i Samoa aua o lea foi e fou mai i le tatou atunuu nei”. “Oi e ta i le to‘i. O ai na e fai i ai, e tasi a foi le u atu o le autafa o teine Aotearoa ae see le tama Samoa. Ma le isi itu, o fea e alalai mai ai na teine Hamo i tausala o le apu mumu o Niu Sila”?
Na faaselemutu faiga tala a le au tamaitai ia ina ua motu faafuasei le taina o le piano ae faalogo atu o valaau mai Mativa, “Lia, sei taumafai mai lava na o oe le fuaiupu lea faamolemole”. Na pei e pa se pomu i taliga o isi teine fia faitifiga a le aufaipese ina ua latou faalogo atu o tau mai e le tama le igoa Lia, ae ua le tauina lona igoa atoa Rosalia.
“Go Liaaaaaaaaa, alu i ai tatou. Faapea a e te le mafaia se mea”. O le oso ane lea a Kika, o se tasi o fiailoa o le tupulaga a le nuu ma o le sifi o faasoesa. Na goga atu le gugulu o teine, ae ua ta e le alii o Mativa le piano ona tu lea i luga o le teine o Rosalia ma lagi le fuaiupu e pei ona faatonu ane ina ia usu.
Na pei o le aisa ua liusuavai le loto o Mativa ina ua usu e le teine le laina muamua, o lona leo malie ma le manaia e pei o se tatagi o uaua o le kitara na toe faafoi maia lagona o le po ua sola i le faipese. Leitioa foi Saulo i le tala o loo tusia i le Tusi Paia fai mai a ita ona aami lea o Tavita ina ia pese i ona luma, aua e na o le pau lena o le auala e sufi ai lona ma‘ema‘e.
O le mea foi e malie ai, ona e fai o le manaia i le faalogo a Mativa, ae ua lologo foi ma le faalogo a teine o le oloto ina ua faaopopo ane le tama i le laina lona lua ma o la usuina faatasi ai loa le fuaiupu seia uma.
Tailo foi i le pese toalua a Alapati ma Maria o le Penina o Tiafau pe maua le sosolo lelei o le paga a Mativa ma Lia, aua e uma le fuaiupu ae ua le uma le fia pese o le tama, atoa ai ma lona fia faalogologo i le leo o le tamaitai.
Na tonu ai lava i le mafaufau o le tama, o le a iai le suiga o le pese ma o le a pese toatasi e Rosalia le fuaiupu lea ina ia vavae ai le faalogologo a tagata. Sei tatou toe liliu atu i le teine o Maumea. Na lei talitonu Maumea o le a faaluaina e se tasi le kisi a Mativa i ona laugutu, aua ua tauto lona loto e na o le pau lea o le tagata e mafai ona fagota i le tai papau o loo ia leoina, seia oo lava i le tai loloto o loo fano ai le soifua o tupulaga. Peitai o le pai atu o laugutu o le tama o Tala na ese ai foi ona faalogona, ma ua tonu ai upu e masani ai talanoaga, “e malie eseese lava nota i le faafofoga”.
E ui ina avaga le loto o Maumea i le suamili o upu faatosina ma tala faamaise a le alii o Tala, ae na vave lava ona ia tago tulei ese le alii ina ua kisi atu ia te ia. “Tala, faamolemole alu loa i le tou fale.
E le mafai ona ou faia le mea lena e te manao ai ona e le faaluaina lou alofa ia Mativa.
Ae alu loa, faafetai lava mo mea uma o le mea sili o lea ua ou iloaina”. Na pei o le ia e taa i le tainefu le mafaufau o Tala ina ua ia iloa, ua le pa lana mailei sa fafau atu i le teine o Maumea. Fa ia o le po lava lea o le a o la asiasi ai i le motu o fiafiaga ma o la faasoa i penina tautele o le vasa, ae o lea e foliga mai e na o faiva gau lana fagota.
Ua fiu le tama e toe taumafai atu, ae ua tasi lava le tali a le teine e leai. E sili loa le alu ese manu e lei oo atu i se isi tulaga. O le ita tele o Tala na ia aapa atu loa ma toso faatata mai le lima o Maumea ma na pei o se niu liai e le matagi le palasi mai o le teine, ona ia aapa atu lea ua pupuni lona gutu ma faapea atu, o le mea la lea e te manao i ai?
E faia pea
