Tusia:PLP
E fiafia e toe faatalofa atu i le paia ma le mamalu o le aufaitau i lenei foi vaiaso. E talitonu le taofi o loo maualuga pea le agalelei ma le alofa o le Atua i lo outou soifua manuia. Malo le lagi e mama ma le soifua matafi i lo outou mamalu. Ae alo maia o lenei o le a toe sosoo atu le tatou tala faasolo e pei foi ona sa tuua mai ai i le vaiaso ua tuanai atu.
Na gata mai le tatou tala i le vaiaso na tea nei i le taimi lea na faamatala ai e Tala i le teine o Maumea le mafuaaga na alu ai Mativa i Niu Sila.
Na pei e nofo le mānava a le teine ina ua pogisa faafuasei ona mafaufauga i le faamatalaga a Tala lea ua fai ane ia te ia, ma ia taua ai o le mafuaaga moni lava o le alu o Mativa i Niu Sila ona o ia lea e tau ai le maito a le afafine o le faifeau.
Ua na ona pulatoa o Maumea ia Tala ae ua leai sana tala e faia. Ua pei o se tasi ua avea sona faamoemoe, ma ua valea ai le atamai ina ua ulufale le fili ma taumafai e saveu le filemu o lona loto.
E leai se isi taga a le teine sa toe faia, ae ai ona o le alu tele o lona ulu ma lona alofa ia Mativa na maligi ai ona loimata, aua o lea ua ia toe manatua le tala a si ana uo o Nuu lea sa fai ane ia te ia. O Nuu o se teine agamalu toe tauagafau. E aulelei ma o se teine atamai foi, o le ala foi lea e tele ina fia o ai tama ave taxi ona e pei uma lava ona foliga o se afafine o se afakasi.
O le isi foi mea, e faigaluega i le Polenisia, ma o taimi uma lava e savali ane ai ma lana togiga e pei lava o se laoso i le taeao le pupula mai o le lalelei tele o ona foliga momosi.
O Nuu la lea sa talanoa ma Maumea ma na ia fautuaina foi Maumea ina ua ia faalogo o lea ua feoai ma Mativa, ina ia tautuana e aua le vavevave aua o tama popoto toe lelei aoga e pei lava o le maa e taavale solo e le pipii i ai se limu.
O Nuu foi lava sa ia muai tauina ia Maumea le tulaga ua oo i ai le afafine o le faifeau ma lona maitaga, ae e leiloa pe o ai se tamā o lana pepe. Na pau le mea na tau iite ai ia Mativa, aua o ia lava e fiafia tele le teine e talanoa i ai, ma o le tele lava o taimi e vaaia ai pea le toalua lea o talatalanoa faatasi.
Ua le utufia le to faatimu ifo o loifofoga o le teine. A mafaufau i lona loto ua gaoia e le alofa faavalea ona atili ai lea ona masaa mai ona loimata ma ua pei ai o se tamaititi o loo tagi ae sasa e lona tamā.
Na motu faafuasei ai foi ma le tala a le alii o Tala lea sa faamatala, ae ua tu ane nei i luga ma fusi atu le teine i ona lima ma taumafai ina ia faalototele atu ia te ia. “Mea, na ou fai atu foi ina ia e lototele. Aua e te lotovaivai faapena.
O le mea lava lena na ou naunau ai ina ia e iloa le mea moni, aua o lea ua ou vaai atu ua matuai e alofa lava ia Mativa, ae e te leiloa pe toe foi mai pe leai.”
“O le isi mea, e lelei lava ona e malamalama, ina ia fetuunai ai lou mafaufau i se isi au faaiuga e fai. E lelei lava le toe mau fetuunai ane o sau filifiliga, ae ua lava lou silafia i le mea moni ma tua atu i lona taunuuga. Ae vaai oe, tuu i le Atua ou mafatiaga.
Ou te talitonu lava o loo soifua le Alii e te maua ai le mapusaga. O lea foi ou te avanoa i soo se taimi. Afai foi e te moomia se tasi e faasoa i ai ou tiga, ona aumai lea o lau avega ta te tausoaina e māmā ai mo oe, ma e sili atu lena nai lo lou mafatia toatasi”.
Na oo i le taele o le loto ma le agaga o Maumea uiga uma o upu e pei ona talanoa atu ai Tala ia te ia. Ma ua avea le susua o mafaufauga o le alii faatasi ai ma le mafanafana o lana fusi atu ia Maumea, ma avefeau na ia momoliina le alofa faaleogalua i le mafaufau o le teine.
O le upu moni, e ui lava foi i se maemae ma le ita o le teine ia Tala ma le tele o faamatalaga salatua o loo fetauaina ai solo lona igoa, ae na lei avea ia faamatalaga ma ala e taofia mai ai le liusuavai o lona fatu i upu uma sa fai atu ai Tala ia te ia.
E le gata i lea, ae o le papai atu o le fatafata o le alii i lona tino mumua, na ia lagona ai le ulu o le alofa i totoga ma logo ai ona itutino uma e ui lava ina e lei faatinoina i le tulaga e pei ona toilalo ai le poto o Solomona.
O nei faalogona ua augofie ai ma le tamaitai ina ia talia le sosia o faamafanafanaga ma upu faalaeiau a Tala lea o loo sasaa atu ia te ia. O le isi foi mea, ua faigofie ai ona avaga atu lona loto i le taulealea, e ui ina e na o faamatalaga ma le fusi lea o loo ia lagonaina.
Se tagata foi ina a poto e fai ana upu, le alii o Tala, aua e leai ma se isi e toe taofia Maumea mai se feiloaiga i le lagi tuaiva pe ana manao i ai le alii aua o le upu moni ua matua gau a le loto o le teine i le faamaise a le taulealea. Ua toa le mafaufau o Maumea ona faapea ane lea i lona leo tau le lagona.
“Tala, faafetai lava mo le faailoa mai ia te au. Ae o le a taoto mai sei ou mafaufau totoa pe o le a le isi mea o le a fai, ma le isi foi itu, sei fai pe moni nei faamatalaga.”
“Ae o le mea sili o lea ua e tau mai. Ou te tautino atu foi ia te oe e lei gagana mai Mativa i se upu se tasi i le tulaga lea ua e talanoa mai ai. Ma e matua mamao foi ma lou mafaufau e mafai ona fai e Mativa se mea faapea ia te au, aua ua ou iloa lona alofa ma ou te talitonu foi e ui lava o ia o se tagata atamai toe poto ma aulelei, ae ua ioe lou agaga i lona alofa ia te au. Ae faafetai lava mo mea uma”.
Na uma le tala a le teine ona aapa atu lea o Tala ua toe opo mai Maumea ma faapea atu. “Mea, aua e te popole. Na pau lava lau toe upu, ou te avanoa i soo se taimi e te moomia ai se tasi e te toomaga i ai i ou mafatiaga. Talanoa mai, ou te tautino atu lava ou te le talanoa i se isi i soo se mea e te fai mai ai”. Na fai lava faaupuga a Tala ma tilotilo totoa atu i mata o Maumea ma lona leo e pei o se olo o se lupe i luga o le mosooi fuga.
O le vaaiga lea na lei mafai ai ona alo ese mata o le teine, ae ua atili ai ona suamili le fusi a le taulealea ma lona leo ua tauau a ina le lagona e tau atu ai i le teine e iai le tupua lea e nofo i lona loto.
O le teine ua le mau manatu aua ua le mafai ona ia pulea lona loto ma ona faalogona na mafua ai ona ioe o soo se mea lava e fai atu e Tala ia te ia o le ia taliaina.
E talafeauga lava le uma o tala faaoleole a le tama ae ua papai foi ona laugutu i le gutu o le teine, o se moemitiga ua leva ona ia tulituliina.
Sei tatou toe liliu atu i Aukilani i le alii o Mativa. Ia manatua foi, na faapau mai le tatou tala i le vaiaso lea ua tea ina ua fai atu Mativa ia Rosalia e tuu ane lona potu e faitalia ia ma faauma, ae o le u mai o le tua o le teine na toe musumusu atu ai le tama ia te ia pe o fea lona potu. Na leiloa e Rosalia sana taga a fai ae pe o le a foi sana tali i le fesili a Mativa aua e na te leiloaina pe o le a le mea ua fesili ai le tama pe o fea lona potu.
Ua na ona ia toe faliu atu i tua ma faapea atu i le tama, “A lou potu lea ta te sosoo. O le potu a le faifeau ma lona faletua le la e pito i tua i le isi itu, ona sosoo mai ai lea ma le potu a Sinatala i le itu lava le la.
O au la lea i le itu lea, ia ae o oe lea o le a e tofa i le potu lea. E a, ua faamalieina le fesili”? Na ata le tama i lona leo tau le lagona ona ia toe faapea atu lea. “Faafetai o le mea sili o lea ua iloa atu o taua lea e soosoo tauau i le itu lea. Ae alu ia e tapena lou potu”.
O le mea moni, e lei fesili fua le tama o Mativa i le teine o Rosalia, aua ua tauau ina faiaina lona atamai faatama ina ua vaai atu i foliga lalelei o le teine i Aotearoa.
E ta ane le lua i le vaveao o le po lea ua momoe uma le aiga, ae o lea lava e ala Mativa, ona tu lea o le alii i luga ma talatala lemu le faitotoa o lona potu, ma savali atu loa i le faitotoa o le potu o Rosalia.
E faia pea
