Tusia: PLP
E toe faatalofa atu i le mamalu o le aufaitau i lenei foi vaiaso. Faamalo le soifua ma le lagi e mama. E iai le talitonuga o loo maualuga pea le alofa ma le agalelei le mavae a lo tatou Atua i lo outou soifua, talofa, talofa, talofa lava.
Ia ae alo mai loa i lau faitau, o lenei foi o le a toe sosoo atu le tatou tala faasolo o le tatou fagogo i lona vaega lima, “E tauaso le alofa”.
Na gata mai le tatou tala i le vaiaso na tea atu nei i le taimi lea sa faatauanau ai e Tala ia Maumea ina ia la feiloai i se taimi o le po e faamatala atu ai ia te ia le mafuaaga moni ua alu ai Mativa i Niu Sila.
Na pei e sili i le vasega faaiuaso a le Kolisi o Samoa lagona o le alii ina ua toe taofi ia i le valaau atu a le teine ma faapea atu ia te ia ua lelei, ae aua lava nei alu atu i le taimi o la e feala ai le latou fale.
Na ioe ane Tala ma savali ese loa, ae o lona loto lea ua matamata tetele ai le taimi na tau ane e le teine, o le ta o le sefululua e tolotolo ane ai, a o lea foi o le a ia tatalaina ifo le faamalama o lona potu e oso atu ai.
E tuumuli ese atu Tala ae faaauau le saluina o le otaota i lumafale a le teine o Maumea. O lona foi mafaufau, ua tuai ia ona po sei la feiloai ma Tala, pe o le a moni le mafuaaga lea e na te fia tau ane ia te ia. Ua toe mafaufau le tamaitai i le taimi lea ua uma ona faatulaga e alu ane ai Tala ona tuufesili lea i lona mafaufau pe o le mea ea ua fai si tuai.
Peitai i le isi itu o ona manatu, na ia talitonu ai e sili lava le taimi lea aua e mautinoa ua momoe ona matua ma ona tuagane aua e masani lava ona momoe afiafi. Na salu le otaota a le teine ma fetuunai pea ona mafaufauga, ua ia toe manatua le tele o tala feaveai sa taua solo mai ai le igoa o Tala ma isi foi teine.
E oo lava i le latou nuu tuaoi sa maua mai ai foi le faamatalaga, o loo iai le atalii a Tala i le afafine a le Aoao Fesoasoani a le nuu lea. O nei mafaufauga ua fetuleni ae, ua tau iite ai ma le loto o le teine, pe o le mea ea o se naunau ane o Tala o se tala moni, pe o le mea o se auala lea ua ia fatu ina ia oo ane ai sei o la talanoa.
Na vave ona uma le taalaoina o le otaota ma le saluina ina ua valaau ane le tina o Maumea ua lava ia feau ae alu atu e tapena se ti o le a alu foi le taeao.
Na pei lava e palaka i le uila le gaioi a le teine aua o lea o loo taoto mai i ona luma se naunautaiga ina ia tuai ona sola atu le malamalama ae toe faomalo le po aua se la feiloaiga ma le alii o Tala.
O le uma o faigalotu i le afiafi sa faalogo atu ai Maumea o faamaite le o o ona tuagane i le falemoe a taulelea la o loo fai i le fale o le faifeau.
Na matua fiafia le teine aua e mautinoa lava e na o ia ma ona matua lea o le a momoe i le latou fale, ma ua fetaui lelei lava ma le la tonu lea sa fai ma Tala i le taimi e alu ane ai.
E lei taina le afa o le valu ae savavali loa tuagane o Maumea i le maota o le faafeagaiga aua e tele lava ina afa le valu i po taitasi ua faatasitasi uma tama i le fale o le faifeau, ona faasoa lea i vaega e manuia ai le lumanai o taulelea i totonu o le nuu, aemaise o le faatinoina o latou tiute i totonu o aiga.
O le isi masani a le falemoe lea, e fesoasoani ai tama matutua o loo aooga i Iunivesite i meaaoga a i latou o loo faapea ona aooga i kolisi, o le ala foi lea e lelei ai aoga a le toatele o tupulaga tama o le nuu, e pei lava foi o Mativa.
E o ese atu tama ae savali ane Maumea ua tapena tofaga a nai ona matua i luma o le latou faletalimalo aua e fiafia e momoe ai ona o le malu mai o le savili i taimi uma.
O le fale lea e fai tasi uma ai talanoaga ma faalavelave a le aiga, ae o tua mai o le faletele lea, o loo iai le falepalagi tolu potumoe a le aiga, o se tasi o fale manaia i totonu o le nuu, aua sa faatupe atu e isi tuagane o Maumea o loo i Niu Sila.
Na fai uma nei gaioiga ae o le loto o le teine ua matua fiafia lava ina ua ia mautinoa, e na o ia lava lea o le a moe i le latou fale pito i tua ma o le a saoloto ai ma le la talanoaga ma Tala lea o loo loma.
E afa le sefulutasi i le po ua matua tau i le lagituaiva miti a matua o Maumea. O le taimi foi lea ua leai ma se mea e tasi o toe gase, aua ua pogisa ma ua malolo uma le afioaga.
E ta le sefululua ua leva ona faapuna le alii o Tala i tua tonu lava o le faamalama lea sa faatonu ia e Maumea e faatali atu ai, ma o le taimi lava na tatala ane ai e le teine le faamalama, na pei o le a le oso atu i totonu o le alii aua ua leva ona maalili i fafo.
“Sole, ua leva ona e sau”? “Ioe, a le leva e ta ane le sefulutasi ua leva ona ou faapuna i tua o le tou pa”. “Oi, ia a oso a foi faapuna na ou fai atu ia te oe e ta te fetaui i le sefululua. Ua tai e faapuna, faapuna, maua mai oe e se isi, ia pe ai foi oe e se aitu”. O tala faapatapata ia a le tamaitai, ae o le taimi lea ua na o le saofai o le alii i luga o le nofoa lea e i totonu o le potu o le teine, a o Maumea ua savali ane ma nofo i luga o lona moega.
“Ia sei fai mai se tala poo le a le mafuaaga ua alu ai Mativa i Niu Sila”? E lei uma ane le tala a Maumea ae tu i luga le alii o Tala ma savali ane ua nofo i autafa o le teine, ona tago lea ua pei e faauouo ane le tamaitai ia te ia. “Faatali laia, pei a o lena o le a sese. E sili lou alu e nofo i luga o le nofoa ma faamatala mai lau tala. Aua foi e te faia mai se mea ou te le fiafia ai ia te oe”.
“Se ioe Mea, aua e te faapena. Lea lau nofo atu pea i ou autafa ma faamatala atu leaga i lagona mai taua e se isi”. Na fai lava tala a Tala ma taumafai e faapipii atu le autafa o le teine ia te ia. Na ese le faalogo a le teine i le taga lea a le tama na mafua ai ona tu i luga ma toe tele atu ana tala i le tama.
Sei o tatou liliu atu i Niu Sila ia Mativa poo a mai. Na taunuu le savaliga a Mativa ma Rosalia i le fale o le faifeau ona tapena lea o le taumafataga aua le taligasua o le afiafi. O se afiafi fiafia lea i le maota o le faafeagaiga ina ua iloa e Solinuu, ua utu ma malie lona loto i le taina e le alii o Mativa o le piano, ma ua le toe suia ai lava ma lona mafaufau i se tasi o le a ia aveina le latou pese o le Me.
“Mativa, sau oe e nofo mai i lou nofoa lea tatou aai faatasi ae fai mai e Sinatala ma Rosalia feau. O lena foi ua masani lava teine i le faiga o feau o le tatou aiga. Ae sau oe tatou aai faatasi, ia ma le isi foi itu, o oe o le malo faaaloalogia a le tatou aiga i lenei afiafi ona o lea faatoa e taunuu mai Samoa”, o le valaau ane lea a le faifeau.
“Alo lau susuga i le faafeagaiga ma lou faletua i le taliina o le sua. O lea o le a matou faifeau atu ma teine sei palega auau le taumafataga ona oo mai foi lea i le matou taimi”, o le faalavefau lea a le alii o Mativa na matua talitonu ai lava le faifeau, o se tagata aoaoina lelei tele le tama malaga mai Samoa.
Na malo le tama ma iu ai loa ina o latou aai faatasi ma teine. Ina ua maea ona tatafi aao o le faifeau ma lona faletua, sa agai loa i luma i le potu malolo ae saofafai ifo i lalo Mativa ma teine ma alu loa ma le latou aai.
O Sinatala sa nonofo faatasi ma Rosalia i le isi itu o le laulau, ae o Mativa i le isi itu. E aai a la ma talanoa, ma na ese lava le faalogo a le teine o Rosalia i tala a le tama aua e pei e foliga mai o se talanoa a se tasi o loo iai se mea o loo i totonu o lona loto. Peitai na faigata ona talitonuina e le teine ona e fou le latou mafutaga.
“Se tausami mai Tiva, aua le matamuli o le tatou aiga lava lenei”, o le tala ane lea a Sinatala. “Se pei a ua tau sau le ma ona o lea e matai mai e Rosalia lau ai pei a e iai se mea e le malie ai”.
Na ea i luga le teine ma tilotilo atu ae toe taia foi lana vaai i foliga pulatoa mai a le tama, ona ia faapea atu lea, “o le pona foi lena o lau saunoaga o le a lavea ai fua ma Foaga ae lei faia lava sau tala”.
Na uma le tala lea a Rosalia ona toe punou lea i lalo ae faalogo atu ua oomi mai lona vae i le alofivae mafanafana o le tama.
