Tusia: PLP
E masii le vaalele o le a alu agai i le ea, ae o le taimi lea o loo taoto ai le tamaitai o Maumea i lona moega ma faasolo pea ona mafaufauga, ma ua na o foliga lava o Mativa lea e tu mai i ona luma.
E soo se vaalele lava e alu ese mai ma Faleolo e tasi lava le alavaa o luga tonu lava o le fale o le tamaitai, aua e na o le lua nuu e va ai ma Faleolo le eleele o loimata.
O le u u tetele o le vaalele na iloa ai e Maumea o le vaa lea o loo ua alu atu ai si ona au i Niu Silani, ona faatafa lea ma moeiina ma ona loimata ua le matu.
Ua filogia manatu o le tausala, aua a mafaufau i lana tautoga sa fai ia Mativa e ala lea i lona nofo atu ma le faamaoni atoa ai ma lana meaalofa, ona tei ai a lea ua toe faanoanoa i ona lagona. Ua fanau le faanoanoa aua o le tala i le tusi oti folafolaga a le alii i le mafaufau o le teine.
Ua toe manatua e Maumea le tele o ni isi o tama o le latou nuu sa fai foi a latou folafolaga i nisi foi o tamaitai, peitai na galo vave lava ina ua tulaueleele i le atunuu o loo taofi ma mau tauave ai le toatele, fai mai o le atunuu o loo tafe ai le suasusu ma le meli.
Ua atili ona le maua se toomaga o le tamaitai aua a mafaufau i upu alofa na folafola ane e Mativa, ona tamau lea o le pine ua faamau faailogaina ai lona talitonuga, e toe foi mai lava le tama ma e sili ai ona onosai e pei o le onosai o Iopu sa tofotofoina i tiga o le olaga.
Ua aapa le tamaitai i le pito o lona ieafu ua tau too too ai ona loimata. Ua manatua e le teine le pese a le Tiamaa lea sa tusia e Vili Leilua Ieru, ona faaleleva lea o ona mafaufauga ae lafoai lona agaga sei vaimalu e upu o le pese, ma tua i ai lona mafatia, ae paga lea ua atili ai ona tagi aua, se pese foi ina a faamomoiloto, aemaise lava i le amataga lea e faapea ai upu a le fatupese,
Le vaalele ua alu ae
Lou fatu pei a mate
Gogosina alofa sei tau sue ane
Fia alu atu fia tepa tasi
Nai ou foliga matalasi
Lou alofa suamalie faaniuaati
O le taeao po lava o le aso na sosoo ai sa alu ane ai Tala ma faaoo ane le tusi ia Maumea. O Tala, o le uo mamae lava a Mativa, ma e pei o se uso moni ia te ia. O se tagata atamai tele, ae o ona vaivaiga lava o le itupa vaivai.
E poto e fai ana tala e mailei ai tamaitai ina ia faamalie ai manaoga leaga o lona loto, ma tali ai le malase o le olaga soonafai, e pei o le eleele e le malie i vai. Na faafetai ane nei le tamaitai ona ia savali loa lea i lona potu ma lona manatu e lau ai lana tusi i se vaega e le o iloa atu ai o ia e se tagata. Na saofai ifo nei le teine i lona moega ona ia tatala lea o le teutusi ma atama loa ona lau upu o loo tusia i le laupepa.
“Mo Maumea lau manamea e toatasi. Paga le faigata o nei lagona ua lofia ai a’u, a o faasauni e folau ese atu ma si o tatou atunuu. Atonu ai e faigofie ia te oe ona e nofo toatasi, ae mo a’u ou te tautino atu ua oona lenei ipu ua ou inuina.
Malie lou loto lau pele, ona o nei fuafuaga uma ua fai, o le finagalo lava a ou matua, e ui ina ou te le o fia alu ae tuua oe le ua avaga i ai lo’u ola faatama. Atonu o lena e te iloa lo’u faamaoni i upu uma sa ou fai atu, ma lau folafolaga e tuuoti le ta mafutaga”.
“Mea lou au, ou te tatalo atu ina ia e alofagia le ta faigauo. E ui lava ina o lea ua alu ese atu lou tino, ae o lou loto atoa o loo nofo ma oe. Pau a lenei ia e tausi ma le faamaoni i upu sa e fai mai, ua na o a’u foi i lou agaga e faavavau.
O le a ou alu ma lo’u talitonuga e le toe faaluaina e se tasi lo‘u nofoaga i lou olaga, ma ou te toe tautino atu foi, e le sui tulaga se isi i le nofoa ua uma ona sausauina e le alofa, e te nofotupu ai i le va o lou fatu ma ou totoga.
“Tapuai maia ae sei tuu mai au e faataunuu le manao a nai ou matua. A alu alu foi suaga o le vaatele o fea o le a to’a i ai le fafati o peau o le sami, ou te toe foi mai lava e saili oe lau uteitifa ina ia ta faatasi. Ae o alofa na, o alofa foi nei.
O alofaaga mo oe e le mavae, ou te teufatuina pea aua pe a oo ina ou manava, o le a puaina mai ai le ola e faamalosi i lou agaga a o ta valavala”.
Tofa loa
O Mativa
E leai se aoga mo oe la’u tausala.
Na pei o le salalau o le faata ua tae le nuti ninii o le fatu o le teine ina ua uma ona ia lauina le tusi mai i si ana paaga. Ua toe faaopoopo ai le isi mamafatu o lana avega, ae ua manumalo fautuaga o loo faaleo mai e le laupepa. “Ia e faamaoni, ia e onosai, tautuana ma oe au upu sa e folafola”.
E pei o siuleo ia o loo ua faalototele mai ia Maumea, ma ua fai lea ma ala e tafia malie ese atu ai le ao sa taufaamatau mai i ona luga, o le loto masalosalo ma fesili le faamalieina.
Na taunuu le vaalele a Mativa i le malaevaalele ona ia savali lea i le itu o loo faatali ai atopau ma umu, ona piki lea ma agai atu i le vaega e siaki ai uta ma savali atu ai i fafo. Na ese le faalogo a le tama i ona tino, aua e pei o loo savali i totonu o se pusa aisa i le malulu tele o Aukilani.
E oso atu Mativa i fafo i le vaega o loo iai le au faatalivaa o loo tutu mai ai le faifeau o Solinuu ma si ona faletua ma le la tama teine o Sinatala pe tusa ma le 18 tausaga le matua. O tua atu o le laina lea, o loo tutu mai ai se isi foi teine e foliga e tausaga tutusa ma le afafine o le faifeau, ma se tamaititi 3 tausaga, ae o le tamaitai lea o Rosalia o loo nofo i le fale o le faifeau e fai ma uso o Sinatala, lea o loo tu ma uu le lima o Tili, le atalii laititi o Solinuu.
O le vaai a Mativa, se teine foi ina a lalelei o Rosalia e ui ina e na te le o iloaina lona igoa, ae o lona fuaitino e umiumi faasasao ma si ona laulu seea e pau mai i lona suilapalapa. O ona foliga e le faatusalia foi laufofoga o Maumea, aua e pei o se afakasi i lona fika ma ona mata e pei e lanumoana.
Na ona savali mai lava o le faifeau faafeiloai le tama ona savavali sao loa lea i le taavale ma malaga ese atu loa i le fale.
E taunuu atu ua vela mai le kuka a isi teine o le ekalesia sa faatonu e le faifeau ina ia gasese vave se meaai aua le malaga, ma o le taimi lava na taunuu ai i le fale na o sao ai lava i luga o le laulau ma fai loa ma le taumafataga.
O le afiafi o le aso lea na fai ai aoga pese o le pese lotu a le ekalesia aua le Me tuufaatasi a le Pulega lea e faia i le falesa a le susuga i le Toeaina i Magele i le faaiuga o le masina, ma e le o se tapenaga faigofie foi lea o le a alo atu i ai le aufaipese, aua a tau loa le Me, e pei e ave uma i ai le fai mea lelei a aulotu, aemaise lava aufaipese togia mo le lagiina o pese o le sauniga aua le Me tuufaatasi a le Pulega.
O le isi foi itu, ua iloa lelei lava e le ekalesia, o Solinuu e le taitai ona manao i se mea faaletonu.
E atoa lelei le afa itula o faatalitali le aufaipese i le latou ta piano e lei alu atu lava, ona tonu loa lea i le finagalo o le faifeau, e sili ai ona malolo ma faatuua pese mo le afiafi lea aua e leai se aoga e fai ai e le o lava atu le ta laau.
Na lagona le le fiafia o Solinuu aua sa matua manaia le faatumulia o le aufaipese i le aso lea i le latou faaaoaoga, ae o lea ua le alu atu le alii faipese o Faleapa.
Na valaau ane nei le faifeau i le isi tamaloa o le aulotu ua leva ona faipese pe le mafai ona ia alu ane e tau a ina fai pese aua o loo iai foi lana kopi o nota lea sa tusia e Faleapa aua le aoina o leo ma le fati o le pese, peitai na lei mafai e si tama lea ona o loo galo lana vaaiga i le fale e mafai ai ona ia faitauina le tusi nota.
A o tu pea le alii faifeau ma tau tomanatu i se tonu o le a fai, ae musumusu atu loa ma lona afafine, “Dad la e fai mai Mativa pe mafai ona aveatu lau kopi o le pese sei tilotilo ai faamolemole”.
E lei tuuina ane e le faifeau le kopi i le teine, ae ua ia valaau ane nei ia Mativa ina ia savali atu i luma ma fesili loa i ai pe iloa ta le piano. E leai se tali a le tama, ae ua na ona ia saofai ifo nei i le nofoa o le piano ma tilotilo i le kopi o le pese, ona tuu loa lea o ona tamatamailima i ki o le laau ma amata loa ona ta.
Na matua ofo le faifeau i le lelei o le ta a Mativa ae o le taimi lea ua le toe emo mata a le aufaipese aua ua na o le sioa ma le ofo tele foi i le manaia o le sosolo malie o le fati o le pese lea e ta atu e Mativa, ae leai foi ma se isi o i latou e iloa pe masani pe o ai lenei alii.
E fetaui a la le ea ae i luga o le alii ma tilotilo atu i le aufaipese, ae tau tonu atu lava lana vaai ia Rosalia o loo tilotilo sa’o mai lava i ona mata.
E faia pea
