Tusia: PLP
E faatalofa atu i le paia ma le mamalu o le aufaitau i lenei foi vaiaso. Faamalo le onosai mai, aemaise lava i latou o loo fiafia i lenei itulau. Ia ae alo maia o lenei foi o le a sosoo atu le tatou tala faasolo.
Ia manatua foi na faagata mai le tatou tala i le vaiaso talu ai i le taimi lea sa faagalegale moe ai le tamaitai o Maumea ma faafuasei ai loa ona fai lana miti fai mai o le tagata lea e faamalumalu atu i ona luga, ae usi mai loa lau faitau.
Na lei talitonu le tamaitai o Maumea ina ua tau le po i lona alafau ma ia faalogoina se siuleo o taufagu atu ia te ia ina ia nofo i luga, ae o le taimi lea o loo ua malomaloa ai lona lafo o upu masoa i le tagata lea sa taoto atu i ona luga, e ui lava ua na o se miti i ona mafaufauga.
O lona tei ae i le taufagu a le tagata lea na toetoe a nofo ai lona fatu ina ua ia pupula lelei ae ma ia iloa ai Mativa lea e saofai i le pito o le sofa lea o loo faagaulua ai. “Sole, na faapefea ona e sao mai, ua toeititi ona iloa mai lea o oe e lo’u tama ma le matou aiga”.
O le sa’i ane lea a le tamaitai ma ua avea ai upu malolosi ma ana faafeiloai, e ui i lona loto o le a oti i le fia tago atu e fusi mai lana manamea ma faaulufale i le lalolagi o loo moomoo uma i ai tupulaga tama o le olaga nei.
“Sheeeeeeeeeeeee, aua e te pisa tele. Ou te ofo i sou le alofa ia te au ma ta tuugatala sa fai. E te iloa oe o lea ua le o toe tele ni itula ona alu ese lea o le vaalele ae o lenei lava ou te fiu e faatali mai oe.
O lona uiga ea ua sui lou mafaufau ma ita. Fai mai sau tala ona ou alu ai lea ma le malie o lou loto, tusa lava pe ou te pologa, ae o le a ou inu i le oona ma le matuitui tiga o lo’u alofa”.
O le faagauloto o tala a Mativa na fatialofa ai le tamaitai e pei o le igoa o le tamaloa Lepa.
Ua liusuavaia lona agaga, ae malemo lona fatu i le loloto o le faamaoni o le tama ua ia tauto i ai o le a avea ma ana tautoga tumau e oo i le faavavau.
Ma le isi itu, ua toee lona agaga i le lototele o si ana pele ma le oo atu i le latou fale e aunoa ma se fefe i ona matua aemaise ai o ona tuagane.
Na atili ai ona pine i le mafaufau o Maumea le alofa moni o Mativa mo ia aua ana o se isi tama, e le taitai ona alu atu i le latou fanua, aemaise ai o lea faatoa pogisa.
Na nofo ae nei i luga le tamaitai ona toe aofai ane lea o lona pito ie ma sulu faamau lelei, ona ia faapea atu lea i le tama i si ona leo malu.
“Tiva lau pele, aua e te faapena. Soia e te saunoa mai i na upu ua atili ai ona faaopoopo le mamafatu o la’u avega o loo amo nei.
Ae vaai oe, e le lava se taimi e faamatala atu ai le mea na tupu ua mafua ai ona le taunuu a ta tuugatala. Ae afai lava e moni lou alofa ia te au ona sauni lea o lau malaga.
Ua tatau foi ona e alu e te sauni mo le malaevaalele ma toe siaki uma nisi au tapenaga ina ia aua nei iai se mea e faaletonu o lau malaga.
Ou te tauto atu i luma o le Atua Soifua, e le faaluaina e se tasi lou loto mai ia te oe lau pele. Sa ou faamaualuga lava o le afiafi lenei o le a ou ofoina atu ai lau meaalofa mo oe, ma ou te talitonu foi o lena lava sa e sau sauni e sapaia lou tagata atoa i lenei afiafi ona e malaga ai lea.
Ae malie maia lou loto, sau ina alu. Ou te teumaluina pea lau meaalofa seia oo i le taimi atoatoa mai le Atua, ona ou momoli atu lea faatasi ma lou fatu, o lou tino ma lou agaga atoa.
Pe o le a foi faaosoosoga o le a feagai ma lou ola, ou te tautino atu e leai se toa e na te manumaloina lou loto sei vagana ai lava lou faatali atu ia te oe le ua avaga i ai lou agaga”.
Na pei o le naunau o le aila i le vaitafe le faananau atu o le loto o Mativa i le tausala, aua e leai ma se sese o tala a Maumea lea sa fai mai. O le upu moni lava sa faamaualuga lava le alii o le a ia sopoia le vasa ma le moana o loo tataa ai i’a feai i le po lea, peitai ua le mafai ni gaioiga tele ona e fai o lea e matamata ita mai le fili aua o lea e i totonu o le faasee o le faleapa i tua o le aiga, ae o loo faamalumalu mai le taimi ua toetoe a sola atu, ona misi lea o lana vaalele mo Niu Sila.
Ua tonu i le mafaufau o le alii ua sili ai ia ona faamavae ona alu ai lea. E lei toe faatali Mativa ae na ona punou ifo lava o le tama ma sogi atu loa i laufofoga o lana manamea.
O le taimi muamua lea faatoa fepaiai ai o la laugutu, aua talu ona la feoai mai, e feiloai lava ma faatofa i le sogi i le alafau. Tailo foi i le ai a le pagota fiaai ina ua mapu mai galuega fita o le aso, pe maua le sasau o le alii ina ua maua ni nai minute e faatino ai le kisi alofa, aua na pei o le mamau o ave o le fee le papai atu o ona laugutu i laufofoga sulaoa o le tamaitai, ona tuufau lea o o la laulaufaiva e fetaliai seia oo ina gase mo sina taimi puupuu, ona toe faaauau ai lea mo sina taimi le tumau, ma o la faatofa ai loa.
E savali ese atu Mativa ae o lona loto ua leiloa le ituaiga o fiafia lea ua oo i ai. E pei lava e pine auro i taaloga o le Vasa Pasefika lea sa faia i Samoa i le 2007, ina ua ia iloa ua kisi i laufofoga o le tamaitai o Maumea.
Ua tasi foi i lona loto e tusa lava pe le papai i vai o le tama, ae o lea ua taele i le ana o loo lafi ai le tupua faamalepe aiga.
E leai se vaipanoa o le tali mai a le tausala na galo i neura o lona tino, aua e lei taliina i ni vai e Maumea le kisi alofa a lana paaga.
Ua moni ai le pese a Faanana Jerome Grey: “E fai foi o lena a o lenei”. Na matua fuli le tamaitai e ta’u atu ia Mativa, e le faavasivasi foi le kisi a le tausala mai le Tuamasaga.
E oo atu le alii i le latou fale ae fetaui ma le ote a lona tina, “Sole, o fea lava sa e iai? Sei vaai o lea o le a ka le kaimi ae o lega faakoa e kaoga mai”.
“Kiagi age laia e kope lau kaele ma e alu age e faakopekope i le malaevaalele. A kou o aku ua alu le vaalele oga e vaai lea i le mea o le a fai ia ke oe. Kaigoigo e, poo fea lava sa aifafasa solo ai. Oi, oi, oi. Se o le mea lava lea e kupu ai le pisa. Ia o le a lau feau o la ga alu le kama e faakofa i laga keige”. O le oso ane lea a le toeaina le tama o Mativa ma olo lona papatua i le pou o le fale e valu ai ona o le mageso.
“O a keige, e ke fai mai a oe ia o keige. A ou mauaiga le keige lega e vaavaai i ai ou ke makuai okiiga le ulu faapoo i le seleulu. Se ua soo uma a le kama legei i lou koeaiga amoso. Ai aga leai lo’u faavalevalea ma lo’u gofo ia oe semagu poo pegei e leai sou koalua”.
Ua savali i tua le alii o Mativa ma pa lana ata i tala a nai ona matua. Ua taele toai lona tino, ae o lona loto e musu e faasusu ina nei tafia ese atu le manogi o Maumea lea e piipii i ona laugutu.
Na semanu a tuai le tama i le malaevaalele aua e fetaui lava le taunuu atu ae alu loa ma le valaauga mulimuli.
Na faasolo nei le faamavae i nai ona aiga, ona ia aapa lea i lana ato faafafa ma to ae se teutusi, ona ia tuu lea i lima o lana uo tama o Tala ma ia faapea atu i ai. “Tala, tago e ave le tusi lena ia Maumea taeao, o le tusi sa ou tusiaina anapo ou te faamavae i ai i le ma mafutaga”.
E faia pea
