Na maua lelei atu i taliga o Pelema le siuleo pei e tei o le teine o Rosina ‘auoi e tauaso!’ a ua sasala foi i lona isu le manogi suamalie o le fagu sausau lea e masani ona manogi ai lana manamea, lona uiga o lea ua lalata atu ia te ia. Ua tu sao nei Pelema, e pei ua faasaga tonu mai e faafetaiai le tagata lea sa ia iloa lava na savali atu e faafetaui o ia.
“Sina, ua leva ona e misia au?” E lei tali le teine a ua matua tu faasasao lava ma sioa atu i le tama lea ua toe tasi le mita la fepaiai. Ua ataata Pelema ma taumafai e sii mai lona lima agavale e pei o loo aioi mai ia Rosina, e tuu atu lona lima sei pipii mai ia te ia. Peitai o loo tu pea Rosina ma sioa ia Pelema.
“Na ou faalogo i le tala ua e pupula, lea ua ou sau fiafia ai loa aua o lona uiga ua taunuu lau folafolaga na fai mai i le tele o aso. Lea ua e iloa mai au ma e vaai i le matagofie o mea uma, pe o le a ta faaipoipo loa?”
Na pau lava upu na toe lagona atu ai e Pelema le leo sa masani ona ia faalogo i ai i aso uma, “Oi faapea lava ika e ke lē kauaso. Ia e sili pe a kuu.
Ou ke le fia gofo i se kauaso.” Na lagona e le tama ua toe liliu Rosina ma alu ese mai ia te ia, ona tu lea ma faasaga sao mai i ai ona foliga, e peiseai o loo ia iloa lelei mai le fuli atu o le papatua o le tamaitai.
Ua maligi loimata o le tama a o tu pea mo ni nai minute, ona toe faamolemole lea i le avetaavale sei momoli o ia i lona fale. Paga le matuitui o lagona ua lofituina ai si tama! Na taunuu le tama i lona fale, ma faasolo ona mafaufauga i le ituaiga o alofa sa alofa ai Rosina ia te ia i nei mau aso e tele.
E atoa le lua vaiaso e lei toe maua se fesootaiga a Pelema ma Rosina. Mulimuli ane na toe maua e Rosina se isi tusi mai le meli, ma na ia tatala ma iloa ai o le tusi mai ia Pelema.
E umī le tusi, ae sa taumafai le teine e tulituliloa upu faaiu ma iloa ai, ua malaga ese atu nei Pelema mai lo latou atunuu, ae le o tau maia le mea ua agai i ai.
Ae i le faaiuga lava o le tusi o loo faapea mai ai upu faatofa a le tama, “Rosina, ou te tatalo ia manuia lou olaga, ma ia taulau uma ou moomooga sa e moemiti i ai a o e lei pupula. Pau lava lau talosaga ia te oe lau pele, ia e tausi ma faapelepele i ou mata na ua ou foai atu ma lou loto atoa mo oe, ina ia e maua le fiafiaga sa e misia i le tele o aso.”
Na faateia le ulugalii i le faalogo mai o loo tagi faataitaiō atu le la tama i lona potu, ma ina ua oo ane na la iloa ai le tusi mai ia Pelema lea e uu i le lima o le teine. Ae paga lea, ua masaa le ipuvai, ua le toe maua mai Pelema.
