Sa tatala e lona tina le tusi ma lau i lana tama, ma na faateia le fafine i le lau atu, o se faatonuga mai se tasi o alii fomai iloga i taotoga o mata i lea atunuu, o loo faatonu ane ai le oo atu o Rosina i le falemai i le vaiaso e sosoo ai, mo le faia o taotoga i ona mata.
Na faailoa ane foi i le tusi, o se tagata agalelei na ia foai patino atu lava ona mata mo le teine lenei, peitai o aiaiga a le falemai e le mafai ai ona faailoa ane ia Rosina ma lona aiga lenei Samaria agalelei.
Na faia le taotoga ma na iu manuia peitai sa taofia le teine i le falemai mo le isi lua vaiaso sei malosi lelei ma sei faifai malie ona tatala fusi o ona mata, ona o le uluai taimi lea o le a mafai ai ona pupula ona mata ma iloa le malamalama. Maeu se fiafiaga o le tamaitai o Rosina ina ua iu ina taunuu ona moomooga ua leva ona moemiti i ai.
Ua tea i tua Rosina i lona aiga, ma ua matua atoatoa le fiafia o le teine. Ua na o le moomoo ua tuai ona toe foi mai si ana uo o Pelema sei vaai i le suiga ua iai nei o ia, ma sei vaai atu foi o ia i foliga lalelei o lana uo, lea e toatele tagata o lona aiga e fai soo ane ai ia te ia, o Pelema o se alii aulelei tele ma le tino malosi.
Ua oo i le aso na taua e Pelema e toe foi ane ai lana malaga, ma ua le iloga se mea e teme solo i ai Rosina i le faaatoaina o ana teuga faaaulelei aua le faafeiloaia o Pelema.
Na taunuu ane le taavale ma na iloa mamao atu e Rosina le oso i fafo o le alii avetaavale ma taamilo mai le itu o loo nofo ai Pelema, ma ua atili ai ona valea le ulu o le teine i le vaai atu, oka se tino lelei o le tagata lea e saofai i le pito a le pasese, ma i le mafaufau o Rosina, lona uiga o Pelema o se tagata e maualuga sona tulaga i lana galuega, aua o lea e fai faapitoa lana avetaavale e tatalaina lona faitotoa.
Na teleai mai Rosina i fafo mai le fale, ae na pei e liai atu e se isi se mea mamafa ma taia ai foliga o le tamaitai, lea na toetoe ai pau ina ua tu faafuasei i le vaai mai, e muamua tau ta ta mai i fafo le tootoo a o tau pipii mai Pelema i le alii avetaavale o loo tu i ona luma.
