E Tauaso le Alofa (15)

Vaega 15

O le a taoto pea ia le Fiso ma ona lau i ou paia maualuga Samoa. O ou sa ma ou faiga o le a le toe oo iai se faamatalaga aua o Samoa o le atunuu ua uma ona tofi.
E talatau Toga, ae talatofi si o tatou atunuu, tulou, tulou, tulou, tulouna lava. Ae avea ia o lenei foi avanoa taua e toe faatalofa atu ai i le mamalu o si o le aufaitau o loo faapea ona tulituli mai pea le sooga o le tatou tala faasolo i lea vaiaso ma lea vaiaso. Ia usi maia ma alo mai i lau faitau o lenei o le a toe sosoo atu foi le Vaega 15 o le tatou tala, “E tauaso le alofa”.
Na gata mai le tatou tala i le vaiaso na tea nei i le taimi lea sa fai ai le talanoaga a le tamaitai o Sinatala ma le tama o Mativa atoa ai ma Rosalia ina ua maua taitaia atu lava e Sinatala le taafifili mai a le toalua lea i luga o le moega ae o loo matala lelei lava le faitotoa.
Na pei o se maliu faigaupu a le toatolu lea i luma o le potu malolo, aemaise ai o le tautalaga a le teine o Sinatala ma lona fofola atu lea o lona le malie i le tama o Mativa ma le teine o Rosalia.
O le mea moni, e lei faapea ua ita Sinatala ona e pei e fua lona loto, ae ua mafua ona o le faatamala ma le faiga o nei taafifiliga i le aoteatea ma le faitotoa i le le tapuniina. Na uma le tautalaga a le tama o Mativa ona sosoo lea ma le faatoesega a Rosalia ma sa faaiu i le maligi o ona loimata. Na savali ane nei le teine o Sinatala ma faatu i luga ona faapea atu lea i ai e nofo i luga o le nofoa.
“Ua lelei o lea ua ou faalogo atu ia te oulua ma lua tautinoga i le aso lenei. O le mea sili e le o iai nisi ua o latou iloa lenei mea ua tupu, aua e na o tatou lava lea e iinei.
O le itu foi e faafetai ai i le Alii, ona o lea e tulai mai lenei mataupu ae e le o i i le susuga i le faafeagaiga ma lona faletua. Ae tatou faia o lena. Aua nei lua faapea ou te ita pe leaga foi lou loto ia te oulua. E leai, ma e mamao foi ma au se tulaga faapena aua e pule lava oulua ia ouloua filifiliga.
“Na pau lava le itu lea na mafua ai nei ona lagona lou faanoanoa ma lou le fiafia, ona o le fale lenei a le ekalesia o loo tatou iai. Afai e lua te manatu e lua te toe fia eva, ia ona lua o lea e vaai se togavao e lua te eva ai e lelei lena e pule ai a oulua e aunoa ma se isi e faitio ma aia atu fua.
Ae o le lua omai lea ma lua faapena i totonu o le fale lenei, e le mafai ona fai lena ituaiga uiga aua a maua mai e se tasi o le aulotu, o lona uiga o le a faaletonu atu ai ma le galuega a nai ou matua. Ae lelei ona lua o e vaai poo a isi feau e masani ai tatou e fai, ma tatou o e tapena se meaai aua toeititi foi taunuu mai le faifeau ia ma le isi mea o lea foi ua solosolo malie mai le pogisa”.
Na uma ona fai atu le tala a le teine ona tu lea i luga o Rosalia ma fusi mai ona tagi ai a lea ma fusi mai le ua o Sinatala. Na alu ese atu Rosalia ae tu atu i luga Mativa ma fai lava foi le taga lea e tasi ona savali lea agai i tua i lona potu ma nofonofo ai mo ni nai minute.
Ua pogisa le mafaufau o le tama. Ua toe tepa ona manatu i le tulaga na o la faia a o lea e pupula mata o le afafine o le faifeau, ona oso lea o lona maasiasi ma ua sau ai ma lagona o le fia alu i Samoa.
Ua taumasuasua lagona o le matamuli ma le faalumaina ina ua sola le fili sa taufaaosooso i tuinanauga leaga o le tino, ona pei lea o le atamai o le meanoa aua ua leai se mamalu e tua i ai upu ma le vaaiga o mata. O le loto o Mativa na pau lava le tulaga lea o loo iai o le fia mou i se mea mamao.
E oo lava foi i le toe tilotilo atu i foliga o Rosalia ua matua mamao lava ma ua le toe fia vaai atu foi o nofo pe fealualuai solo mai. Na pau le mea na tu vave mai i le tama o lona toe fia alu lea i Samoa. Ua pei o le a inoa le toe tau faafuasei o lona mafaufau i foliga o si ana uo o Maumea o loo faamuli mai i fanua.
Ua ia toe manatua a la toe upu ma a la tautinoga i le taimi mulimuli na o la faamavae ai, ona toe oso lea o lona alofa i le teine.
Ua sola atu lava lagona o le fiafia o le tama, ae sei vagana ai musumusuga o le loto ua lilofia i le faanoanoa o loo faapea ona fetuleni mai ma ua atili ai ona pei o se tagata e leai se faamoemoe.
Na momotu faafuasei le faasologa o mafaufauga o Mativa ina ua tatagi le telefoni ma valaau mai Sinatala o Taua lea o loo fia talanoa mai ia te ia.
Sei o tatou liliu atu i Samoa i le tamaitai o Maumea pe o a mai. Ia manatua foi, na gata mai le tatou tala i Samoa i le taimi lea sa savali ese atu ai Maumea mai le fale o le aiga o le alii o Tala ina ua uma le la talanoaga ma Tala lea sa fai i tua o le umukuka.
E savali ese le teine ae taoto ifo i lalo le tama ma faasolosolo ona mafaufauga i lana gaioiga sa fai, peitai o lea ua taui mai e le teine i le loto faamagalo ma le alofa ia te ia aua e musu ina nei tei ua tauleagaina lona igoa.
Na matua ese le faalogo a le tama o Tala i ona tino, aemaise ai o lona lagonaina lea o ni faalogona e lei oo muamua i ai. O Tala e le o se tagata e fautuaina i le tele o taimi. E ulavale faatama e pei e le kea kea ma e le ano i le tele o tuualalo e fai atu ia te ia.
E oo lava foi i nai ona matua e fiu e otegia i isi taimi e pei lava o le timu e pau i le tua o le pato. O ona uiga ia e inosia ai o ia e nisi, peitai i se isi foi itu, o ia o se tagata e galue malosi. E le foi i se mea pe afai ua manao i ai lona loto.
E tauivi ma e le faiaina lana oso i le tele o tupulaga tama o le nuu. O se tagata faamaopopo e le gata i faamoemoga a le nuu i le itupa o taulelea, ae faapea ai foi i totonu o le ekalesia ma le autalavou o loo galue malosi ai.
O itu lelei ia o le tama e faigata ai ona faagalo. O le mea foi lea e tele ai lava teine e tau solo ai lona igoa, aua e see gofie lava le itupa vaivai i le gaioi ma le gutu poto o le alii i le faiga o feau ma le folafolaina o mea faa-Samoa.
O le mea foi lea ua pei ai lava le itupa vaivai o se paga masani e faiaina ai le alii i le tele o taimi, aua ua suamalie i lona olaga le fagota ai i le ogasami lea. Peitai o le taimi lea ua taotooto ai nei Tala ma faasolo ona mafaufauga i le mataga o le mea na semanu e oo i ai talu talu ai lana osofaiga lea sa fai ia Maumea ona lagona lea o lona salamo.
Ua tonu i lona mafaufau o lona avanoa lelei lea e tatau ai loa ona lafoai vaivaiga faatama o loo toilalo soo ai, ae tuli i luma sona ai aua lona olaga aua e le tumau ai se tasi i se mea se tasi.
E le gata i lea ua toe mafaufau le alii, e leiloa pe feololo atu le mea lea o lea ua faamagalo o ia e le teine nai lo se isi mea ogaoga e toe faaono tulai mai i le lumanai pe afai ae toe tupu. O lona uiga e sili ai loa lava ona salamo semanu o lea ua ia taulimaina lona avanoa.
O le uma o faigalotu o le afiafi lea na tu ai loa i luga le alii ma toe savali i le fale o Maumea sei tafao ai, ae o le auga lava o lana savali, o le toe fia maua lava lea o se taimi sei toe faaleo atu ai i le teine lana faatoesega aua ua ia iloa lona sese, ma o le a tauto ai foi ia Maumea e le toe faaluaina lana measese sa fai.
E taunuu atu le tama ae o le taimi lea o loo valaau solo le tama o Maumea i le lana fanau ina ia o atu i totonu o le fale o lea o le a fai le lotu.
Na ona saofai ifo lava o le tama i le pito i tua o le fale ae to loa ma le pese o le lotu.

“Lou Alii ua faafetai
I lou saga alofa mai
Ua iloa tino ai
I lou tausi pea mai.

O lou alofa, O lou alofa, O lou alofa e sili lava lea x2
Na uma le pese ona punou ifo lea o le tamā o Maumea ma fai le tatalo. Se toeaina foi ina a tatalo umi! Ae e fai lava lenei tatalo, a o le taimi lea i le mafaufau o Tala ua tuai ia ona uma ae sei faasaosao sana tala i le teine o Maumea. O Maumea foi latou ia, ua le lelei sana lotu i le tatavale o lona fatu pe aisea ua toe alu atu ai Tala i le latou fale ua po.
Na ona amene lava o le tatalo faataga savali ane loa ma Maumea i le itu lea e nofo atu ai i tua Tala, ona musumusu atu lea, “Sole o fea a e toe alu i ai”. “Mea, na ou sau ia te oe. Malie lou finagalo e iai si mataupu lea ua ou toe sau ai, ae faamolemole pe mafai ona ta talanoa”.

E faia pea