Vaega 14
E toe faatalofa atu i le mamalu o le aufaitau i lenei foi vaiaso, aemaise lava o paaga masani a le tatou Fagogo e pei ona taumafai atu i vaiaso uma mo le faamalieina lava o lau faitau mai.
E manatu o loo manuia mai lo outou paia i le tausiga alofa a lo tatou Atua. Ia malo lava le tauatai ma le soifua manuia. Ae alo mai loa o lenei o le a toe sosoo atu le tatou tala faasolo poo le tatou Fagogo, “E tauaso le alofa”.
Na pau mai le tatou tala i le vaiaso lea na tea i le taimi sa talanoa ai Mativa ma le tamaitai o Rosalia i totonu o le potu o le teine. E ui i se taofi mamau o Rosalia, peitai na vave lava ona gau ina ua ia faalogoina le fegaugauai mai o le leo o le tama atoa ai ma le poto o le alii i le faiga o ana upu.
Na vave ona sola le atamai o le tamaitai ina ua ia faalogoina le uluulu o lagona o loo ia faalogoina e le gata i tala a Mativa, ae o le manaia o lana faalogo i le milimiliina o lona papatua.
Na iloa lelei lava e le tama ua ifo toele le fia tausi mamalu o le teine, ona ia tago lea ua tuu tuu atu lona ulu ma taumafai e faalatalata atu i foliga o Rosalia. E tea mai ao o le lagi ae lele lele ane i luga lagona o le tama ina ua ia iloa ua matala le faitotoa mo ia. O le teine foi latou ia o Rosalia ua vave ona ia toe manatua lagona na oo i ai ona tino i le taimi na kisi atu ai Taua ia te ia, ma ua ia faananau foi ina ia toe oo i ai.
O le isi foi mea, o lea ua maua lona avanoa e kisi ai ia Mativa ma ua oso lona fia iloaina pe faamata e tutusa ma le kisi a Taua. O lagona ia ua fetaomi mai i le teine na faigofie ai ona ia taliaina le papai lemu atu o foliga o le tama seia oo lava ina fepaiai o la laugutu.
E lei toe faatafa Rosalia ae ua to atu uma lona tagata atoa e pule ai le tama ta piano. E fai foi o le sasau atu o le tama, ae e lei tali mai i ni vai le kisi a le teine.
Ua faataliaga e Mativa Rosalia i luga o lona moega ona ia tago lea ua mili atu vae o le teine, ae o le taimi lea e le o mapu le galuega sailiili a lona laulaufaiva ma ua pei ai o se faavevela i se fagaofe toe toe a faapa e pei ona masani ai vaitau o le Kerisimasi.
E lei teena e Rosalia se taga e tasi na fai atu e le tama o Mativa ia te ia a o taumafai pea le taulealea ina ia sue atu sona ala i le ana o tanifa feai.
O nei faiga uma, ua manumalo lava le fili ma le tiapolo o tuinanauga le faamalieina. O le agasala uliuli ua aunoa ma se toe manatu pe o le a le taimi o le aso lea e fai ai, ae pe o le a foi le taimi e toe potopoto ane ai le aiga. E oo lava i le faitotoa ua le toe kea lava se isi sei toe vaai pe o loka, ae pe o matala foi.
Ua na o le pau lava mafaufauga ia ua lolofi ane o le fagota loa i le tai loloto ma faauma atu ai lagona fia faataunuu o le isi i le tasi.
Se mea ina a leaga o le toilalo popo i faaosoosoga a le alii o lenei lalolagi. Leitioa foi le Tusi Paia a fai mai o le tiapolo e na ona sau e fasioti, faaleaga ma faaumatia le tagata.
Aua e luluti lagona o le tuinanau valea a le toalua lea i luga o le moega, ae o loo tu lelei Sinatala i le faitotoa ma sioa atu i nei faiga o loo fai mai.
E sauni loa le tama o le a faaofi lona vaa i le tuaau, ae tei loa i le tilotilo mai i le faitotoa ma ia iloa mai le teine lea e matua tu lelei lava ma matai atu i laua.
Na pei o le a inoa le solovi ifo i lalo o le tama ma saofai ane i autafa o Rosalia ona punou lea e pei o le mamoe ua taitai e sele lona fulufulu seivaeane le mamalu o le aufaitau.
O lagona o le fia faiaiga ua matua sola lava ma ua le ese ma le tagata ua avea le faamoemoe. Ua gugu e pei o Sakaria aua ua faigata ona talitonu i le vaaiga lea e tilotilo mai i ai.
E fai la o le tama o Mativa, ae o le teine o Rosalia ua leiloa pe nofo i luga pe taoto ai pea ma faasasao e pei o se tagata e leaga le ulu, aua o le taimi lava na oso ese ai i autafa le tama mai ona luga, o le taimi foi lea na faasaga ane ai i le faitotoa ma ia iloa atu ai Sinatala lea o loo tu lelei lava ma matamata atu e pei o la ua toe sioa i faafiafiaga a le Kolisi o Faiaoga i Malifa.
Ua le mautonu le teine i sana tala o le a fai, aua ua matua faatumulia o ia i le ma. E faigata foi ona ia talitonu e maua atu i laua e Sinatala o taafifili mai ma le agasala. “Oi, sega oulua ia. Manaia le mea o loo lua fai.
Oe lena Rosalia, o le mea la lea e te tali mai ai le agalelei atu a ou matua ma le matou aiga ia te oe? Sei vaai o lea e lei iai ni taeao o Makiva iinei i Niu Sila a o lea ua oo i ai au faiga faakevolo. Oka suga ou ke ofo i le mea lea ua e faia.
Oi, a avaku le alofa o Misi ua fai ma mea e soli ai le kogakapisi. Ae o oe foi ia Makiva, e ke le o iloaiga lava o le fale o le faifeau lea e fai ai a lua faiga? Ua leai lava gisi keige o le auloku e ke alu i ai ae o lea ua e koe sau lava kuli kuki aupu legei keige.
O le a sou magaku pe a iloa e le ekalesia le mea lea ua lua faia i le fale o le galuega? Kafefe ae iloa, aua o le mea mogi e faalekogu aku ai fua ma le galuega a o‘u makua kalu kalu ai oulua ma lua mea valea. Ia o le a lua vaai i ai pe a omai le faifeau. Seiloga foi ou ke kalagoa i ai ma faailoa i ai oulua”.
Ua fai ifo i lalo le leo o Sinatala ona liliu lea ma savali agai i le potu malolo ma nofo nofo ai i luga o le nofoa umi ma lona mafaufau e le talitonu i nei vaaiga na ia tilotilo i ai. Na tu i luga le tama ona tago lea ua toe faamaulu lona mitiafu sa ofu ma savali ane loa i luma, ae o le taimi lea ua tago ane ai foi Rosalia ua aofai mai lona ofuvae li vaeuumi lea sa ofu i le aoga ma toe faamaulu, aua o loo malu pea le ieufimata o loo ufiufi ai le penina tautele na semanu e gaoia e le taulealea mai Samoa ona o le malase o faaosoosoga o lagona leaga o le tino.
Na savali ane nei Mativa ma saofai i le isi nofoa e faafesagai lelei lava ma le nofoa o loo nofo mai ai Sinatala, ona tale tasi lea ma amata atu lana faamatalaga isi ona leo tau le lagona. “Tala, faafetai atu lava mo lau saunoaga i le taimi ua sola.
Ae a o lei fai atua sau tala, ou te muamua ona ou faatoese atu ona o le tulaga e pei ona e tau mai ai. Ou te faamalie atu aua e sao lava oe i na mea uma e pei ona e fai mai, aemaise ai lava o lea e aafia ai le fale o le galuega.
Ae malie lou finagalo Tala, faamagalo mai maua. Ou te tatalo atu foi ina ia aua lava nei tuuaiina se leaga ia Rosalia, ae ia ou amoina uma tuuaiga e faasaga i lenei faaletonu ua aliae mai, aua o au lava lea na mafua ai.
O le mea lea Tala, alofa ma talia mai sau faatoesega vaivai ia te oe le tuafafine. Ae o Laloifi lenei, o a ni ou leaga, ia tanu ai iinei. Malie lou loto aua lava nei iloa e Solinuu ma lona faletua ina nei tei ua tele atu lava se isi faalavelave e faaono tulai mai.
Aemaise ai o lea e loma le faamoemoe o le ekalesia i le pese o le Me, ta te le manao lava e aliali mai lenei masei ina nei fai ma ila o le tatou taumafaiga.
Ae ou te tautino atu foi ia te oe ua uma ai i le aso lenei mea. E le toe tupu mai lava se isi mea i lo ma va ma Rosalia. Ua lava lea, ua ou iloa foi le faigata o lagona o le maasiasi”.
E uma atu le tala a Mativa ae tootuli i lalo Rosalia ma sasau atu lana faatoesega. “Tala lou uso, ou te faatoese atu ia te oe ona o le tulaga ua e tau mai ai. E leai lava se isi tala ou te fai atu aua ou te le alo i se ataata o se laau. Na pau lau upu ia e alofa ma faamagalo mai au faamolemole. E moni lava oe i tala sa e fai mai.
Ou te tuuaia foi au i lou le faautauta ua mafua ai ona e tau mai i nei faiga leaga faapenei. Ae ou te le toe faia. Ua ou salamo i le leaga o lagona o le faalumaina. Ou te aioi atu foi ia te oe ina ia e alofa aua nei iloa e o ta matua.
Aua e moni lava e le o au o se tama moni a nai ou matua, ae ua tasi lava i taua i le faatuatuaga a le nuu ua tuuina mai ia te au ina ia fai ma ou uso i le galuega. O le mea lea ia e alofa ma faamagalo mai au”.
Na uma faafuasei tala a Rosalia ina ua maligi ona loimata, ona tu mai lea o le teine o Sinatala ma faatu i luga ona fai atu lea i ai e saofai ifo i luga o le nofoa.
E faia pea
