E fiafia lava e toe faatalofa atu i le paia ma le mamalu o le aufaitau i lenei foi vaiaso. E talitonu le manatu o loo tumau pea le maualuga a le loloto o le alofa le faatuaoia a lo tatou Alii i lo outou soifua ma so tatou ola i lenei foi vaiaso.
Faamalo atu le soifua manuia, malo foi le lagi e mama. Ia ae usi mai loa lau faitau o lea foi o le a toe sosoo atu le tatou fagogo aua lava le faamalieina o lau tulituli mai i lea vaiaso ma lea vaiaso.
Na gata mai le tatou tala i le vaiaso lea na tea nei i le taimi lea sa fai ai le tusi a le alii o Tala.
O le malu o le taeao sesegi ma le oso ane o ave mafanafana o le la sa fai lea ma faalogona manaia i le alii a o nofonofo i totonu o si ona faleoo, ma ua atili ai lava ona faaosofia o ia i manatu ina ia fai lana tusi ma faauma loa.
O le auga o le tusi, o le toe fia faatoese atu lea i le teine o Maumea ma le tulaga na semanu e oo i ai i le afiafi e pei ona sa ia tau faamalosia ai ona ua lofia ia i mafaufauga o tuinanauga le faatuaoia.
Na uma ona tusi le tusi a le tama ona ia tago lea ua toe lau seia oo lava ina malie i ai lona loto ma le atoatoa, ona ia tago loa lea ua tuu i totonu o le teutusi ma tuu i luga o lana ato faafafa lea sa aluatu ma ia.
Ua aapa ane nei le tama i le fasi uamea sa sili i luga o le isi pou pito i tua o le faleoo i le ua tatao ai le tusi ina nei tei ua lelea i le matagi, ona savali ane loa lea o le a pule i lona ola.
Talofa e ia Tala, ua pogisa ona manatu lelei aua ua leai ni mafaufauga o nuuao o toe feosofi a‘e i lona mafaufau, ulu, faiai ma lona loto, ae ua na o mafaufauga o nuupo. A faliu i Sasae ua na o siuleo o le maasiasi ma le faalumaina. “Pule loa oe i lou ola aua e leai se aoga e te toe ola ai o lea ua iloa uma e tagata lou vaavaa”.
“A o sou toe fia ola ua soo le nuu i tala o oe e te toso teine”. “Se a le aoga e te toe ola ai ua e faalumaina ou matua ma lou aiga”. O siuleo uma nei ua saputu ane i le mafaufau o le tama a o savali ane ua ave ifo i fafo le maea ma amata loa ona nonoa le sele lea e tuu i le ua.
Na fiu le tama e tau nonoa le vaega lea o le sele ae e nonoa atu lava ma see le maea. O lona uiga o le maimauga o le taimi e le mafai ona mau le maea. O le faatolu ona taumafai o le tama e toso ma falō le maea ina ia mau e leai lava.
O le taimi lea na faafuasei ai ona toe tu mai i ona luma foliga o nai ona matua, ma ua pei o se ata tifaga le toe faalogo atu i le tele o a la fautuaga ma upu timai e masani ona fai pe a oo ina talanoa faamatua ane ia i latou o le fanau.
Na toe manatua e le tama se tasi o po sa fautua ane ai lona tama ia i latou ma ia faapea ane, “Aua nei iai se isi o outou e faiaina i faaosoosoga. Ae afai ae faiaina, ia aua nei toilalo ai. O le lalolagi lava ia e tumu i faaosoosoga, ae o le poto e faiaina ma toe fuataina lona ola, ae le o le faiaina ma maimau le ola aua e leai se mea e maua ai”.
Ua punou le tama ona tagi lea aua ua pei lava o lea e vaai atu i foliga o si ona tama o talanoa ane ina ua ia toe mafaufau ma le totoa i upu e pei ona sa fautua ane ai ia i latou. Ua oo i le loto o Tala uiga loloto o nei upu. Aua nei iai se tasi e faiaina, o lona uiga o loo fautua mai ina ia aua nei manumalo faaosoosoga i le olaga.
Ae o tua atu o lea fautua o loo iai ma le luitau poo le faamalosi ina ia toe maua se tali o le faafitauli. “Ae afai foi ae faiaina, ia aua nei toilalo ai”. Ua faataoto e le tama le ata o upu nei ia te ia, ona tonu lea i lona loto upu mulimuli ua fai ma faamalosiau. “O le lalolagi e tumu i faaosoosoga, ae o le poto e faiaina ma toe fuataina lona ola…”.
E lei leva lava pe a ma nai minute e lua o mafaufau pea Tala i upu nei a lona tama, ae ia faalogoina loa se tasi o valaau ane i lona igoa. “Sole Tala, ta fe fe alii i lou vave usu mai. Ua vela sau ti? Na ea ae i luga lona ulu ma ia iloa atu ai le alii o Kereta lea e savavali atu ma Petia ma uu atu a la atigi taga ma le sapelu e tasi o loo i le lima taumatau o Petia. O Kereta, o le tuagane matua lea o Maumea. Na valaau ane lava ma savavali atu agai i le faleoo o Tala.
O Tala ua le maumanatu pe o le a le uiga o le afe atu o Kereta ma Petia, poo le mea o ia o le a lau lona iuga aua ai ua tau e Maumea ia Kereta le mea na tupu. Peitai na ese lava lona faalogo i ona tino aua e fai a tala a Kereta ma pei e melo ata, e leai lava ma se suiga o ona uiga pe o ona foliga foi.
“Se e lei leva tele ona ou sau”, o le tali ane lea a Tala ma tago atu tuu le uamea ma lana tusi lea sa fai i totonu o le ato, ona aofai atu lea ma le maea ma toe tope le talatalaina. “Oi ao fea a ave i ai lena maea”?, o le toe tatao atu lea a Kereta. “Se ua ou fiu i le aina soo o le itu le la i Sasae o lau maumaga.
O le mea lea ua ou sau ai ma le maea sei tau vaai poo gafea tonu lava lea e ui mai ai puaa ia e faatamaia lau polili le la e tuaoi ma le toeaina le la i o. Ae lelei le mapu mai se sei tope se tatou suati amata ai galuega o le aso latou”.
Na savali ane nei Tala ua tatala le faitotoa o le faasee o le latou faleoo aua o ina o loo teu ai le ulo ma le tipoti o suka ma lauti ma le masima, o mea lava ia e moomia i le vao aua le gaseseina o taumafa.
Ua avane i fafo le tipoti ona ia alu lea i le kalone o loo tali ai vai ua faatumu ma tunu loa ma le ti.
E fai nei gaioiga uma ae o le fatu ua le mapu le ta ta vale aua o lea lava e popole i le tulaga na tupu i le po pe faamata ua iloa e Kereta, ma le lilo i ona manatu e lei tauina e Maumea se mea tasi.
Sei tatou liliu atu i le teine o Rosalia ma le alii o Taua ma le laua foi evaga. Na tafili saunoa le alii o Taua e faataunuu le kisi alofa i le teine o Rosalia aua ua ia iloa o lea ua maua lona avanoa.
O le teine foi latou ia, ua leai lava sei tetee atu i lenei alii faatautala aua o le taimi muamua lea faatoa afea ai e se tasi ona laugutu sulaoa lea e faavalevalea i ai le alii o Mativa.
Ua matua vaivai lava lagona faateine o Rosalia i faiga a Taua, e fai o le kisi alofa, ae ua le mapu ona lima i le sagolegole solo i le tino momosi ma le mumua o le tamaitai.
O le pisa ane o isi taavale sa paka i autafa o le taavale a Taua ma Rosalia na meia ai le teine aua e fou i lona olaga lenei ituaiga o amioga, ona tei ai a lea ua taumafai e liliu ese i le isi itu ae o se faiga ina ia tetee atu ai i le naunau sasau mai a le alii o Taua. “Lia, e iai se mea ua tupu”? “Leai Taua, ae malie ua lava ia lea ona o lea e tilotilo mai isi tagata ia taua”.
Ua fiu le alii e toe suamili atu i le teine ae ua musu moi lava. Na pau le vaega o loo augani ane ai, o le momoli lea o ia ona ua fia alu i le fale. Na ioe le tama ina ia o la o loa e momoli le teine ma agai loa ma le la taavale.
O le taimi atoa a o agai atu le taavale a Taua ma Rosalia i le auala, sa le mapu le taumafai atu pea o le alii ina ia faatumauina se mafutaga i lo la va. O upu uma lava e aumoe ai le tama i le teine na masua i le va lea a o agai atu le taavale e momoli Rosalia.
E fai atu le sauniga a Taua ae o le taimi lea ua tolotolo malie ane le ma i le mafaufau o le teine ona e pei ua ia maoaluma i le la sauniga puupuu lea sa fai i Mission Bay.
O se olaga na mamao ma le mafaufau o Rosalia o le a oo i ai, peitai o lea ua iu lava ina manumalo faaosoosoga i lona mafaufau.
Na pau lava la le mea lea e i lona loto, ua tuai ia ona oo le taavale sei alu i le fale. Ua tei a foi ua faafuasei ona tu mai i ona luma foliga o le alii o Mativa ma ona uiga faatafai lea sa ia maitauina, ona faafuasei ai lea ona sualua ona lagona.
Ua ia manatu e leiloa pe alofa moni lenei alii o Taua ia te ia pe leai, ina nei tei ua mao aluma ae mulimuli ane toe sola. Pe sili ai lona tulimatai pea o uiga o Mativa pe o fea a fai i ai.
Na tu le taavale i le auala lea e sosoo ma le fale o le faifeau ona faatofa atu lea o Rosalia, ae aapa ane le tama o Taua ma kisi atu i ona alafau.
Na leai ma se manatu o Rosalia o tilotilo atu se isi ia i laua aua pe tusa ma le onosefulu mita le mamao o le vaega lea e tuu ai ia ma le latou fale, ae na faateia le teine i le vaai atu agai i luma i le tafatafa o le auala, o la e tutu lelei lava Mativa ma vaavaai ane ia laua.
E faia pea
