Ia saga viia pea le alofa ma le agalelei o le Atua ona e manatu o loo tumau pea le soifua manuia ma le maloloina lelei i le mamalu o si o tatou atunuu, aemaise lava i latou o loo fiafia pea e tuli tuli mai vaega faaopoopo o le tatou fagogo e pei ona auina atu i vaiaso taitasi.
Ia faamalo atu le tauatai i lenei foi vaiaso, ae alo mai loa lau faitau, o lenei foi ua tapenaina le vaega sefulu aua lava le faaauauina o le tatou tala faasolo, “E tauaso le Alofa”.
Na gata mai le tatou tala i le lua vaiaso na tea nei ina ua musumusu atu Taua o lea o le a alu atu e piki mai ia i le aso e sosoo ai pe a tuua le aoga.
Na alu Rosalia i le fale ae ua le mapu lona mafaufau ona o le tala a le alii o Taua. Na ia talitonu foi e le mafai lava ona le alu atu aua o Taua o se tagata fai tonu taunuu tele.
Na uma le meaai o le afiafi ona savali ane lea o Rosalia ma fai ana galuega masani o le fufuluina lea o ipu. Ae tei i le valaau ane o le faifeau ina ia alu atu i le feau.
Na saofai ane i lalo le teine ae o le taimi lea o loo nonofo pea i luga o le laulauai le faletua ma le alii o Mativa. “Lia, vaai oe, ou te manao ina ia matua fai lelei le vaega o le pese lea e te usuina.
O le mea lea ua oso mai i lou loto ua leai se mea e gata ai lou mimita ina ua ou faalogo atu i lou leo. O le isi foi itu, sei fai oe ma faataitaiga i isi teine o le nuu aua e na o le pau a le la o le mea e popoto ai o le mati atu i i, mati atu i o, ae augapiu ma le iloa pese e pei o oe. O le isi foi tulaga Mativa, ou te manao ina ia lua toalua ma Lia i le fuaiupu lea.
O lau lava faalogo ua matua manaia lava lou taotao mai i tua, ae taitai e Lia le lua vaega”.
Na lue atu le ulu o Rosalia i saunoaga uma a le faifeau e aunoa ma sana tala ona tu lea i luga ua toe savali e faauma le fufuluina o ana ipu, ae o le tama o Mativa ua na ona punou ma inu lana ti.
E vivini moa o le aso na sosoo ai ae ua leva ona nofo i luga le teine o Rosalia. Ai lava o le mea tonu lea e tau o le moe ae le mamoe aua e ao lelei le po e lei lelei sana malologa. E leai se mea na ese ai ma le tama o Mativa.
Na pau foi lea o le po ua umi ai lava se taimi o alu le mafaufau o le tama i Samoa i le teine o Maumea, ma ua le mafai ai ona tatali lona fia faalogo atu i lona leo.
Na pau lea o le itu e eseese ai ma Rosalia, aua o Rosalia ua ao le po o pei le tama o Taua o se avega i lona mafaufau. I se isi foi itu ua moe ae talotalo tuai ia ona ao sei alu i le aoga, ae sei fai pe moni upu a Taua e alu atu e piki mai ia.
E ui foi la i le alu o le ulu o le teine i le itu lea, ae ua le mafai foi ona faagalo ma lona ulu suiga o lona olaga lea ua tei a ua fetuleni mai. E le gata i totonu o le fale o le faifeau, ae o tala a teine i totonu o le aufaipese, ma le tulaga e pei ona faapese toatasi ai o ia. O nei mea uma ua pei o se tupua o loo fetuutuunai pe a tino mai afea, ae pe o le a foi le uiga. E taufagu atu le faletua o le faifeau i le potu o Rosalia ina ia alu ane e tunu le ti ua leva ona ala le tamaitai ma ua faasauni i ana taelega o le taeao ma agai atu ai loa i le aoga.
Na pei o le emo o le uila tapenaga uma a le teine i lea taeao, ona alu ane lea ua faatoatoa lana taele, ua solo mago lona tino ma lona lauulu, ona fai lea o ana teuga ma faamanogi lona ofu ma savali loa i le auala e pue le pasi.
E nofo fua le teine i totonu o le faleaoga ae o lona loto ua tuai ona uma le taimi o lana mataupu mulimuli sei savali i fafo ma le potu, talu ai lava o lona manao sei vaai pe moni lava upu a Taua.
O Taua o se tagata aulelei tele. E le tau faia sana tala ina ia see ai se teine ia te ia, aua o le taulealea e poto e teu lona tino ma fai ana teuga e mailei ai foga umi. E le gata i lea, ae o se tagata lava foi e tele ana tupe. E faigaluega i le Soifua Maloloina o se tagata suetusi.
O le tele lava o ana galuega e fai mai i le fale, sei vagana ai ua pisi tele ona faatoa tele lea o ni ona aso i totonu o le latou falefaigaluega. E masani ona ave i ai le faatuatuaga a le faifeau i meafai a le ekalesia aua e atamai.
E poto tele i le itu tau fuainumera faamaumauina, o le ala foi lea e tele ina tuli tasi ai e tagata ina ia faatumu ai a latou lafoga o tupe toe talosaga mai le Ofisa o Lafoga, aua o lana matafaioi tonu lea.
E fetaui lava le savali ane i fafo o Rosalia ua uma lana vasega faaiu o le aso, ae sosolo ane loa ma le taavale a Taua i luma tonu lava o le faleaoga, ona tuu lea i lalo o le tioata pogisa o loo pito i luma ma valaau atu i le teine ina ia oso i totonu.
Na soo le taulaga faatau i Aukilani o taamilo ai, ona faatutu atu lea agai i Mission Bay ma e taunuu atu o loo pe le tai ae o le la ua amata ona toe sua mai, ona afe lea o le la taavale i le paka ua tape ma nofonofo ai.
O le tei mai o le tai na pei o se ata tifaga i le matamata a Taua ma Rosalia aua e ese foi lagona o lea aoauli i le vaavaai atu i le moana ma le suamili mai o lagona a o loo i luga pea tioata pogisa o le taavale a le tama. “Ia ai na ta omai ta te nofonofo ma ta leoleo paka i inei.” O le tala lea a le teine o Rosalia.
Na ataata lemu le tama ona tago lea ua popo le vae o le teine ma faapea atu. “Leai, o le a foi le mea o le a e saunoa ai faapena. Vaai oe, na ese lava ou lagona ina ua ou faalogo i lou leo anapo i le falesa. E te iloa na uma loa lau pese tei a ua oso mai ou lagona faateteine ia te oe.
O le ala lena o lou naunau mai lava ina ia maua mai le tou solo, sei sue atu se avanoa ou te fai atu ai ia te oe ina ia ta o ta te talanoa na o taua. Ae faafetai i le Atua o lea ua maua le avanoa.” “Se Taua, soia e te faaseeina ita ua o ta matua. Ua ta faalogo soo foi i na tala na o le mole ane o lota manava le mea e maua ai.” E lei uma atu le tala a Rosalia ae aapa ane le tama ua tuu lona limatusi e pei e tapuni ai le gutu o le teine, ona la sao lea mo ni nai sekone.
“Lia, aua nei e faapea e pepelo au tala ia e fai atu ia te oe. Ana leai ni ou lagona mo oe semanu ou te le fai atu ou te sau e piki oe. Ae vaai o lea lava ua tuu au galuega ae ou sau ona o se mea ua le mafai ona maua ai se filemu i lou loto.”
Na lei toe iai se tala a le teine ona e foliga mai ua tau gau atu lona loto i upu a Taua. Na iloa lelei lava e Taua ua ulu ana tala i le fatu o le teine ona gagau ane lea o lona ulu ua tilotilo sao atu i ona mata e aunoa ma nisi tala, ona ia kisi atu lea ia Rosalia o se faailoga o le alofa ua amata ona avaga. E lei talitualimaina e le teine le kisi ane a Taua, aua o se taimi muamua lea ua kisi ai se isi i ona laugutu.
O le mea lea na saoloto ai le alii o Taua e fai lona avanoa a o maua seia oo ina tafe le Vaisigano ma le mafai ai ona tatali le fia faasesee i le tatafe mai o lagona fia faatino, aua ua le matu le tafe mai o le vai taufaaosooso i le taele.
Sei tatou liliu atu i Samoa. E ta le iva ae ua taunuu le alii o Tala i le faatoaga, ona alu lea i totonu o le latou faleapa o loo tutasi i le maumaga ua nofonofo ai. Ua tonu i lona manatu e le toe oo i le aai aua e le mafai ona le tauina e Maumea le mea na tupu.
Ua faulai mai lagona o le faalumaina ma le maasiasi, ona tonu lea i lona loto, e sili ai ia ona tusi lana tusi e faatoese ai ia Maumea ma lona aiga, ona sele ai lea o le maea ma pule i lona ola aua e leai se aoga e toe ola ai, ae o le a pei lava ia o le lulu e lele solo ae esiesi e iao.
Na tago nei le tama ua avane le api ma le penitala ona amata loa lea ona tusi lana tusi. “Mo Maumea, ua lofia au i lagona o le faalumaina ona o mea sa ou faia ia te oe anapo.
E ui lava e lei manumalo le fili, ae ua leai se aoga ua ou tauvalea i ou lava lagona. Ua ou vaivai i le faiva o taulelea ma ua ou faiaina ai i lo ta va. O le mea lea ua ou manatu ai, ua leai se aoga ou te toe ola ai. Maumea, e leai lava se isi na sili i ai lou alofa i lenei olaga e pei o Mativa. Sa pei lava o ia o sou uso.
Ia e alofa faamagalo mai au, ae momoli atu ou alofaaga mo Mativa. Tau atu ia te ia ina ia alofa ma faamagalo mai au.”
E faia pea
