Autalavou Metotisi Otara

O galuega faaiu faaleautalavou a le autalavou Metotisi i Otara mai le tausaga ua mavae 2019 agai mai i le tausaga nei 2020, na faaiu ai a latou polokalame i le latou faamoemoe lea sa faia i le Aso Toonai ua mavae i le latou hall Metotisi i Otara e taualuga ai a latou polokalame faaletausaga e pei ona masani ai. Ua mae’a nisi o a latou tauvaga e pei ona iai tauvaga faaevagelia, tauvaga o tala o le Tusi Paia, tauvaga pese lotu, o taaloga faatasi ai ma nisi o sauniga sa faia e taumafai lea e atina’e ai tupulaga talavou.
O polokalame taitasi uma nei o le tausaga e taualuga lava i polokalame faaleaganuu e pei ona iai le faamoemoe i le Aso Toonai. E 2 vaega sa vaevae i ai le tauvaga o le aganuu, o le vaega e Kenese o loo taitai ai le susuga ia Fiapaipai Su’a ma le vaega a Faaaliga o loo taitai ai Tavu’i Ioane.
O vaega masani o le aganuu a Samoa o loo faaaogāina i aso uma sa auga o aute i ai le polokalame e pei o le folafolaina o le taumafataga a le faifeau, folafolaina o le sua ta’i ma le sua taute a le faifeau, faataitai e talavou le vaevaeina o le moa, ma le penaina o le puaa, faatasi ai ma le patiina o le alofi a matai. Na matagofie le fatinoina e talavou o nei vaega ina ua molimauina le tāua o le polokalame e nisi o valaaulia faapea susuga i faafeagaiga mai ekalesia o le Sinoti.
O le talalelei e tatau ona alu faatasi ma le aganuu a Samoa, auā o le mea lea e tatau ona a’oa’oina ai pea tupulaga talavou ina ia latou iloa le tāua o le faaaogāina o le talavou i totonu o le ekalesia mo le talalelei a le Atua faapea foi lona tāua o le tama ma le teine i lona faasinomaga ma lona tupuaga. E tāua le ola faaleagaga ma le ola faaletino.
O le tele o tausaga o loo faatinoina ai lenei polokalame ma ua vaaia ai le fiafia o tupulaga talavou o le ekalesia e faatino le aganuu pe a oo ina tauaofia le ekalesia i ni fonotaga, ua leai se fefe ma le palaai e taitai ni mea e tuu atu e le laulau o le autalavou e faatino. Ua mafai foi ona taitai e latou ni polokalame faaleagaga pe a iai ni tauvaga a le Sinoti e faatino i le tausaga.
Pei ona faailoa le loto fiafia o le susuga i le Peresetene o le autalavou ia Lemoa Henry, talu ona tulai mai i lenei tofiga i totonu o le ekalesia Metotisi i Otara o loo ia maitauina pea le tāua o polokalame taitasi i totonu o le galuega faaleautalavou ina ia mafai ona atina’e ai mafaufau o tamaiti i le itu faaleagaga faapea le itu i le tino aemaise lava ina ia aua ne’i mamulu i fanau talavou le tāua o le aganuu a Samoa ma ana measina. O loo taumafai foi ia sosoo le fau ma le fau i le galulue faatasi o mātua ma le ekalesia i le a’oa’oina o talavou i polokalame faaleagaga ma le aganuu. Ia malosi le ekalesia ia faapena foi i mātua i totonu o le lotoifale i le faatāuaina lea o afiafi faaleaiga ma le aganuu.
O le afiafi o le Aso Sa na tolaulauina ai togi o galuega faaiu a le autalavou i le tausaga ua mavae seia oo mai i le amataga o lenei tausaga, ma amata ai loa le isi laulau fou lea o le a tulai mai e taitai le autalavou i lenei tausaga 2020.
Iuga o le Tauvaga Autalavou Fepuari 2019 – Fepuari 2020
FAAILOGA MANUMLO
Tauvaga Pese Faaaliga
Tauvaga Faaevagelia Kenese
Tauvaga Tala o le Tusi Paia Tutusa
Tauvaga Faafiafiaga Faaaliga
Tauvaga Taaloga Faaaliga
Tama Autalavou o le Tausaga Jerry
Lavata’i
Teine Autalavou o le Tausaga Toalua
Fesuluai
Tama Taalo o le Tausaga Paul
Taupau
Teine Taalo o le Tausaga Angie
Tolai
Tauvaga Togiga Kenese
Tauvaga Taulaga Kenese
Talitā Tuufaatasiga Faaaliga