E tāua ona lelei le “nanu” a le Miss Samoa

O se finagalo o le taitai o le Malo, o le Minisita foi lea o le Pulega o Tagata Tafafao mai i fafo, e tatau i soo se tamaitai e fai ma sui o Samoa i tauvaga faapea ona malamalama ma tautala i le gagana Samoa ae faapea foi ma le faaperetania.
Faaalia e le Alii Palemia ua lē lavā i le faiaina soo o Samoa i tauvaga tausala o le Pasefika ma o se tasi lava lenei o mafuaaga na toe aapa ai le Pulega ma faatautaia tauvaga tausalsa, o le lē oo i se maualuga e tatau ona iai o le iloa o tamaitai tauva i faaaliga tausala.
Faaalia e le susuga Tuilaepa Lupesoliai Sailele Malielegaoi o le tausala o Samoa e tatau ona aulelei ma e tatau foi ona poto e nanu.
O nei faamatalaga uma ua tali atu ai le Alii Palemia i le fono ma tusitala ona ua laga ai atugaluga a nisi o le mamalu o le atunuu i le faaaliga tausala o le Teuila lea faato‘ā mae‘a atu nei.
O le faasologa o le tauvaga e pei lava ona silafia ua aofia ai ma fesili ma tali lea e tele lava ina faaiu ai le polokalame o le po.
O le lua vaiaso foi lea na faagasolo ai le tauvaga e aofia ai lava ma fonotaga ma tamaitai tauva ma fesiligia i soo se mataupu o loo manatu faamasino ma i latou na faatautaia le tausinioga, e tatau ona malamalama ma silafia e tamaitai e faatatau ia Samoa, o suiga ua iai aemaise o ni vaega o le aganuu e tatau ona o latou silafia.
O le po la o le tauvaga lea e toalua tamaitai e lei mafai ona tali fesili na faaperetania le faiga. O le tausaga lona lua lenei ua faamamafa ai le faatautaia o fesili ma tali i le po o le tauvaga i le gagana Peretania. O le gagana aloaia lea o le tauvaga, o se faamatalaga lea a le Pulega o tagata tafafao maimoa mai i fafo ina ua muai laga lenei mataupu.
E lua fesili na fai, muamua o se finagalo o le tamaitai tauva i ni auala e faaopoopo ai le numera o tamaitai faipule o le Palemene o Samoa ma le fesili lona lua o se malamalama o le sui tauva i faatoaga ua ta‘ua o “organic farming” – faatoaga ia e leai ma ni fetilaisa ma ni vailaau e faaaogāina ai.
E lei mafai e tamaitai nei e toalua ona tali fesili nei ma o nisi ua faapea mai ai o le fefefe o teine na mafua ai le lē mafai ona aumai se tali.
O nisi ua faapea mai e lē faigofie ia ituaiga fesili peitai o nisi ua faapea mai e lē o malamalama teine ona ua faaperetania fesili, atonu ana fai i le faasamoa e malamalama ia tamaitai.
Poo le ā lava le mafuaaga, e manino o le taimi muamua lenei ua molimauina ai le faigata ona tali o sui tauva.
O se mataupu lenei ua lagalagā pea ona o le tulai mai o le faagaulemalie o tagata aemaise o le manatu o le tausala o Samoa e tatau ona faatautaia i le Gagana Samoa.
O le mau a le Pulega aemaise le alii Minisita, le Palemia foi lea – e toe agai foi i tua taumafaiga a Samoa i lenei tausinioga pe a oo nei ina tauva ma tausala o le Pasefika pe a lē faamalosia tulafono o le tausinioga e pei ona aloaia ai le gagana Peretania o le gagana lea e faaaogā i le tauvaga.