O se saunoaga lea a le Alii Palemia, le susuga Tuilaepa Lupesoliai Sailele Malielegaoi i le tatalaga aloaia o le faleaoga mo le fanau laiti i nuu o Saleapaga ma Si‘upapa i Aleipata.
O se galuega tele na molimauina le tatala o faitotoa i le fanau i le faaiuga o le vaiaso ua tea nei.
Na faatumulia le mamalu o le afioaga aemaise o nuu tuaoi i lea itu o Aleipata aua le asiasia mo le uluai taimi o lenei galuega tele.
O le fanau na mautinoa le fiafia i le mafai ai ona toe foi i se faleaoga fou i le talia ai o se nofoaga e faamautu ai ina ua mae‘a ona talepe e le sunami lona faleaoga sa iai.
O le faleaoga fou lenei ua faatuina nei i le itu a uta o le afioaga o Saleapaga. O le faamoemoe ina ia mautinoa le saogalemu o le fanau laiti o loo aooga ai i le aoga laitiiti lea a afioaga e lua.
O le tulaga lea ua iai le tele o faleaoga ma ona potu e ono mo le fanau ma le potu faapitoa mo faiaoga, o se tasi o le faitau selau o maota ma laoa aemaise foi nofoaga tetele nei na faaleagaina uma ina ua sao le vai i totonu ma avatu uma ai ma otaota mai i le sami ua faaleaga ai potu aoga sa iai i le aai i gatai.
O le va galulue faatasi ai o Samoa ma le malo o Iapani lea foi o loo tau toe fausia vaega o lea atunuu ua matua leaga faia ona o le mafui‘e ma le sunami o Setema 2009, na sainia ai se fesoasoani e toe fausia ai le faleaoga e Iapani.
O le lala o fesoasoani a lea malo le JICA lea na feagai ma lea galuega tele. E $200,000 le tau atoa o lenei galuega tele ma o le galuega la o totoe o le galuega lenei, o le pitolaau a faiaoga i le anofale atoa ai le unai a alii ma faipule o le afioaga. Faaalia e le Alii Palemia, o le taua ia o le sao lea o le nuu i le atina‘e o aoga a le fanau.
O le tulafono ua faamalosia ai nei fanau mai i le 5 i le 14 tausaga le matutua ona aooga, na ta‘ua e le Taitai o le Malo, ua talafeagai lelei ai lava le leoleoga ma taitaiga a le nuu ina ia asia aiga uma i aso taitasi e tatau ona faatino ai le aoga, poo iai lava ni fanau e le o usitaia lenei tulafono.
E faasala matua pe afai e maua atu e le o agai fanau o le matutua ia i aoga tulagalua.
“O le lelei ona puipui e outou alii ma faipule o nuu o lenei tulafono ma faamalosia fanau i aoga, o le laitiiti foi lea o faafitauli o le a feagai ma outou i le lumanai i uiga ma amioga a le tupulaga tuputupu a‘e,” o se saunoaga lea a le Alii Palemia.
O le tausaga lenei ua faamalosia ai le tulafono fou lea ma ua agai nei Matagaluega o Aoga, Leoleo, Mataupu tau tina ma tamaitai aemaise isi faalapotopotoga tumaoti ina ia o latou faia asiasiga i aso taitasi i nofoaga faitele e saili ai fanau o loo tutuli mai pea e matua e faatau savali oloa i soo se vaipanoa o le taulaga, ae ua le agai i le faleaoga.
Mo Saleapaga ma Si‘upapa, e faigata ona molimauina e agai ese ai o fanau mai i le faleaoga i le toatele o le afioaga ua vaaia le pulupululima faatasi ina ia faamalosia lava le ola a‘oa‘oina o le fanau, le auga ma le autu o le agai mai pea o paaga a le Malo o Samoa e pei o Iapani e ave le faamuamua i a‘oa‘oga a fanau a Samoa.
