O le masina o Novema ua faalauiloaina o le masina o le lipine pa’epa’e poo le “white ribbon month”. O le uiga o le lipine pa’epa’e o le faalauaiteleina lea o auala eseese e taofi ai sauaga i totonu o aiga, aemaise sauaga faasaga i le itupa o tamaitai, faapea ma le fanau.
Ou te talitonu e tatau i aiga Samoa ona faatauaina le faailogaina o le lipine pa’epa’e i lenei masina aua e toatele nisi o loo lipotia mai i matagaluega a le malo e aafia i sauaga i totonu o aiga.
Ona ou fesili lea poo malamalama matua Samoa o lenei ua tatou iai i le vaitaimi ua inosia ai e tagata lautele sauaga i totonu o aiga, aemaise sauaga e faasaga i le itupa o tamaitai ma fanau laiti.
Ua malamalama le toatele o le atunuu o soo se aiga o loo maua ai uiga saua, ma faatino ai sauaga i le tina ma fanau, o se aiga faanoanoa tele ma e leai se lumanai lelei e maua ai.
Ou te le faapea atu na o aiga Samoa o loo aafia ai i nei uiga. O nei lava uiga e mafai ona aafia uma ai soo se aiga. E aafia ai foi aiga papalagi, ma aiga o tagata maumea ma le aufaipisinisi.
Peitai, e pito i sili ona ou popole ma naunau i aiga Samoa, aua ou te naunau lava au ia, ia maua e aiga Samoa ni aiga fiafia ma le manuia.
Ae paga lea o le vaiaso ua tea na falepuipui ai se tina mo le 15 masina ina ua molia i le faaaogaina o se faagaau pa‘u e sasa pe fasi ai se tasi o ana tama e 10 tausaga. O le masina fou e faia ai le faaiuga a le faamasinoga i le faasalaga o le tamā o lenei aiga.
Ua faapea le faamatalaga ua fiu matua i le tiai aoga o lenei tamaitiiti, ma ua tapena ai loa nei matua ma le faamoemoe e maua mai loa le la tama, matua aoai ai loa i le sasa. O nei foi matua sa lapatai muamua foi e le pule aoga talu ai e taunuu atu le tamaitiiti i le aoga i nisi aso, e maitauina e le faiaoga o loo faamanualia le tino o le tamaitiiti.
O le upu moni lava, o le ituaiga sasa lea na fai e ia matua, o le ituaiga sasa o loo faasa ma tapu e le tulafono.
Ou te talitonua soo se aiga lava o loo iai ni tamaiti, e le faigofie le taumafai e aoaoina fanau a o loo iai le popole nei mea ane ua soli le tulafono, ma molia e le Ofisa o Leoleo.
E ui o loo mafai pea ona faatonutonuina fanau i le sasa, ae a faapea loa ua e faia ma lou loto ita, ma faaaoga loa se faagaau pa‘u, sipuni, laupapa, salu, ua e solia loa le tulafono ma ua e aafia loa i sauaga ma le faaoolima.
Ua iai nisi o matua ua faapea mai, afai e le mafai ona faatonu sau tama i le sasa, o lona uiga ua saoloto nei tamaiti e fai le mea e loto i ai.
Ona ou fesili lea, o le a le taimi e tatau ona faatonutonu mai ai fanau? Afai sa tuusaoloto tamaiti a o laiti, aisea le mea o le a toe sasa ai ma faatonutonu pe a matutua, a o lea sa e tuusaoloto lava tamaiti e fai o latou loto a o laiti?
O fea le mea e faigofie, o le aoao ma faatonutonu a o laiti, pe aoao ma faatonutonu pe a matutua?
O se mea tatau le sasa o fanau, pe afai na o le mimilo ai o le tamaitiiti ma atili ai ona malo ma tetee mai?
Silasila foi pe a faaaoga le sasa e faatonutonuina ai se solofanua poo se taifau. E fefe, fefe lava le manu, ae e iu lava ina toe tetee ma sola ese ma oe pe a fiu i lau sasa.
O le aoaoga lava a Samoa mai anamua, “O fanau a manu e fafaga i fuga ma fua o laau, a o fanau a tagata, e fafaga i upu.”
O upu ia o le alofa, le onosai, le faapalepale, le amiotonu, upu a le Atua.
Ae ou te talitonu foi, e le aoga au upu, pe afai e te le savali ma le amiotonu i au upu. O lona uiga, afai o loo e aoaoina lau fanau ia aua le ulaula tapaa, aua le inu ava malosi, ae o loo e ulaula ma taumafa pia, ua leai se aoga o au upu.
O le mea lea ou te talosagaina ai tatou matua, ia lava pea le onosai e aoao lemu ai a tatou fanau i le alofa ma le le fiu gofie.
O uiga alofa ia o loo taumafai le masina o le lipine pa’epa’e e aoaoina mai mo tatou ma a tatou fanau.
Ia manatua lelei, o o tatou alo ma fanau, o taitai ia o le lumanai o Samoa ma Niu Sila taeao.
