[Achievement Through Pasefika Languages]
E lua ni aogā sa faamanuiaina i le amataga o lenei poloketi, Wiri Central i Manukau [Gagana Samoa], ma Te Papapa i Onehunga [Gagana Toga], ma le Mafutaga a le Samoa Atiae i Magele [Gagana Samoa], o se mafutaga muamua foi lea a tagata lautele i Niu Sila, na latou mauaina le avanoa e faatino ai lenei poloketi a le ofisa.
O le tausaga e 2010, na tuuina atu ai loa i le susuga i le faafeagaiga ia Victor Pouesi ma le faletua ia Salome, ma le EFKS i Magele i Sisifo latou te faatinoina, le poloketi lenei sa faafoeina e le Samoa Atiae.
O le tausaga e 2009, na toe tatala ai tusi talosaga mo lea lava poloketi, ma faaopoopo ai le aoga a Favona i Magele e faatinoina i le Gagana Niue, ma le Aoga Amata a Toelau o le Mataliki i Magele, e faatinoina i le Gagana Toelau.
O lenei fuafuaga a le Ofisa o Aoga, ina ia siitia le tulaga o tamaiti Pasefika ia latou faitautusi i totonu o aoga, ona o se tulaga lea o loo vaivai ai ma maualalo ai lo latou taumafai.
E le mafai ona faataunuuina le tele o galuega manaomia i le aoga, pe afai e le lelei le faitautusi, ma le malamalama i autu o manatu tusitusia, e fuafua ai se galuega faatino.
O tamaiti e talia i lenei polokalame o le Tausaga 1 [5 tausaga] e oo i le Tausaga 4 [9 tausaga].
O lenei polokalame ua fuafuaina e 3 itula i le vaiaso e faatino ai, ma e faamalosia le faaaogaina o le gagana muamua a le tamaitiiti.
Ua savalia nei le fitu tausaga talu ona faatino lenei poloketi, ma ua matauina le aoga i le siitiaina o tulaga o aoaoga a fanau o loo auai, i totonu o aoga. O le ala foi lea ua toe faaauau ai ma ua toe faasalalauina ai nei ni ekalesia, faalapotopotoga a tagata lautele, ma ni aoga, e talosaga atu latou te faatinoina lenei polokalame, ona ua talitonuina le aoga tele mo fanau, i le faaleleia o la latou faitautusi, tusitusi ma le tautala, aemaise le faalauteleina o la latou utuvagana.
O se avanoa lelei tele lenei ma le taua, e faatino ai e ekalesia ma faamalosia ai le mautu o le gagana muamua a le tamaitiiti.
Atonu o se avanoa taua foi lenei e faamalosia ai faigapaaga a tagata lautele, ma ekalesia a le Pasefika, ina ia faaleleia ma lagolagoina faatasi fanau, ina ia manuia lo latou taumafai, ma tausisia o latou faasinomaga, gagana tu ma aganuu.
E pei lava ona faaalia i nisi o suesuega i gagana, e le mafai ona tuu eseeseina le gagana ma tu ma aganuu.
A mautu le gagana, ua faigofie foi ona malamalama i tu ma aganuu, ma agatausili a Samoa, o le faaaloalo, alofa, usitai, ma le faamaoni.
O vaega ia e malamalama lelei ai fanau i le ava ma le faaaloalo, alofa ma usitai i matua, ma le faamaoni, e le gata i tiute i totonu o aiga, galuega, aemaise totonu o ekalesia, o le faatumutumuga lea o le talitonuga o soo se Samoa, ma malamalama ai fanau, “O le mata‘u i le Atua, o le amataga lea o le poto”.
O loo faasalalau faatasi mai ma se avanoa mo se tasi na te faafoeina lenei polokalame, ma fuafuaina ni faafouina mo i latou uma o loo faatinoina, ma o le a faatinoina lenei poloketi a le ofisa o aoga.
Mo nisi faamatalaga mo lenei poloketi, faafesootai le Ofisa o Aoga poo le Matagaluega o Mataupu tau Tagata Atumotu [Ministry of Pacific Island Affairs].
Manuia tele le feagai ai o le mamalu i si o tatou atunuu ma tiute ma faiva o lenei vaiaso, faapea foi le toe foi atu o le fanau i aoaoga.
