Efeso 5:16, “Ia faaaogaina e outou aso o lenei olaga, auā o ona po nei ua leaga.”
I se tasi o tusi a le faifeau o Joel Osteen o loo ia faamatala ai le talaaga o se isi alii e faaaogāina e lana Ekalesia e suafa ia Isaraelu (Israel) Houghton.
O le tina o Israel, o se tamaitai talavou palagi atamai toe tautaua i le tāina o le piano. Ae te‘i ua ma‘itō le tamaitai faato‘ā sefulu ma le fitu ona tausaga i se alii talavou uliuli, ma feita ai ona mātua ma fai i ai, a lē faapa‘ūina lana to, ia alu ese ma le aiga.
Sa mafaufau le tamaitai lenei ma le alofa i lana tama, ma tonu i lona manatu e alu ese, ae ia ola lana tama. Ua amata na faataitai i le faaaogāina o fualaau faasāina, onaonā ma maumausolo ma lenei to e feaveai.
Ae iai le aso sa talanoa i ai se isi tina kerisiano matua ma faamatala i ai le alofa o Iesu ma faatuatua i lona suafa. Sa talia e le tamaitai mafatia Iesu ma maua sana Tusi Paia na foai ane i ai e le tina matua lea.
Sa lagona se suiga fiafia i lona loto, ua naunau e faitau le Tusi Paia, ma tau ai i le igoa, Isaraelu, ma mafaufau, a fanau lana pepe o se tama, e faaigoa ia Isaraelu. Sa lei malamalama lelei i le Atua poo ni faigalotu, a ua alofa i si ana pepe ma tatalo ma le lototele faapea: “Le Atua, a ola la‘u tama, ou te tuuina mo oe, ia manuia ma faaaogāina i lau galuega.”
Ina ua fanau le tama a le tina talavou lea, ua sili atu le tomai ua maua e lana tama nai lo ia. Ua logologoā Isaraelu i le fatuina o viiga o le Atua, e pepese le tele o Ekalesia mai atunuu eseese i pese sa tusi e lenei alii.
E aami ma valaaulia mai koneferenisi tautaua ona o lona agavaa ma le faauuina o lana taleni pese. E amanaina i Amerika ma maua faailoga taualoa ona o lona tomai.
O fea sa amata mai ai le tautaua o Isaraelu? Sa amata mai ina ua tatalo le tina i le taimi o lona mafatia. Sa lē mautonu, ae sa tatalo i se tatalo a le tagata ua momomo ma nutimomoia. Ua tuli ese e ona mātua, ua fiu e fai tuinanauga e lē malie, seia oo ina faamatala i ai le talalelei a Iesu, faato‘ā mapu lona loto.
Ae lē gata i lea, sa amata ai ma manuia o le tama sa fanau mai lona manava, le tamaitiiti lea sa taumafai lona aiga e fasioti.
O e manatua aso sa e laitiiti ai? Sa e ma‘i. O nisi sa ola ane i aiga ese, tele faigata, auā sa soona sauā tagata ia te oe ma isi lava mea sa oo i ai. Le mau faalavelave toeitiiti a leaga ai oe. Pe sa e soifua mai foi e pei o Isaraelu, e lē iloa poo ai sou tamā, pe ua sola foi lou tamā ae tiai oe ma lou tina. Ae ou te tautino atu, o taumafaiga uma na a le tiapolo e fasioti oe.
Manatua Mose, si nei lava alualutoto, ae inainā lava le tiapolo ia fasioti. Aisea? Aua sa iloa lelei e le tiapolo, o le lumanai o Isaraelu ma lo latou saolotoga, lea e i luga o le tamaititi lea. Ae lei iloa e Mose lea valaau, lē iloa foi e ona mātua, o le tama na filifilia e le Atua. Ae sa iloa lelei e le tiapolo le tāua ma le lumanai o Mose, o le ‘afu lea o Farao.
Faapena oe ma a‘u, tatou te lē iloa taupulepulega leaga ma faiga sauā a le fili, ae o le puipuiga mamana a le Atua lea tatou te aulia ai lea aso ma lea aso. O le fetalaiga a Iesu, e leai se isi e mafai ona faaumi lona soifua i se kupita se tasi. A o le Atua e ana le pule ma le mana, lea tatou te ola ma tou soifua ai. O le mea lea ia tatou tatalo ai e pei o le tatalo a le tina o Isaraelu, ‘faaaogā o matou ola. Faaaogā a matou fanau mo oe.’ Auā e fiafia tele le Atua e tali i tatalo a le tagata loto talitonu.
Afai foi o lena e faaletonu lou aiga, pe ua faaletonu lau galuega? Poo ua maua mai se lipoti e uiga i lau fanau ua ave e leoleo, poo ua solitulafono, tatalo ma le loto talitonu e faafofogaina e le Atua lau tatalo.
E faigofie ona aveese o tatou mata ma le Atua i le taimi o faigata, ae o le taimi tonu lea ua sauni ai le Atua e aapa mai ia te oe ma a‘u. O le mau a Paulo, a ou vaivai, ona ou malosi lea. Auā foi o le vaivai o le tagata faatuatua, e faaatoatoa ai le malosi o le Atua mo ē faatuatua ia te ia.
E malamalama lelei Tavita i le Atua, auā e tele taimi sa feagai ai ma faigata, ae sa laveaiina lava ona o lona faatuatua. Fai mai le Atua ia Tavita: “Ia e fai mai ia te au, ona ou foaiina atu ai lea ia te oe o nuu ese e fai mou tofi, ma tuluiga o le lalolagi e fai mou.”
O le finagalo o le Atua ia tatou tatalo atu, ae se‘i tali mai.
E iai le taimi e pei ua ote ai Iesu i ona soo faapea, ua tou lē maua ona tou te lē ole atu. Ae a saili e maua, a tu‘itu‘i e tatala mai, a valaau atu, e tali mai. O le tatalo a le tina o Isaraelu sa faafofogaina e le Atua.
Samoa e, o le aso lenei e tāua, auā o nei e fai faatatau i ai le manuia o taeao. O au filifiliga nei, e te selesele mai taeao. O ananafi ua sola, e lē toe foi mai, ae o le aso lenei ia faaaogā tatau. Fai se mea lelei mo se isi tagata, ta‘u i se isi le alofa o le Atua.
O le aso lenei e faalelei ai ma se tasi o lua masesei. O le aso lenei e toe foi ai i le Atua. O le asō, o lou aso manuia. Soifua.
