O se fesili lava lenei oloo tele ina feteenai ai finagalo ma manatu e le gata i mātua, a o puleaoga, faiaoga ma i latou oloo taiulu i le fuafuaina o mataupu mo le faaleleia o tulaga o aoaoga mo tamaiti e le o le Igilisi la latou gagana muamua.
Oloo tele lava ni suesuega poo ni tofa liuliu a le au popoto i gagana ua latou faamaonia le tāua tele o le gagana muamua a le tamaitiiti mo lona aoaoga. Ae matuā maoae ai finagalo o i latou oloo iai o latou tomai faapitoa i gagana o si o tatou atunuu.
Le afioga i le Ao o le Malo o Samoa, oloo avea pea ma malo aami i le tele o fonotaga faavaomalo, na saunoa, “O le matautia o le leiloa o le gagana, e le o le leai o ni upu poo faamatalaga, ao le leiloa lea o le agaga ma le nanamu o tala faasolopito o tagata ma a latou tu ma aganuu, e faaaogāina upu ma faamatalaga e faamaumau ai ina ia manatua ai pea o latou faasinomaga.” Ae lē uma foi le mālie ma le tāua o saunoaga ua lau silafia a le afioga a Aiono Dr Fanaafi Letagaloa, “A leai se gagana, ua leai se aganuu. A leai se aganuu, ona po ai lea o le nuu.”
E ese le tāua o nei saunoaga e faamanatu mai ai le tāua o le taofi mau i lau gagana, tu ma aganuu, auā o vaega tāua ia o lo tatou faasinomaga.
O nei lafoga tāua ma le loloto, oloo lagolagoina e le toatele o le au suesue iloga o gagana. Ta‘ua e se tasi alii suesue tautaua i le lalolagi i gagana Jim Cummins, “E tāua tele le mautu o le atina‘ega o tomai o le tamaitiiti i lana gagana muamua, e faigofie ai ma faaleleia ai le atina‘ega o lona tomai i le gagana lona lua. E faalagolago le atina‘ega o le gagana lona lua a le tamaitiiti, i lona tomai i le gagana muamua”. Oloo finagalo pea le toatele, o le Igilisi o le gagana numera tasi lea e tatau ona aoaoina ai alo ma fanau i totonu o aoaoga. E pei ona faamaumauina i nisi o suesuega a le ofisa o aoga, o le sefulu afe o tamaiti oloo auai i polokalame, oloo faaaogāina ina ia vave ona lelei le Igilisi a tamaiti e lē lelei a latou Igilisi, o le ono afe o ia tamaiti o tamaiti Pasefika. Peitai, oloo maualuga pea le tulaga o tamaiti Pasefika oloo maualalo tulaga o aoaoga.
O se tasi molimau, “O le tele o le faaletonu o le aoaoga o alo ma fanau o le Igilisi la latou gagana lonalua, ona ua faamalosi e aoao i le isi gagana fou [Igilisi], ae lei mautu le faavae o la latou gagana muamua”.
O le autu tonu lava lea sa galulue ai le ULIMASAO o le faalapotopotoga lea sa ofoina faafouina mo faiaoga i aoga sa faatinoina polokalame e faaaogāina ai gagana e lua e aoaoina ai mataupu i totonu o aoga i Aotearoa/Niu Sila.
O le talitonuga, a mautu ma lelei le faavae o le gagana muamua a le tamaitiiti, o le vave foi lea ona lelei lana gagana muamua. O lenei polokalame, e iai ona faavae, tofa manino, filosofia, ma auala faapitoa e faaaogāina e faatino ai ina ia manuia le taumafai o alo ma fanau e aofia ai.
O se popolega tele ona o le tele o polokalame, oloo faaaogāina le lelei o le gagana muamua a le faiaoga e mafai ai ona auai ma faatino nei polokalame. Peitai, e manaomia le malamalama, tomai, ma le silafia o tofa manino ma talitonuga o le polokalame, ma auala e faatino ai, ina ia talafeagai ma alo ma fanau.
E tele lava vaega e tatau ona mataituina mo le manuia o nei polokalame, e aofia ai le amanaia o le tamaitiiti, lona aiga ma saofaiga lautele e auai ai.
O tamaiti e auai atu i aoga ma o latou tomai ua mautu i la latou gagana muamua, e tele ina lē amanaia ma faatāuaina, ona e muamua le manatu e tatau ona atinae le gagana Igilisi, ae tasi ia faafitauli e fetaiai ma fanau, o le lē amanaia, ma le manatu maualalo i o latou tomai ma a latou gagana, tu ma aganuu.
Ua avea le lelei ma le mautu o le gagana muamua, ma faafitauli, ma papupuni e taofia ai avanoa tāua mo ia tamaiti, ae ua faaaogā vaega toilalo, e mafua ai mafaufauga toilalo, lea e tele ina faaalia ai lagona toilalo o le fanau ma tuuaia ai i le tele o faafitauli, ae lē o mautinoa le mafuaaga ma le autu o ia amioga toilalo.
O le 21 senituri lenei ua tatou iai, ua lē lava le tasi o le gagana, ua manaomia le iai o nisi gagana faaopoopo mo se lumanai manuia.
E manaomia ina ia mafai ona auai i feutagaiga faavaomalo, e le gata i le vafealoai, tulaga manuia o malo ma faalapotopotoga i le tamaoaiga, galuega mo le atina‘ega o aiga ma atunuu, e aofia ai ma le tele o alaga manuia mo tagata lautele. O lau gagana muamua, o lou ala lea i malo.
