“E tāua i le Malo ana tagata faigaluega”..Faumuina Liuga

O le vaiaso nei ua tauaofia ai le Palemene o Samoa e talanoaina le fuafuaga o le tala autū o le tupe mo le tausaga faaletupe 2013/2014 lea ua aofia ai ma se siitaga o le a faia i totogi o tagata faigaluega a le Malo.
O le finagalo o le Minisita o Tupe le afioga Faumuina Tiatia Liuga, e lē mafai ona solomuli le Malo i le vaai pea i le tāua o ana tagata faigaluega ma le latou tautua.
O le a mafai ona auiliili le tulaga i le siitaga fou ma le aofaiga o lea siitaga i ni pasene, pe a auiliili le tala o le tupe e le minisita. O nai tausaga e lei mamao tele atu sa faia ai ni siitaga tetele i totogi o tagata faigaluega a le Malo lea na faatino i totonu o le tolu tausaga.
O se siitaga ua maualuluga ai totogi o i latou o loo tautua i le Malo pe a faatusa i totogi o i latou o loo galulue i pisinisi ma auaunaga tuma‘oti.
O le tolu tausaga sa faia auauai ai le siitaga o totogi ua mae‘a i le tusa ma le lima tausaga talu ai, ua molimauina ai le siitia maualuga o totogi o tulaga tofi o le Malo mai lava i le Ao o le Malo, faasolo ane ai i tofiga faalemalo e pei o le Palemia ma ana minisita, o minisita lagolago ma faipule o le Palemene aemaise o le totogi mo le Fofoga Fetalai ma le Sui Fofoga Fetalai.
O se siitaga foi na alu a‘e ai i luga totogi o Faauluuluga o Matagaluega ma Falapotopotoga a le Malo, faapea isi tulaga sinia mo tagata faigaluega lava a le Malo faasolo ane ai lava ia i latou e maualalo tulaga.
Sa iai ni lagona faaalia o faipule sa agaia le Malo i lea vaitaimi o le a lē paleni ai le fua o totogi i le va o le Malo o pisinisi tuma‘oti, o loo ave i ai le faamuamua. Peitai sa faaalia e le malo i lea taimi, o le aogā o le siitia o totogi o le malo ina ia taumafai ai ma kamupani ma pisinisi e tulei i luga totogi o a latou tagata faigaluega.
Ua iai se itutino o le Malo lea e ta‘ua o le Salary Tribunal o le latou galuega o le iloiloina o totogi o tagata faigaluega uma a le malo i totonu o se vaitaimi o loo faatulagaina faaletulafono. O tausaga ua mavae sa ese le faiga sa faafoe ai le siitaga o totogi o le malo, lea sa eseese taimi e faia ai siitaga mo tagata faigaluega a matagaluega.
O se faiga sa tulai mai ai ni faafitauli i le lē malilie o isi tagata faigaluega pe a sii totogi o isi tagata faigaluega, ma mafua ai ona tulai mai ni tevaaga  a nisi vaega o tagata faigaluega poo ni strike.
Faaalia e le Palemia i le taimi na faatino ai le uluai siitaga na faia faasolosolo i totonu o le tolu tausaga, o le faatūina o se komisi e nafa ma le iloiloina o totogi mai lea taimi i lea taimi o le a mafai ai ona laugatasia uma tagata faigaluega a le malo i faamanuiaga tau siitaga o totogi, ma lē toe tupu ai le loto mimilo o tagata faigaluega i le sii o isi ae mtamata fua isi tagata faigaluega a le Malo.