E iai se tama matua o lou aiga ua faaletonu lona soifua maloloina ona o mai o le tino. Ua faaletonu fatugao (sei tulou) ona o le gasegase o le suka ua leva ona la tauivi.
Fai mai fomai, o le galuega e faia e fatugao, o le faamama lea o le toto o le tagata, ma aveese mai lapisi e le faaaogaina e le tino aua o ia lapisi e afaina ai le tino pe a umi ona faaputu i le tino.
Talu ai ua faaletonu fatugao o lea tama, o le togafiti ua faatonuina e fomai, o le faaaoga lea o le masini e faamama ai lona toto. O le faamatalaga a fomai, o le a ola lea tama i le masini faamama toto, seia vagana ua maua fatugao lelei e fetaui ma lona tino, atonu ona mafai lea ona faia se taotoga e fesuiai ai.
O le masina ua tea na manatu ai lea tama, e saili se fofo Samoa pe maua ai se mapusaga i lona gasegase, ma ina ua maua lea fofo, ua musu loa e toe faaauau le togafitiga a le falemai. Fai mai ua manuia lona gasegase talu ona fofo o ia e le fofo Samoa.
Ina ua ou faalogo ua le toe alu i le falemai, ae ua faamoemoe i le fofo, sa ou fautua i ai i le sese o lana faaiuga ma e tatau ona toe foi i le falemai mo togafitiga.
I lona lava finagalo faitalia, na umi se taimi o taatia togafitiga a le falemai, ona o le talitonuga o lenei tama ua manuia i le fofo Samoa lea na sulu i ai.
Peitai ane, na ave faamalosi e lona toalua ma lana fanau i le falemai ina ua maitauina le tulaga faaletonu o lona malosi ma ua tigaina.
O le tala a le falemai, talu ai ua umi se taimi e le o faamama lona toto, ma faaputuputu ai lea ‘ona i totonu o lona tino, ua amata ai ona aafia ma ona totoga (sei tulou) aemaise ua afaina ai ma lona mafaufau.
Sa taumafai loa le falemai ia sosoo aso o faaaoga e lea tama le masini faamama toto ina ia aveese faavave le tele o le ‘ona ua faaputuputu i lona tino.
Ma e 7 aso o sosoo togafitiga i le masini faamama toto, ona o le tulaga faaletonu o lenei tama ina ua taunuu atu i le falemai. Ua maea nei togafitiga sa taumafai i ai le falemai ma o le fautuaga a le falemai ua le mafai ona foia le afaina ua iai nei lenei tama, ma ua le toe aoga i ai nisi togafitiga, ae sili ai loa ona ave i le fale ina ia lava se mafutaga ma lona aiga.
Ou te alofa tele i lenei tama o lou aiga, ma ou te le faaleaga ia te ia ma lana faaiuga na fai. Pau le mafuaaga ua ou faamatala atu ai lenei tulaga, ona o le naunauga ina ia tatou puipui lelei i lo tatou soifua maloloina ma faaaoga tatau fautuaga a fomai pe afai ua maua i gasegase o le tino.
Afai foi e faaaoga fofo Samoa, e tatau lava ona faaauau ma togafitiga o loo fautua mai ai fomai. Ou te talitonu lava e moni le gagana masani, ‘E sili lava le puipuia i lo le togafitia’.
I faamaumauga a le matagaluega o le soifua maloloina e maualuga lava le fuainumera o tagata Pasefika o loo maua i faamai o le fatu, toto maualuga, suka, ma le lapoa.
O nei faamai e mafua mai ona ua tele le taumafa i meaai e le lelei mo le tino, e pei o mea taumafa e tele ai le gao, taumafa mea suamalie, tapaa, ma le ava malosi.
E le gata i mea taumafa e le lelei mo le tino, ae e mafua foi ona mamai nisi o tatou tagata, ona ua leai se faamalosi tino o faia, e faaaoga i ai taumafa o loo taumafaina, ae ua faaputuputu i le tino ma avea ma tulaga ua lepetia ai le soifua maloloina lelei.
Ua maitauina lava le toatele o tatou aiga ua vave maua i mai o le tino ona o le le lelei o mea taumafa faapea ai le leai o se faamalositino. O le tagata e mai, o se tagata ua tiai galuega, o se tagata ua faaalu tupe ona o pili a fomai, ma talagavai, aemaise le faaaoga soo o le falemai, ma o se tagata foi e manaomia le fesoasoani a le Malo.
O latou uma o loo maua i ia faigata, a le iai ni suiga lelei mo lou soifua maloloina, o le a tele ni faaletonu e fetaiai ma oe.
O le tagata mai, o se tagata e le faigaluega. A leai se galuega, ua leai se tupe maua aua le tausiga o aiga. Afai ua leai se tupe mo le tausiga o le aiga, o lona uiga ua ola faamoemoe i le Malo poo isi.
