E fiafia foi e toe faafeiloai atu i le mamalu o si o tatou atunuu, i ou tulaga faalupe, o mamalu o Samoa mai le vavau e oo i le faavavau. Talofa lava. O loo faaauauina pea le talanoaina o le mataupu e pei ona tatou vaavaai i ai e ala i le faaoloaina lea o le auauna a le Atua. O lea ua sili atu nei ma le 10 vaiaso o tatou faia pea le fesili, pe e tatau ona totogiina le faifeau.
E ioeina ma le faamaoni i o tatou loto uma le tatau ona iai se seleni e tuuina atu i le auauna a le Atua ina ia mafai ona tausia lona aiga. Peitai e iai foi le lagona e lē tatau ona matuā pulepuletutū le auauna a le Atua i tupe maua a le Ekalesia, i se auala lē talafeagai ina ia tele ai lona manuia. E lē gata foi i lea e tatau ona iai le matafaioi a le ekalesia e tausia lelei ai le auauna a le Atua. O le vaiaso na tea nei na oo mai ai le tatou talanoaga i le mataupu aogā mo le faaleleia o le galuega faafaifeau. O se tasi lea o tulaga e tele ina lē amanaiaina e le ekalesia. E lē mafai ona iu mai le faifeau mai le aoga na aotauina ai o ia ma silafia mea uma mo le galuega. Silasila i mataupu o loo i lalo.
3.6 Faaaupegaina o le Faifeau mo le Galuega
E faatāuaina e le ekalesia _____ __________ le tatau ona maua e le faifeau le faaoloaina i le mafaufau atoa ai ma isi itu i la le tino o le galuega. O le a totogiina e le ekalesia, o tusi, o komepiuta, o semina, o Koneferenisi ma isi vaega faapena e auai atu i ai le faifeau. O le totogi e $1000 i le tausaga.
3.7 Totogiina o le lafoga pe a mālōlō Supa (Superannuation)
Pe a tusa ai ma le finagalo o le faifeau, o le a totogiina le lafoga o le Kiwi Saver.
3.8 Aso Mālōlō Faaletausaga (Public Holidays)
E tuuina atu i le faifeau le fa (4) vaiaso o aso mālōlō i tausaga taitasi. O aso mālōlō e tatau ona talanoaina ma le taitaifono o le Komiti Faafoe o le ekalesia __________________. E tatau i le faifeau ona ave ona aso mālōlō i tausaga taitasi ina ia mafai ona maua le malologa talafeagai. E lē mafai ona sili i le lua tausaga e lē aveina ona aso mālōlō. E ui e lē o se konekarate a se tagata faigaluega peitai e faatāuaina e le ekalesia _____________le agaga o le tulafono ua ta‘ua o le Holidays Acts 2003 ina ia tuuina atu aso mālōlō faalemalo.
3.9 Aso Mālōlō mo A‘oa‘oga (Study Leave)
E tuuina atu i le faifeau le fa (4) vaiaso mo a‘oa‘oga ina ua mae‘a le 3 tausaga o galue faafaifeau. E lē gata i lea ae o le faapea foi ona maua aso mālōlō mo a‘oa‘oga mo le fa (4) vaiaso i le ta‘i tolu tausaga. O le a faapea foi ona maua e le faifeau lana seleni masani a o iai o ia i malologa. E tatau ona ioeina muamua e le Komiti Faafoe aso mālōlō mo a‘oa‘oga o le faifeau a o lei mālōlō.
3.10 Isi Aso Mālōlō Faapitoa (Special Leave)
E faaopoopo i aso mālōlō faalemalo ma aso mālōlō mo a‘oa‘oga isi aso mālōlō e pei o aso mai, maliu i se aiga, poo nisi faalavelave faafuasei. E tatau ona faailoa atu e le faifeau i le taitaifono o le Komiti Faafoe le moomia ona aveina nei aso mālōlō faapitoa. E lē tatau ona sili atu i le 10 aso mālōlō faapenei i le tausaga.
3.11 Auaunaga e avea o se Faatonu o le Faamasinoga (Jury Service)
E tatau ona auai atu i le faamasinoga e pei ona moomia ia avea ma faatonu pe afai e lē teena e le faifeau. O le a faapea lava ona maua le tupe maua masani a le faifeau i vaiaso taitasi.
3.12 Talitonuga ma Mataupu Faatāuaina e faavae ai le Valaauina o le Faifeau
3.12.1 O Kerisiano o i latou ua valaauina ina ia mulimuli ma soifua i le olaga ma a‘oa‘oga a Keriso. E pei ona a‘oa‘oina e le Tusi Paia, o le faifeau o le Ekalesia ____________________ e tatau ona avea lona olaga o se molimau i le a‘oa‘oga a Keriso. Afai e lē mafai e le faifeau ona ola mulimuli ia Keriso e ala i lona olaga atoa i aso uma, aemaise o a‘oa‘oga a le Tusi Paia, o le a faia e le Komiti Faafoe se faaiuga ina ina ia mafai ai ona foia le faafitauli.
3.13 Faaumaina o le Valaauina o le Faifeau i totonu o le Ekalesia
3.13.1 E tatau ona tuuina atu e le faifeau le tolu masina i le Komiti Faafoe pe afai ua manatu e faaumaina ma mālōlō mai i lona valaauina i le kalesia___________________________. O le tolu masina o le a sailia ai se tasi faifeau. Afai e lē mafai ona tuuina mai le 3 masina, o le a faapea ona talanoa ma malilie le Komiti Faafoe i se taimi puupuu talafeagai.
3.13.2 Afai ae solia lenei maliliega ona o se tulaga faaletonu ogaoga i le soifua faaleagaga o le faifeau, va nonofo lelei ma tagata aemaise le soifua ola mamā, ona faia lea e le Komiti Faafoe se faaiuga talafeagai ma mulimulitaia le a‘oa‘oga a le Tusi Paia e pei ona ta‘ua i le Mataio 18:15-17 ma le Kalatia 6:1-5.
3.14 Feeseeseaiga
3.14.1 Afai e tulai mai se feeseeseaiga i le va o le Faifeau ma le Komiti Faafoe, ona taumafai lea e foia le faafitauli e ala i le iai o se maliliega e faaaogāina ai le fesoasoani a le faalapotopotoga ua ta‘ua o le “Christian Service for Dispute Resolution Inc.”
3.14.2 Afai ae lē mafai ona foia le faafitauli e ala i le faaaogāina o le auaunaga e pei ona ta‘ua i luga, ia ioeina faatasi e itu e lua ina ia aua ne‘i tuuina atu le mataupu i le faamasinoga maualuga.
Ia ioeina foi e itu uma e lua le totogiina faatasi o le tau mo le sailia o se maliliega.
1. Mataupu e lē tatau ona Faailoaina Faalauaitele
4.1 E ioeina faatasi e le faifeau ma le Komiti Faafoe le lē tatau ona faailoaina faalauaitele mataupu ma mea taitasi i totonu o lenei maliliega pe a iai se feeseeseaiga.
4.2 E ioeina e le faifeau ma le Komiti Faafoe le puipuia i taimi uma o le igoa lelei o le Komiti Faafoe e ala i le lē faia o faamatalaga poo ni amio e ono fesiligia ai le Komiti Faafoe.
O lenei Valaauina e amataina i le aso_______________o le masina o _______________ 2011.
Sainia e: Faifeau ____________________ _________________________________
Igoa atoa o le Faifeau ________________________________________________
Sainia e: ___________________________________________________________
Taitaifono Komiti Faafoe ______________________________________________
Mo le Ekalesia: _____________________________________________________
O le faaiuga lena i le mataupu e uiga i le maliliega tusitusia i le va o le faifeau ma le ekalesia. O mataupu e pei ona ta‘ua i luga ua na o se taiala. E tatau ona saili le finagalo o le loia poo se isi faifeau poo le taiala mai le ofisa tutotonu o le tou ekalesia e uiga i lenei mataupu.
E lē tatau ona faaaogāina lenei tusitusiga o se mataupu autū, peitai ia avea o se taiala.
Ia manuia.
Lui Ponifasio
www.luiponifasio.wordpress.com
