Talu mai le ioeina e le faigamalo o le Setete a Niu Ioka (New York) i Amerika o le faatagaina o le faaipoipoga o le tane ma le tane poo le fafine ma le fafine, toe sosoo ma le taliaina e le Peresitene o Amerika, le alii o Barack Obama o ia faaipoipoga, o lea ua toe a‘e ai le faatalanoaina ma le finauga o lenei mataupu i Niu Sila.
O se mataupu ma‘ale‘ale tele i finagalo o le tatou Atunuu ma le aotelega o tagata Pasefika, aemaise foi i ekalesia. E le gata i lea ua faapena foi ona faailoa mai ia te au lagona malosi mai tagata Asia aemaise latou o loo iai talitonuga faa-Musalemi i lenei lava mataupu.
O lea ua taulamua le tamaitai o Louisa Wall o le faipule a le Leipa i Manurewa i le tapenaina o se tulafono taufaaofi a le faipule lava ia mo le Palemene a Niu Sila ina ia toe teuteu ai le Tulafono o Faaipoipoga 1955 (Marriage Act 1955).
E lua vaega o le Tulafono o Faaipoipoga 1955 o le a teuteu i le manao o Louisa Wall. O le vaega 4 o le Tulafono ua faamanino ai le autu o le teuteuga – ma o le autu o le teuteuga o le faamanino atili lea o le uiga o le upu ‘faaipoipoga’ – o le va lea o tagata e toalua – e aunoa ma le faailoga tagata ia i latou e ese mai le tane ma le fafine, ae ua aofia uma ai soo se ituaiga tagata.
O le vaega 5 o le Tulafono o Faaipoipoga o le a teuteu ma faaopoopo i ai le uiga o le upu faaipoipo ma o upu ia faaperetania, “the union of 2 people, regardless of their sex, sexual orientation, or gender identity.”
O lona uiga o nei teuteuga o le Tulafono o Faaipoipoga 1955 o le tuufaatasia lea o tagata e toalua. O le a lē faatapulaa i na o le va o le tane ma le fafine, ae o le a talia soo se ituaiga tagata – e pei ona iai ituaiga tagata eseese i nei ona po.
O le a faamanino foi i lenei tulafono, e sa ona faaipoipo se isi ia latou nei: mātua o mātua –grandparents; mātua – parents; fanau – child; fanau a fanau – grandchild; uso poo tuafāfine – sibling; uso o mātua – parent’s sibling; fanau a uso – sibling’s child; toalua o mātua o mātua – grandparent’s spouse or civil union partner; toalua o mātua – parent‘s spouse or civil union partner.
Ina ua fesiligia a‘u i lenei mataupu – o la‘u tali i ai, e tetee i ai le toatele o tagata Pasefika, faapea tagata Asia aemaise ekalesia. Peitai ane, e iai nisi o Ekalesia e taliaina lea mataupu.
E iai foi nisi o tagata Pasefika e taliaina lenei mataupu, faapea foi nisi o tagata Asia. Ae ou te talitonu o le aotelega o talitonuga o tagata Pasefika, Asia ma Ekalesia o le tetee lea i lenei mataupu.
E iai lo‘u talitonuga o lenei mataupu e le o se mataupu tāua tele, ona ou te taofi o loo iai mataupu e sili atu ona tatau ona ave i ai le faamuamua e pei o galuega, totogi a le aufaigaluega, mataupu tau fale, mataupu tau aoga a le fanau.
Ou te manatu foi e iai nisi i totonu o tatou aiga Samoa e taliaina lenei mataupu ona o talitonuga faapea o lenei lava olaga o le olaga o le saolotoga ma o le meaalofa lea mai le Atua o le filifiliga saoloto a le tagata lava ia.
Ua atili lavelave foi ma ma‘ale‘ale ai lenei mataupu ona o loo iai nisi o tatou aiga Samoa o loo faapena ona iai ulugalii ua leva ona nonofo faatasi – o ulugalii o le tane ma le tane, ma ulugalii o le fafine ma le fafine.
E le o se mea fou ia faiga ulugalii ia Samoa. O nisi foi o aiga ua iai alo ma fanau ua faapea ona nonofo faatasi i ia faigaulugalii.
Ua ou fesiligia foi nisi o ia ulugalii poo fea o iai o latou finagalo i lenei mataupu. O nisi o tatou lava tagata ua faapea mai, e talia ma le fiafia le avanoa e faaipoipo ai. A o nisi ua faapea mai ia te au, e le o tāua tele mo latou.
O nei foi ulugalii Samoa o loo tautua malosi i totonu o o latou aiga, faapea foi a latou ekalesia.
O le fesili faalemafaufau, pe talafeagai ea le teena o aiā tatau o loo manao mai i ai i latou nei? Afai o tatou uma o fanau a le Atua, e talia latou filifiliga ua fai, pe tatou te tetee i ai? O ai ea o tatou ua atoatoa i le silafaga a le Atua e mafai ai ona tatou faamasino i latou?
E ui i lea, ou te manatu o loo taofi tasi le tatou Atunuu, faapea le toatele o tagata Pasefika, Ekalesia ma tagata Musalemi – o le faaipoipoga na faavae e le Atua i le va o Atamu ma Eva, poo le tane ma le fafine, ma o loo tumau pea lea faavae, e mai lava i le amataga seia oo i le gataaga.
Peitai ane, i nei lava aso ua ese aga ma taga ua iai le lalolagi nei. Mai le amataga talu ona tutoatasi Samoa, na faavae lava i le faaupuga e “Faavae Samoa i le Atua”. E ui i lenei faavae o loo taofi mau foi Samoa o se Atunuu saoloto, ma e saoloto uma tagata soifua.
O le mafuaaga foi lea e tusa lava poo lea le iai o tulafono, ae e toatele foi lava le au solitulafono – ona o le saolotoga ua foai mo tatou uma.
E sau se taimi ona finauina lea o lenei mataupu i le Palemene. E iai le saolotoga a faipule taitasi e palota ai lava le faipule i le ioe ma le tetee e tusa ai ma lona ia saolotoga ma talitonuga.
Poo fea lava e iai le malosi o lagona o le tatou Atunuu, ou te manatu o le taimi lenei e tāua ai le faaalia o lou finagalo i le faipule o lou lava itumalo.
O a‘u lava ia, ou te puipui tele i le faavae na ou ola mai ai – o le faaipoipoga o le faatasiga lea o le tane ma le fafine.
